Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 72

Jọja Jesu

Jọja Jesu

Josẹfu po Malia po nọ nọ̀ Nazalẹti hẹ Jesu gọna visunnu po viyọnnu yetọn he pò lẹ po. Josẹfu nọ wazọ́n whlẹpatọ tọn nado penukundo whẹndo lọ go, podọ e nọ plọnnu yé gando Jehovah po Osẹ́n etọn po go. Whẹndo lọ nọ yì sinagọgu mẹ to gbesisọ mẹ nado basi sinsẹ̀n bosọ nọ yì Jelusalẹm to whemẹwhemẹ na hùnwhẹ Juwayi tọn.

Whenue Jesu tindo owhe 12, whẹndo etọn zingbejizọnlin gaa de yì Jelusalẹm dile yé ko nọ wà do. Mẹsusu wẹ wá tòdaho lọ mẹ nado basi hùnwhẹ Juwayi tọn. To hùnwhẹ lọ godo, Josẹfu po Malia po wleali nado lẹkọyi whé, bo lẹndọ Jesu na ko to mẹlẹ mẹ. Amọ́, yé wá dín in to hẹnnumẹ yetọn lẹ ṣẹnṣẹn bo ba ẹ pò.

Yé sọ lẹkọyi Jelusalẹm bo to visunnu yetọn dín pé kaka na azán atọ̀n. To godo mẹ, yé yì tẹmpli mẹ. To finẹ, yé mọ Jesu to aisinsin to mẹplọntọ lẹ ṣẹnṣẹn bọ e to todoaina yé po sọwhiwhe po bosọ to kanbiọ lẹ kanse. Nuhe dọ Jesu te lẹ jiawu na mẹplọntọ lọ lẹ sọmọ bọ  yé jẹ kanbiọ lẹ kanse e ji. Podọ, gblọndo etọn lẹ nọ paṣa yé. Yé mọdọ e mọnukunnujẹ Osẹ́n Jehovah tọn mẹ.

Josẹfu po Malia po ko hànu taun. Malia sọ dọmọ: ‘Ovi, filẹpo wẹ mí ko dín we gbọn! Fitẹ wẹ a yì?’ Jesu dọmọ: ‘Mì ma yọnẹn dọ n’dona to ohọ̀ Otọ́ ṣie tọn mẹ wẹ ya?’

Jesu hodo mẹjitọ etọn lẹ yì whé to Nazalẹti. Josẹfu plọnazọ́n whlẹpipa tọn Jesu. Omẹ nankọ wẹ a lẹndọ Jesu na ko yin to jọja whenu? Dile Jesu to whinwhẹ́n, e sudeji to nuyọnẹn mẹ bosọ tindo nukundagbe Jiwheyẹwhe po gbẹtọ po tọn.

“Jiwheyẹwhe ṣie E, yẹn nọ mọ awuvivi to ojlo towe wiwà mẹ, podọ osẹ́n towe tin to ahun ṣie mẹ dọ́n.”​—Salmu lẹ 40:8