Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 63

Nukinkan de to Adógo

Nukinkan de to Adógo

To ojlẹ de godo, Bẹlṣazali lẹzun ahọlu Babilọni tọn. To zánmẹ gbèdopo, e basi oylọna nudi omẹ fọtọ́n sọn omẹ nukundeji he to aigba lọ ji lẹ mẹ wá hùnwhẹ de tẹnmẹ. E degbena devizọnwatọ etọn lẹ nado hẹn kọfo sika tọn he Nẹbukadnẹzali ko bẹ sọn tẹmpli Jehovah tọn mẹ lẹ wá na ẹn. Bẹlṣazali po jonọ etọn lẹ po yí kọfo lọ lẹ do nùahàn bo to gigopana yẹwhe yetọn lẹ. To ajiji mẹ, alọ gbẹtọ tọn de sọawuhia bo jẹ hogbe dabla delẹ kàn do adógo ji to núdù-họsa lọ.

Obu jẹ Bẹlṣazali ji. E ylọ nujlẹtọ etọn lẹ wá bo dopà na yé dọmọ: ‘Eyin depope to mì mẹ gán basi zẹẹmẹ hogbe ehelẹ tọn, yẹn na hẹn ẹn zun omẹ atọ̀ntọ he dohuhlọn hugan to Babilọni.’ Yé wà nuhe go yé pé lẹpo, ṣigba depope yetọn ma penugo nado basi zẹẹmẹ hogbe lọ lẹ tọn. Whenẹnu wẹ ahọsi lọ wá bo dọmọ: ‘Dawe de tin he nọ yin Daniẹli bo nọ basi zẹẹmẹ nulẹ tọn na Nẹbukadnẹzali. E gán basi zẹẹmẹ hogbe ehelẹ tọn na we.’

Daniẹli biọ họmẹ wá ahọlu dè. Bẹlṣazali sọ dọna ẹn dọmọ: ‘Eyin a penugo bo hia hogbe ehelẹ bosọ basi zẹẹmẹ yetọn, n’na na we kọnú sika tọn de bo nasọ hẹn we zun omẹ atọ̀ntọ he dohuhlọn hugan to Babilọni.’ Daniẹli dọmọ: ‘N’ma jlo nunina towe lẹ, amọ́ n’na dọ nuhe hogbe lọ lẹ zẹẹmẹdo na we. Na otọ́ towe Nẹbukadnẹzali yin goyitọ wutu, Jehovah whiwhẹ ẹ. A yọ́n nuhe jọ do otọ́ towe go lẹpo, amọ́ a do mẹmasi hia Jehovah gbọn kọfo sika tọn he wá sọn tẹmpli Etọn mẹ lẹ yiyizan nado nù ovẹn dali. Enẹ wẹ zọ́n bọ Jiwheyẹwhe do kàn hogbe ehelẹ: Mene, Mene, Tekẹli podọ Palsini. Hogbe lọ lẹ zẹẹmẹdo dọ Medianu lẹ po Pẹlsianu lẹ po na gbawhàn Babilọni tọn, bọ hiẹ ma nasọ yin ahọlu ba.’

 E nọ taidi dọ mẹde ma gán gbawhàn Babilọni tọn wẹ nkọ. Adó he tli lẹ po tọ̀sisa he siso de po wẹ lẹdo tòdaho lọ bo nọ basi hihọ́na ẹn. Ṣigba to ozán enẹ mẹ, Medianu lẹ po Pẹlsianu lẹ po tọ́nawhàn yé. Ahọlu Pẹlsianu lẹ tọn, Kilusi, diọkọna tọ̀sisa lọ na awhànfuntọ etọn lẹ nido sọgan zinzọnlin kaka wá họngbo tòdaho lọ tọn ji. Whenue yé jẹ finẹ, yé mọdọ họngbo lọ lẹ ko yin jijodo nùvo! Awhànpa lọ sọ wọ̀ biọ tòdaho lọ mẹ bo gbawhàn etọn bosọ hù ahọlu lọ. Enẹgodo, Kilusi dugán do Babilọni ji.

To gblagbla owhe dopo tọn mẹ, Kilusi lá dọmọ: ‘Jehovah ko degbena mi dọ yẹn ni vọ́ tẹmpli etọn gbá to Jelusalẹm. Eyin mẹdepope to omẹ etọn lẹ mẹ jlo na gọalọ, e vò nado yì.’ Gbọnmọ dali, kẹdẹdile Jehovah ko dopà etọn do, susu Juvi lẹ tọn lẹkọyi whé owhe 70 to vasudo Jelusalẹm tọn godo. Kilusi gọ̀ kọfo sika po fataka po tọn gọna nuyizan he Nẹbukadnẹzali ko bẹ sọn tẹmpli lọ mẹ lẹpo jo. Be a mọ lehe Jehovah yí Kilusi zan nado gọalọna omẹ Etọn lẹ do ya?

“E ko họ́! Babilọni Daho lọ ko họ́, podọ e ko lẹzun fininọ de na aovi lẹ.”​—Osọhia 18:2