Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 60

Ahọluduta de He Na Nọte Kakadoi

Ahọluduta de He Na Nọte Kakadoi

To zánmẹ gbèdopo, Ahọlu Nẹbukadnẹzali kudlọ he dobu de. Odlọ lọ dotukla ẹ sọmọ bọ e ma gán damlọn. E ylọ nujlẹtọ etọn lẹ pli bo dọna yé dọmọ: ‘Mì dọ nuhe odlọ ṣie zẹẹmẹdo na mi.’ Yé dọmọ: ‘Ahọlu E, dọ odlọ towe na mí.’ Ṣigba, Nẹbukadnẹzali dọna yé dọmọ: ‘Eyeo! Mìwlẹ wẹ na dọ odlọ he n’kú lọ na mi, e ma yinmọ n’na hù mì.’ Yé sọ vọ́ dọna ẹn dọmọ: ‘Dọ odlọ lọ na mí whẹ́, enẹgodo mí na dọ nuhe e zẹẹmẹdo na we.’ E dọna yé dọmọ: ‘Mìmẹpo wẹ to tintẹnpọn nado blẹ mi. Mì dọ odlọ he n’kú lọ na mi!’ Yé dọna ahọlu dọ: ‘Gbẹtọvi de ma tin bo gán wàmọ. Nuhe biọ a te ma yọnbasi.’

Adi do Nẹbukadnẹzali sọmọ bọ e degbe dọ nuyọnẹntọ he to aigba lọ ji lẹpo ni yin hùhù. Ehe bẹ Daniẹli, Ṣadlaki, Meṣaki po Abẹdinẹgo po hẹn. Daniẹli biọ dọ ahọlu ni na emi ojlẹ vude. Enẹgodo, ewọ po họntọn etọn lẹ po hodẹ̀ hlan Jehovah bo biọ to e si nado gọalọna yé. Etẹwẹ Jehovah wà?

To numimọ de mẹ, Jehovah do odlọ Nẹbukadnẹzali tọn hia Daniẹli bo dọ nuhe e zẹẹmẹdo na ẹn. To wunkẹngbe, Daniẹli yì devizọnwatọ ahọlu lọ tọn dè bo dọmọ: ‘Ma hù depope to nuyọnẹntọ lọ lẹ mẹ blo. N’gán dọ nuhe odlọ ahọlu tọn zẹẹmẹdo.’ Devizọnwatọ lọ plan Daniẹli yì Nẹbukadnẹzali dè. Daniẹli sọ dọna ahọlu lọ dọmọ: ‘Jiwheyẹwhe ko de nuhe na jọ to sọgodo hia we. Odlọ he a kú lọ die: Hiẹ mọ boṣiọ daho-gbó de he ota etọn yin sika, akọ́nnu po awà etọn lẹ po yin fataka, hòtò etọn po asapada etọn lẹ po yin gànvẹẹ, azangandan etọn lẹ yin gànyuu podọ apadewhe afọ etọn tọn yin gànyuu bọ apadewhe yin okò. Enẹgodo, zannu de yin sinsánsẹ sọn osó de go bo wá hò afọ boṣiọ lọ tọn lẹ. Boṣiọ lọ sọ gbà hányán bọ jẹhọn fú i dlan. Bọ zannu lọ wá lẹzun osó daho de bo gọ́ aigba blebu ji.’

 To whenẹnu, Daniẹli dọmọ: ‘Nuhe odlọ towe zẹẹmẹdo die: Ahọluduta towe wẹ yin ota sika tọn lọ. Fataka lọ yin gandudu de he na bọdo towe go. Enẹgodo, ahọluduta he taidi gànvẹẹ de na fọ́n bo na dugán do aigba pete ji. Ahọluduta he na bọdego na dohuhlọn taidi gànyuu. To godo mẹ, ahọluduta he mẹ kinklan te de na fọ́n bọ adà etọn delẹ na dohuhlọn taidi gànyuu podọ adà delẹ na yin madogánnọ taidi okò. Zannu he wá lẹzun osó lọ nọtena Ahọluduta Jiwheyẹwhe tọn. E na gídí ahọluduta enẹ lẹpo bo na nọte kakadoi.’

To whenẹnu, Nẹbukadnẹzali họ́jai to Daniẹli nukọn bo ṣinyọ́n nukunmẹ ai. E dọmọ: ‘Jiwheyẹwhe towe wẹ de odlọ ehe hia we. Jiwheyẹwhe de ma tin taidi ewọ.’ Kakati nado hù Daniẹli, Nẹbukadnẹzali ze e daga do nuyọnẹntọ lẹpo ji podọ taidi ogán do agbegbe Babilọni tọn ji. Be a mọ lehe Jehovah na gblọndo odẹ̀ Daniẹli tọn gbọn ya?

“Yé sọ bẹ yé pli dopọ do fihe nọ yin yiylọ to Heblugbe mẹ dọ Amagẹdọni.”​—Osọhia 16:16