Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 65

Ẹsteli Whlẹn Omẹ Etọn Lẹ

Ẹsteli Whlẹn Omẹ Etọn Lẹ

Ẹsteli yin awhli Juvi de he nọgbẹ̀ to tòdaho Pẹlsianu lẹ tọn he nọ yin Ṣuṣani mẹ. To owhe susu die, Nẹbukadnẹzali bẹ ewọ po whẹndo etọn po yì sọn Jelusalẹm. E wá yin pinplọn whẹ́n gbọn tavẹ-vi etọn Mọldekai dali, mẹhe nọ wadevizọn na Ahọlu Pẹlsia tọn Ahasuelusi.

Ahọlu Ahasuelusi to ahọsi yọyọ de dín. Devizọnwatọ etọn lẹ sọ hẹn yọnnu he yọnwhanpẹ hugan to aigba lọ ji lẹ wá e dè, bọ Ẹsteli tin to yé mẹ. To yọnnu lọ lẹpo mẹ, Ẹsteli wẹ ahọlu lọ de nado yin ahọsi. Mọldekai dọna Ẹsteli dọ ni ma dohia dọ Juvi de wẹ emi yin blo.

Dawe goyitọ de he nọ yin Hamani, wẹ yin nukọntọ ahọvi lẹpo tọn. E nọ jlo dọ mẹlẹpo ni dẹ́ do odò na emi. Mọldekai gbẹ́ nado wàmọ bọ homẹgble Hamani sọmọ bọ e jlo na hù i. To whenue Hamani mọdọ Juvi de wẹ Mọldekai yin, e jẹ ayiha kàn ji nado hù Juvi he to aigba lọ ji lẹpo. E dọna ahọlu dọmọ: ‘Mẹylankan wẹ Ju lẹ; a dona sukúndona yé.’ Ahasuelusi dọmọ: ‘Wà nudepope he jlo we,’ podọ e sọ na aṣẹ Hamani nado de osẹ́n de tọ́n. Hamani de osẹ́n de tọ́n he dọ dọ mẹlẹ dona hù Juvi lẹpo to azán 13tọ osun Adali tọn gbè. Jehovah mọ nuhe to jijọ lọ.

Ẹsteli ma yọnẹn dọ osẹ́n mọnkọ yin didetọn. Enẹwutu, Mọldekai do vọkan osẹ́n lọ tọn de hlan ẹn bo dọmọ: ‘Yì dọho hẹ ahọlu.’ Ẹsteli sọ dọmọ: ‘Mẹdepope he yì ahọlu dè matin oylọ-basinamẹ nọ yin hùhù. E ko yì azán 30 he ahọlu ma basi oylọna mi! Amọ́, n’na yì. Eyin e dlẹn ogánpò etọn do mi, n’na nọgbẹ̀. Eyin e ma ka wàmọ, be n’na kú.’

Ẹsteli yì awánu ahọlu lọ tọn mẹ. Whenue ahọlu lọ mọ ẹn, e dlẹn ogánpò etọn do e. Ẹsteli sọ yì ahọlu dè, bọ e kanse e dọ: ‘Etẹwẹ a jlo dọ yẹn ni wà na we, Ẹsteli?’ Ẹsteli gblọn dọmọ: ‘N’jlo na basi oylọna  hiẹ po Hamani po wá hùnwhẹ de tẹnmẹ.’ To hùnwhẹ lọ tẹnmẹ, Ẹsteli vọ́ oylọ-basina yé wá hùnwhẹ devo. To hùnwhẹ awetọ lọ tẹnmẹ, ahọlu vọ́ kanse e dọ: ‘Etẹwẹ a jlo dọ yẹn ni wà na we?’ E dọmọ: ‘Mẹde jlo na hù yẹn po omẹ ṣie lẹ po. Jaale bo whlẹn mí.’ Ahọlu lọ sọ kanse e dọ: ‘Mẹnu wẹ jlo na hù mì?’ E dọmọ: ‘Dawe ylankan enẹ he nọ yin Hamani wẹ.’ Homẹgble Ahasuelusi sọmọ bọ e degbe to afọdopolọji dọ Hamani ni yin hùhù.

Ṣigba, mẹdepope ma gán zẹhudo osẹ́n Hamani tọn ji, etlẹ yin ahọlu lọsu. Enẹwutu, ahọlu yí Mọldekai do basi ogán do ahọvi lẹ ji bo na ẹn gbè nado de osẹ́n devo tọ́n. Mọldekai de osẹ́n de tọ́n he nagbè Juvi lẹ nado yiavùnlọna yede eyin mẹde tọ́navùn yé. To azán 13tọ osun Adali tọn gbè, Juvi lẹ duto kẹntọ yetọn lẹ ji. Sọn ojlẹ enẹ mẹ sọyi, yé nọ basi hùnwhẹ de to whemẹwhemẹ nado flin awhàngbigba enẹ.

“Mì nasọ yin hinhẹn yì ayimatẹn-gán lẹ po ahọlu lẹ po nukọn, na yẹn tọn wutu, na okunnu de na yewlẹ podọ na akọta lẹ.”​—Matiu 10:18