Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Lẹkọwa Jehovah Dè

Wekanhlanmẹ de sọn Hagbẹ Anademẹtọ lọ Dè

Wekanhlanmẹ de sọn Hagbẹ Anademẹtọ lọ Dè

Yisenọ hatọ vivẹ́ lẹ emi:

Dile mìlọsu yọnẹn do, Biblu yin owe de he gando gbẹtọ lẹ go taun. Sunnu po yọnnu nugbonọ susu lẹ po ko pehẹ avùnnukundiọsọmẹnu he taidi mítọn nkọ lẹ. Yé tindo “numọtolanmẹ taidi mítọn lẹ nkọ.” (Jakọbu 5:17) Mẹdelẹ ko jẹflumẹ na nuhahun po magbọjẹ lẹ po wutu. Mẹdevo lẹ ko gblehomẹ sinsinyẹn, na nuyiwa hagbẹ whẹndo tọn kavi yisenọ hatọ lẹ tọn wutu. Mẹsusu devo lẹ nọ to whẹgbledo yede na nuṣiwa yetọn lẹ, ehe zọ́n bọ yé hẹn awufiẹsa wá yede ji.

Ninọmẹ ehelẹ zọ́n bọ delẹ to yé mẹ ko danbú sọn Jehovah dè. Ṣigba, be omẹ mọnkọtọn lẹ ko jo ewọ do mlẹnmlẹn wẹ ya? Lala. Susu yetọn lẹ wẹ taidi Psalm-kantọ lọ he hodẹ̀ dọmọ: “N’ko danbú di lẹngbọ he to búbú de. Dín devizọnwatọ towe mọ, na n’ma wọn gbedide towe lẹ.” (Psalm 119:176) Be hiẹ lọsu nọ tindo numọtolanmẹ mọnkọtọn lẹ ya?

Jehovah ma nọ wọnji sinsẹ̀n-basitọ etọn he danbú sọn apó lọ mẹ lẹ go gbede. Kakatimọ, e nọ dín yé mọ, podọ e nọ saba wàmọ gbọn yisenọ hatọ yetọn lẹ dali. Di apajlẹ, lẹnnupọndo lehe Jehovah gọalọna devizọnwatọ etọn Job do ji, mẹhe pehẹ nugbajẹmẹji susu lẹ, taidi nuhahun akuẹzinzan tọn, okú mẹyiwanna lẹ tọn po azọ̀n sinsinyẹn po. Job sọ doakọnna hodidọ whánsọmẹ tọn he mẹhe dona ko na ẹn tuli lẹ dọna ẹn lẹ. Ṣigba, dile etlẹ yindọ to ojlẹ de mẹ, e lẹnnupọn to aliho he ma sọgbe mẹ, ewọ ma gbẹ́ Jehovah dai gbede. (Job 1:22; 2:10) Nawẹ Jehovah gọalọna Job nado gọ̀ biọ ede mẹ gbọn?

Dopo to aliho he mẹ Jehovah gọalọna Job te lẹ mẹ wẹ gbọn yisenọ hatọ de he nọ yin Elihu yiyizan dali. To whenue Job dọ nuhe to ahunmẹduna ẹn lẹ tọ́n, Elihu dotoai podọ enẹ whàn ẹn nado dọho. Etẹwẹ e na dọ? Be e na mọhodọdo Job go kavi na ẹn tuli nado diọ linlẹn etọn gbọn whẹgbigbledo e kavi winyan dido e dali wẹ ya? Be Elihu pọ́n ede hlan taidi mẹhe hugan Job wẹ ya? Paali! Kakatimọ, gbigbọ wiwe Jiwheyẹwhe tọn whàn Elihu bọ e dọmọ: “N’ma gbọnvona we to Jiwheyẹwhe nugbo lọ nukọn; okò wẹ yè yí do basi yẹnlọsu ga.” Enẹgodo e vọ́ jide na Job dọmọ: “Obu ṣie ma dona di we, podọ hogbe ṣie lẹ ma na sinyẹn sọmọ nado húagbọ́ we.” (Job 33:6, 7) Kakati nado yidogọna awufiẹsa Job tọn lẹ, Elihu yí owanyi do na ayinamẹ Job bosọ na ẹn tuli he e tindo nuhudo etọn.

Jaale, yọnẹn dọ aliho dopolọ mẹ wẹ mílọsu wleawuna alọnuwe ehe te. Tintan, mí dotoaina mẹsusu he ko danbú lẹ bosọ yí sọwhiwhe do lẹnnupọndo ninọmẹ yetọn po nuhe yé nọ dọ lẹ po ji. (Howhinwhẹn lẹ 18:13) Awetọ, mí yí Owe-wiwe lẹ zan, bo hodẹ̀, bosọ gbadopọnna kandai delẹ he do lehe Jehovah gọalọna devizọnwatọ etọn lẹ to hohowhenu do hia to whenue yé pehẹ ninọmẹ mọnkọtọn lẹ. Podọ atọ̀ntọ, mí yí kandai Owe-wiwe tọn enẹlẹ po nujijọ egbezangbe tọn lẹ po zan nado wleawuna alọnuwe ehe. Po zohunhun po wẹ mí to tulina we nado gbadopọnna alọnuwe ehe. Jaale bo deji dọ mí yiwanna we po ahun lẹpo po.

Hagbẹ Anademẹtọ Kunnudetọ Jehovah Tọn lẹ Tọn