Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Lẹkọwa Jehovah Dè

 APÁ ATỌ̀N

Homẹgble—To Whenue Mí Tindo “Whẹwhinwhẹ́n Nado Wọ́”

Homẹgble—To Whenue Mí Tindo “Whẹwhinwhẹ́n Nado Wọ́”

“Mẹmẹyọnnu de to agun ṣie mẹ sawhẹdokọna mi dọ n’fìn akuẹ emitọn. Mẹdevo lẹ to agun lọ mẹ sèhó lọ, bo yíwhẹ̀ do mẹmẹyọnnu lọ ji. To godo mẹ, mẹmẹyọnnu lọ wá dọna mi dọ emi ko mọ kunnudenu yọyọ delẹ he dohia dọ e ma yin yẹn wẹ fìn akuẹ lọ. Dile etlẹ yindọ e vẹvẹna mi, n’magbe to ahun ṣie mẹ dọ n’ma na jona ẹn gbede na nuhe e wà na mi wutu.”—Linda.

BE HIẸ lọsu ko tindo numimọ Linda tọn nkọ pọ́n bo gblehomẹ sinsinyẹn na nuyiwa yisenọ hatọ de tọn wutu ya? E blawu dọ, mẹdelẹ ko jẹflumẹ na nuyiwa mẹdevo lẹ tọn wutu, podọ ehe yinuwado nuwiwa gbigbọmẹ tọn yetọn ji. Be nuhe jọ do hiẹ lọsu go niyẹn ya?

Be Mẹde Sọgan “Klan Mí sọn Owanyi Jiwheyẹwhe Tọn” Go Ya?

Nugbo wẹ dọ, e sọgan vẹawuna mí nado jona yisenọ hatọ de he hẹn homẹgblena mí. Etomọṣo, Klistiani lẹ dona yiwanna ode awetọ. (Johanu 13:34, 35) Eyin yisenọ hatọ de ṣinuwa do mí, flumẹjijẹ po awufiẹsa he e nọ hẹnwa po nọ sinyẹn taun.—Psalm 55:12.

Na nugbo tọn, Biblu dohia dọ to whedelẹnu Klistiani lẹ nọ tindo “whẹwhinwhẹ́n nado wọ́” hẹ ode awetọ. (Kọlọsinu lẹ 3:13) Etomọṣo, eyin enẹ jọ do mí go, e sọgan vẹawuna mí nado doakọnna. Etẹwẹ sọgan gọalọna mí? Lẹnnupọndo nunọwhinnusẹ́n Owe-wiwe tọn atọ̀n delẹ ji:

Otọ́ olọn mẹ tọn mítọn yọ́n nulẹpo. Jehovah nọ mọ nuhe to jijọ lẹpo, kakajẹ mawadodo he mí nọ pehẹ lẹ po awufiẹsa he e nọ hẹnwa lẹ po ji. (Heblu lẹ 4:13) Humọ, onú mítọn nọ biọlanmẹna Jehovah to whenue mí to yaji. (Isaia 63:9) Ewọ ma nọ dike gbede na “nukunbibia kavi ayimajai” kavi nudevo depope, etlẹ yin devizọnwatọ etọn devo de ni “klan mí sọn owanyi Jiwheyẹwhe tọn” go. (Lomunu lẹ 8:35, 38, 39) Enẹwutu, mílọsu ma dona dike nudepope kavi mẹdepope ni klan mí sọn Jehovah go.

Jonamẹ ma zẹẹmẹdo nukun mimiọn do nuṣiwa. To whenue mí jona mẹhe ṣinuwa do mí lẹ, enẹ ma dohia dọ mí miọnnukundo nuṣiwa lọ, suwhẹna ẹn, nọgodona ẹn kavi yí nukunpẹvi do pọ́n nuhe mẹlọ wà gba. Flindọ, Jehovah ma nọ kẹalọyi ylando gbede, ṣigba e nọ jonamẹ eyin dodonu de tin nado wàmọ. (Psalm 103:12, 13; Habbakuk 1:13) To whenue Jehovah na mí tuli nado nọ jona mẹdevo lẹ, e to bibiọ to mí si nado hodo apajlẹ etọn wẹ. Ewọ ma nọ “gblehomẹ kakadoi.”—Psalm 103:9; Matiu 6:14.

Eyin mí jo homẹgble do, e nọ hẹn ale wá na mílọsu. To aliho tẹ mẹ? Mì gbọ mí ni pọ́n apajlẹ ehe. Mí ni dọ dọ a ze zannu de, vlavo dehe ma pẹ̀n sọmọ bo dlẹn awà towe. E yọnbasi dọ e ma na vẹawuna we nado hẹn e go na ojlẹ vude. Ṣigba etẹwẹ lo, eyin a tẹnpọn nado hẹn ẹn domọ na ojlẹ dindẹn? Ojlẹ nẹmu wẹ a na penugo nado hẹn ẹn dẹnsọ? Be na nukunwhiwhe delẹ wẹ ya, kavi gànhiho dopo, kavi dẹn humọ? Ayihaawe ma tin dọ, awà na kú we taun! Nugbo wẹ dọ, zínpinpẹn zannu lọ tọn ma jẹeji. Ṣigba, dile a ze e hẹn dẹnsọ, mọ wẹ e nọ taidi dọ e to pinpẹn dogọ do niyẹn. Nudopolọ wẹ homẹgble nọ wà. Eyin homẹgble mítọn ma tlẹ sinyẹn, dile mí hẹn ẹn dẹnsọ, mọ wẹ mí nọ to awugblena míde zọnmii do niyẹn. Abajọ, Jehovah do dotuhomẹna mí nado nọ jo homẹgble do. Na nugbo tọn,  homẹgble jijodo nọ wà dagbe na mí.—Howhinwhẹn lẹ 11:17.

Eyin mí jo homẹgble do, e nọ hẹn ale wá na mílọsu

“N’Tindo Numọtolanmẹ Dọ Jehovah Lọsu Wẹ to Hodọna Mi”

Etẹwẹ gọalọna Linda nado jo homẹgble do to whenue yisenọ hatọ de yinuwa hẹ ẹ to aliho agọ̀ mẹ? Dopo to nuhe e wà lẹ mẹ wẹ yindọ, e lẹnayihamẹpọn do whẹwhinwhẹ́n he Owe-wiwe lẹ na, he wutu mí dona nọ jonamẹ ji. (Psalm 130:3, 4) To whenue Linda mọnukunnujẹemẹ dọ eyin mí jona mẹdevo lẹ, Jehovah na jona mílọsu, ehe yinuwadeji taun. (Efesunu lẹ 4:32–5:2) Nuhe e plọn lẹ yinuwadeji sọmọ bọ e dọmọ: “N’tindo numọtolanmẹ dọ Jehovah lọsu wẹ to hodọna mi.”

To nukọn mẹ, Linda penugo nado jo homẹgble do. E jona mẹmẹyọnnu lọ sọn ojlo mẹ wá, podọ mẹmẹyọnnu enẹ wẹ yin họntọn etọn vivẹ́ todin. Linda zindonukọn to sinsẹ̀n-bibasi etọn mẹ hlan Jehovah. Deji dọ Jehovah jlo na gọalọna we nado wà nudopolọ.