Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 10

Whẹndo Jesu Tọn Zingbejizọnlin Yì Jelusalẹm

Whẹndo Jesu Tọn Zingbejizọnlin Yì Jelusalẹm

LUKU 2:40-52

  • JESU OWHE WIAWE MẸVI TO HOKANSE MẸPLỌNTỌ LẸ

  • JESU YLỌ JEHOVAH DỌ “OTỌ́ ṢIE”

Ojlẹ amakikọ tọn wẹ. Enẹwutu, ojlẹ sọ̀ na whẹndo Josẹfu tọn to pọmẹ hẹ họntọn po hẹnnumẹ yetọn lẹ po nado zingbejizọnlin whemẹwhemẹ tọn yetọn yì Jelusalẹm. Yé nọ yì dọ́n nado basi hùnwhẹ Juwayi tọn, dile Osẹ́n lọ degbe etọn do. (Deutelonomi 16:16) Gbejizọnlin zinzin sọn Nazalẹti yì Jelusalẹm nọ dẹn na nudi kilomẹtlu 120. Ojlẹ awuwiwle po ayajẹ daho po tọn wẹ e nọ yin na mẹlẹpo. Jesu he ko tindo owhe 12 todin to nukundo hùnwhẹ lọ po jejejininọ po, podọ dotẹnmẹ hundote lọ nado tin to lẹdo tẹmpli lọ tọn mẹ whladopo dogọ.

Na Jesu po whẹndo etọn po, hùnwhẹ Juwayi tọn ma yin nuwiwa azán dopo tọn de poun gba. Azán he bọdo Juwayi lọ go wẹ bẹjẹeji hùnwhẹ akla madotọ́n lẹ tọn he nọ dẹn na azán ṣinawe. (Malku 14:1) E nọ yin pinpọnhlan taidi apadewhe nuwiwa ojlẹ Juwayi tọn lẹ tọn. E sọgan biọ nudi osẹ awe nado zingbejizọnlin sọn owhé yetọn gbè to Nazalẹti sọyi Jelusalẹm bo nọ dọ́n podọ nado lẹkọwa. Ṣigba to owhe ehe mẹ, ojlẹ he yé basi lọ dẹn vude humọ, na nujijọ madonukun de he gando Jesu go wutu. Nuhahun lọ wá họnwun na yé to whenue yé lẹkọ sọn Jelusalẹm jei whégbè.

To gbejizọnlin lọ whenu, Josẹfu po Malia po lẹndọ Jesu tin to pipli họntọn po hẹnnumẹ lẹ po tọn he to gbejizọnlinzin hẹ yé pànta agewaji lọ mẹ. Ṣigba, to whenue yé nọte nado gbọjẹ to zánmẹ, yé ma mọ ẹn. Enẹwutu, yé dín in to hagbẹ yetọn lẹ ṣẹnṣẹn, ṣigba yé ma mọ ẹn. Visunnu yetọn bu! Enẹgodo, Josẹfu po Malia po lẹkọyi Jelusalẹm nado yì dín in.

Yé dín in na azán dopo blebu, ṣigba yé ma mọ ẹn. To azán awetọ gbè lọsu, yé ma mọ ẹn. To godo mẹ, to azán atọ̀ntọ gbè, yé wá mọ ovi yetọn to tẹmpli mẹ, yèdọ to tẹmpli daho he tindo ohọ̀ susu enẹ mẹ. Yé mọ Jesu to aisinsin to mẹplọntọ Ju delẹ ṣẹnṣẹn. E to todoaina yé bo to hokanse yé, podọ nukunnumọjẹnumẹ etọn nọ jiawu na yé.

Malia kanse e dọmọ: “Ovi, naegbọn hiẹ yinuwa hẹ mí dole? Yẹn po otọ́ towe po ko yí ayimajai daho do to dindin we pé.”—Luku 2:48.

E paṣa Jesu dọ yé ma yọ́n fie ewọ na ko tin te. E dọna yé dọmọ: “Naegbọn mìwlẹ do to dindin mi pé? Be mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ?”—Luku 2:49.

Todin he yé ko mọ ẹn, Jesu lẹkọyi whé to Nazalẹti to pọmẹ hẹ Josẹfu po Malia po, bosọ to mẹmẹglọ yin hlan yé zọnmii. E to whinwhẹ́n deji to nuyọnẹn mẹ podọ to agbasa mẹ. Mahopọnna dọ e gbẹ́ yin jọja, e tindo nukundagbe Jiwheyẹwhe tọn po gbẹtọ lẹ tọn po. Mọwẹ, sọn ovu whenu etọn gbọ́n wẹ Jesu ko ze apajlẹ dagbe dai, e ma yin gando onú gbigbọmẹ tọn lẹ dindin kẹdẹ go gba, ṣigba gando sisi didohia mẹjitọ etọn lẹ go ga.

Plọnnu Dogọ

ATỌ̀HỌ̀-NUHIHỌ́ LỌ TỌN

Jesu Plọn Nado Nọ Setonu

Na Jesu yin gbẹtọ pipe de wutu, naegbọn e do plọn tonusise?