Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 6

Visunnu Dopagbe Lọ

Visunnu Dopagbe Lọ

LUKU 2:21-39

  • JESU YIN ADÀGBONA BO YIN HINHẸNWA TẸMPLI MẸ TO GODO MẸ

Kakati Josẹfu po Malia po ni lẹkọyi Nazalẹti, yé gbọṣi Bẹtlẹhẹm. To gbeegbe Jesu tindo azán ṣinatọ̀n, yé gboadà na ẹn sọgbe hẹ Osẹ́n he Jiwheyẹwhe na Islaeli. (Levitiku 12:2, 3) Podọ sọgbe hẹ aṣa Islaelivi lẹ tọn, azán enẹ gbè wẹ yè nọ do yinkọ na visunnu de te. Enẹwutu, yé do Jesu na visunnu yetọn, dile angẹli Gabliẹli ko degbena yé do.

Hugan osun dopo godo, Jesu wá tindo azán 40. Todin, fie wẹ mẹjitọ etọn lẹ ze e sọyi? Yé ze e sọyi tẹmpli mẹ to Jelusalẹm, yèdọ fihe ma dẹn sọmọ do fihe yé nọ nọ̀. Osẹ́n lọ dọ dọ eyin yọnnu de ji visunnu de, to azán 40 godo, e dona na avọ́nunina lẹ̀wé tọn de to tẹmpli mẹ.—Levitiku 12:4-7.

Nuhe Malia wà niyẹn. Ohẹ̀ flinflin awe wẹ ewọ na taidi avọ́nunina. Ehe do ninọmẹ akuẹzinzan tọn Malia po Josẹfu po tọn hia mí. Sọgbe hẹ Osẹ́n lọ, agbò winyanwinyan dopo po ohẹ̀ dopo po wẹ dona yin nina. Ṣigba, eyin onọ̀ lọ ma sọgan na agbò de, awhànnẹvu awe kavi owhlé awe ko pé. Ninọmẹ Malia tọn niyẹn, podọ nuhe ewọ na niyẹn.

To tẹmpli lọ mẹ, dawe mẹhomẹ de dọnsẹpọ Josẹfu po Malia po. Oyín etọn wẹ Simeoni. Jiwheyẹwhe ko dehia ẹ dọ whẹpo e nado kú, e na mọ Klisti he Jehovah dopagbe etọn, kavi Mẹsia lọ. To azán lọ gbè, gbigbọ wiwe deanana Simeoni wá tẹmpli mẹ, bọ e mọ Josẹfu po Malia po gọna viyẹyẹ yetọn. Simeoni ze ovi lọ do alọmẹ.

Dile Jesu tin to alọ Simeoni tọn mẹ, ewọ dopẹna Jiwheyẹwhe dọmọ: “Todin, Oklunọ Nupojipetọ, hiẹ to didike afanumẹ towe ni yì gbọjẹ to jijọho mẹ sọgbe hẹ ohó towe na nukun ṣie lẹ ko mọ aliho mẹwhlẹngán tọn towe he hiẹ ko wleawuna to gbẹtọ lẹpo nukọn, hinhọ́n de nado de nukunmẹṣinyọnnu sẹ̀ sọn nukun akọta lẹ tọn mẹ podọ gigo de na Islaeli omẹ towe lẹ.”—Luku 2:29-32.

E paṣa Josẹfu po Malia po taun nado sè ehe. Simeoni dona yé bo dọna Malia dọ ovi etọn “wẹ yin dide na aijijẹ po finfọn mẹsusu tọn po to Islaeli,” podọ taidi ohí didá de, awubla na sọ́ alindọn Malia tọn luntọ́n.—Luku 2:34.

Mẹdevo sọ tin to finẹ to azán lọ gbè. Anna wẹ, yèdọ yẹwhegán-yọnnu de he tindo owhe 84. Na nugbo tọn, e ma nọ gọ̀n tẹmpli mẹ gbede. To ojlẹ enẹ dopolọ mẹ, e dọnsẹpọ Josẹfu po Malia po gọna viyẹyẹ yetọn Jesu. Anna jẹ pẹdona Jiwheyẹwhe ji bosọ to ohó Jesu tọn dọna mẹhe dotoaina ẹn lẹpo.

Pọ́n lehe nujijọ he wá aimẹ to tẹmpli mẹ ehelẹ na ko hẹn Josẹfu po Malia po jaya do sọ! Matin ayihaawe, onú ehe lẹpo hẹn yé kudeji dọ ovi yetọn wẹ Mẹhe Jiwheyẹwhe Dopagbe etọn lọ.