Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 11

Johanu Baptizitọ lọ Jla Aliho lọ Do

Johanu Baptizitọ lọ Jla Aliho lọ Do

MATIU 3:1-12 MALKU 1:1-8 LUKU 3:1-18 JOHANU 1:6-8, 15-28

  • JOHANU TO YẸWHEHODỌ BOSỌ TO GBẸTỌ LẸ BAPTIZI

  • MẸSUSU YIN BIBAPTIZI, ṢIGBA E MA YIN MẸLẸPO

Nudi owhe 17 ko juwayi sọn whenue Jesu he tindo owhe 12 kanhose mẹplọntọ lẹ to tẹmpli mẹ. Todin, ojlẹ amakikọ tọn wẹ to owhe 29 W.M. Mẹsusu to hodọ gando Johanu go, yèdọ hẹnnumẹ Jesu tọn de he to yẹwhehodọ to lẹdo he tin to whèzẹtẹn-waji Tọ̀sisa Jọdani tọn lẹpo mẹ.

Johanu yin dawe ayidego tọn de to awusọhia po hodidọ po mẹ. Avọ̀ etọn yin bibasi po ofún kanklosọ́ tọn po, podọ e nọ blá gbànnú ayú tọn de do alinkàn. E nọ dù owẹ̀n lẹ, yèdọ owẹ̀n wunmẹ de po owín akú po. Owẹ̀n tẹ lá wẹ e te? “Mì lẹnvọjọ, na Ahọluduta olọn tọn ko dọnsẹpọ.”—Matiu 3:2.

Owẹ̀n Johanu tọn dozolanmẹna mẹhe wá nado dotoaina ẹn lẹ. Mẹsusu wá mọdọ yé dona lẹnvọjọ, yèdọ nado diọ pọndohlan po walọ yetọn lẹ po bo gbẹ́ gbẹzan yetọn hoho dai taidi nuhe ma sọgbe. “Mẹhe tin to Jelusalẹm podọ to Jude lẹpo gọna otò he lẹdo Jọdani pé lẹpo” wẹ wá e dè. (Matiu 3:5) Susu mẹhe wá Johanu dè lẹ tọn wẹ lẹnvọjọ nugbonugbo. E baptizi yé gbọn yinylọ́n yé do osin Jọdani tọn lẹ mẹ dali. Etẹwutu?

Baptẹm he e basi na gbẹtọ lẹ yin ohia de, kavi dohia dọ yé lẹnvọjọ nugbonugbo sọn ylando he yé wà sọta alẹnu Osẹ́n tọn Jiwheyẹwhe tọn mẹ. (Owalọ lẹ 19:4) Ṣigba, mẹlẹpo ma pegan na baptẹm lọ. To whenue sinsẹ̀ngán delẹ, yèdọ Falesi lẹ po Sadusi lẹ po wá Johanu dè, e ylọ yé dọ “ovi amàpoe tọn lẹ.” E dọmọ: “Mì de sinsẹ́n he jẹna lẹnvọjọ tọ́n. Mì lẹn to mìde homẹ dọ, ‘Míwlẹ tindo Ablaham taidi otọ́’ blo. Na yẹn dọna mì dọ Jiwheyẹwhe penugo nado de ovi lẹ tọ́n na Ablaham sọn zannu ehelẹ mẹ. Asiọvi lọ ko tin to adọ̀ atin lẹ tọn go. Enẹwutu, atin depope he ma sẹ́n sinsẹ́n dagbe na yin sinsánsẹ bo yin dindlan do miyọ́n mẹ.”—Matiu 3:7-10.

Na Johanu to owẹ̀n huhlọnnọ de lá, to ayidonugo mẹsusu tọn dọ̀n bosọ to mẹsusu baptizi wutu, yẹwhenọ lẹ po Levinu lẹ po yin didohlan nado kanse e dọmọ: “Mẹnu wẹ hiẹ?”

Johanu yigbe dọmọ: “E ma yin yẹn wẹ Klisti lọ.”

Yé kanbiọ e dọmọ: “Mẹnu wẹ hiẹ yin lo? Be hiẹ wẹ Elija ya?”

E gblọnna yé dọmọ: “Yẹn ma wẹ.”

Yé sọ kanse e dọ “Be hiẹ wẹ Yẹwhegán Lọ ya?” enẹ wẹ Yẹwhegán daho he Mose dọ e na wá lọ.—Deutelonomi 18:15, 18.

Johanu sọ gblọn dọ: “Lala!”

Yé tẹkudeji dọmọ: “Mẹnu wẹ hiẹ? Dọna mí, na mí nido sọgan yì dọna mẹhe do mí hlan lẹ. Etẹwẹ hiẹ dọ gando dewe go?” Johanu dọmọ: “Yẹn wẹ omẹ lọ he to awhádo jẹgbonu to danfafa ji dọ, ‘Mì jlọ omọ́ji Jehovah tọn,’ kẹdẹdile yẹwhegán Isaia dọ do.”—Johanu 1:19-23.

Yé zindonukọn dọmọ: “To whelọnu lo, naegbọn hiẹ do to omẹ lẹ baptizi eyin hiẹ lọsu ma yin Klisti kavi Elija kavi Yẹwhegán Lọ?” E na yé gblọndo dagbe de dọmọ: “Yẹn yí osin do baptizi. Mẹde to ote to ṣẹnṣẹn mìtọn he mìwlẹ ma yọnẹn, mẹhe ja to godo ṣie.”—Johanu 1:25-27.

Mọwẹ, Johanu yigbe dọ aliho lọ jlado wẹ emi te bo to alọgọna gbẹtọ lẹ nado wleawuna ninọmẹ ahun mẹ tọn he jẹ nado kẹalọyi Mẹsia dopagbe lọ, yèdọ mẹhe na wá lẹzun Ahọlu lọ. Johanu dọ gando e go dọmọ: “Ewọ he ja to godo ṣie dohuhlọn hú mi, afọpa mẹhe tọn yẹn ma jẹ nado de.” (Matiu 3:11) Na nugbo tọn, Johanu tlẹ dọmọ: “Omẹ lọ he ja to godo ṣie ko jẹnukọnna mi, na ewọ ko tin jẹnukọnna mi wutu.”—Johanu 1:15.

Enẹwutu, owẹ̀n Johanu tọn wá do gànmẹ nugbonugbo dọmọ: “Mì lẹnvọjọ, na Ahọluduta olọn tọn ko dọnsẹpọ.” (Matiu 3:2) Owẹ̀n enẹ dohia mẹlẹpo dọ lizọnyizọn Ahọlu Jehovah tọn he ja lọ, yèdọ Jesu Klisti tọn na bẹjẹeji to madẹnmẹ.