Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 2

Jesu Yin Gbégbòna Jẹnukọnna Jiji Etọn

Jesu Yin Gbégbòna Jẹnukọnna Jiji Etọn

LUKU 1:34-56

  • MALIA YÌ DLA HẸNNUMẸ ETỌN ELIZABẸTI PỌ́N

To whenue angẹli Gabliẹli ko dọna awhli he nọ yin Malia dọ e na ji visunnu de he na yin yiylọdọ Jesu bọ e na yin Ahọlu kakadoi godo, Malia kanse e dọmọ: “Nawẹ ehe na jọ gbọn, to whenue yẹn ma ko tindo kọndopọ zanhẹmẹ tọn hẹ sunnu de?”—Luku 1:34.

Gabliẹli gblọnna ẹn dọmọ: “Gbigbọ wiwe na wá hiẹ ji, bọ huhlọn Gigogán lọ tọn na ṣinyọnyẹ ji we. Podọ na enẹ tọn wutu, ovi he yin jiji lọ na yin yiylọdọ wiwe, Visunnu Jiwheyẹwhe tọn.”—Luku 1:35.

Vlavo nado gọalọna Malia nado kẹalọyi owẹ̀n etọn, Gabliẹli yidogọ dọmọ: “Pọ́n! Elizabẹti hẹnnumẹ towe lọsu ko mọhò visunnu de tọn, to yọnhowhe etọn mẹ, podọ osun ṣidopotọ etọn die, yèdọ ewọ he nọ yin yiylọdọ wẹnsinọ lọ, na to Jiwheyẹwhe dè, nuhe ko yin didọ depope ma na gọ̀n ma yin hinhẹndi.”—Luku 1:36, 37.

Dile mí sọgan mọ to gblọndo Malia tọn mẹ do, e kẹalọyi nuhe Gabliẹli dọna ẹn lẹ. E dọmọ: “Pọ́n! Afanumẹ yọnnu Jehovah tọn! Na e ni jọ domọ na mi kẹdẹdi ohó towe.”—Luku 1:38.

Tlolo he angẹli lọ tlọ́n e dè, Malia wleawu nado yì Elizabẹti dè to lẹdo pópló Jude tọn lẹ mẹ sẹpọ Jelusalẹm, to fie Elizabẹti po asu etọn Zekalia po nọ nọ̀. Sọn Nazalẹti fie Malia nọ nọ̀ jẹ Elizabẹti dè, e sọgan biọ dọ yè ni zingbejizọnlin na azán atọ̀n kavi ẹnẹ.

Gbejizọnlin lọ dẹn, ṣigba Malia wá jẹ owhé Zekalia tọn gbè. To whenue e biọ owhé lọ gbè, e dọnudo hẹnnumẹ etọn Elizabẹti. To whenẹnu, Elizabẹti gọ́ na gbigbọ wiwe bo dọna Malia dọmọ: “Donanọ wẹ hiẹ to yọnnu lẹ ṣẹnṣẹn, podọ donanọ wẹ sinsẹ́n adọ̀ towe mẹ tọn! Enẹwutu, naegbọn lẹblanulọkẹyi ehe do yin nina mi, bọ onọ̀ Oklunọ ṣie tọn nado wá dè e? Na, pọ́n! dile nudọdomẹ towe jẹ otó ṣie lẹ mẹ, viyẹyẹ he to ohò ṣie mẹ whàngo na homẹhunhun daho wutu.”—Luku 1:42-44.

Po pinpẹn-nutọn-yinyọnẹn sisosiso po, Malia gblọn dọmọ: “Alindọn ṣie pagigona Jehovah, podọ gbigbọ ṣie ma sọgan nọma gọ́ na ayajẹ susu hlan Jiwheyẹwhe Mẹwhlẹngántọ ṣie na e ko mọ ninọmẹ he yìdo afanumẹ yọnnu etọn tọn. Na, pọ́n! bẹsọn din sọyi, whẹndo lẹpo na nọ ylọ mi dọ ayajẹnọ na Omẹ huhlọnnọ lọ ko wà azọ́n daho lẹ na mi.” Dile mí sọgan doayi e go do, Malia gbògbéna Jiwheyẹwhe mlẹnmlẹn mahopọnna nukundagbe he yin didohia ẹ. E dọmọ: “Wiwe wẹ oyín etọn, lẹblanu etọn nasọ tin to mẹhe dibusi i lẹ ji sọn whẹndo de mẹ jẹ whẹndo devo mẹ.”—Luku 1:46-50.

Podọ, Malia zindonukọn nado pà Jiwheyẹwhe po hogbe dọdai tọn he yin gbigbọdo ehelẹ po dọmọ: “E ko yí awà etọn lẹ do wà azọ́n huhlọnnọ lẹ; mẹhe yin saklanọ to linlẹn ahun yetọn lẹ tọn mẹ wẹ e ko vúnvún pé. E ko de sunnu he tin to ogántẹn mẹ lẹ sọn ofìn ji bo ko ze whiwhẹnọ lẹ daga; e ko yí onú dagbe lẹ do pekọna mẹhe huvẹ to hùhù lẹ, podọ e ko do mẹhe yin adọkunnọ lẹ hlan agbá. E ko gọalọna Islaeli devizọnwatọ etọn nado flin lẹblanu, kẹdẹdile e ko dọna tọgbo mítọn lẹ do, yèdọ hlan Ablaham po okún etọn po kakadoi.”—Luku 1:51-55.

Malia nọ Elizabẹti dè na nudi osun atọ̀n. E na ko wàmọ nado gọalọna ẹn, na osẹ delẹ poun wẹ pò bọ e na jivi. Lehe e yọ́n do sọ dọ yọnnu nugbonọ awe he mọhò gbọn alọgọ Jiwheyẹwhe tọn gblamẹ enẹlẹ ni nọpọ́ to ojlẹ vonọtaun gbẹzan yetọn tọn enẹ mẹ!

Gbọnvona enẹ, doayi gbégbò he yin nina Jesu whẹpo e tlẹ do yin jiji go. To whenue Malia wá Elizabẹti dè tlolo, e ylọ viyẹyẹ he to ohò Malia tọn mẹ dọ “Oklunọ ṣie,” podọ viyẹyẹ he to homẹ na ewọ lọsu “whàngo na homẹhunhun daho wutu.” Ṣigba, dile mí na mọ do to nukọn mẹ, aliho devo pete mẹ wẹ mẹdelẹ na yinuwa hẹ Malia po ovi he to ohò etọn mẹ lọ po te.