Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 1

Owẹ̀n Awe Delẹ He Wá sọn Jiwheyẹwhe Dè

Owẹ̀n Awe Delẹ He Wá sọn Jiwheyẹwhe Dè

LUKU 1:5-33

  • ANGẸLI GABLIẸLI DỌ DỌDAI DỌ JOHANU BAPTIZITỌ NA YIN JIJI

  • GABLIẸLI DỌHONA MALIA GANDO JIJI JESU TỌN GO

Na nugbo tọn, mí sọgan nọ pọ́n Biblu lọ blebu hlan taidi owẹ̀n de sọn Jiwheyẹwhe dè. Otọ́ mítọn olọn mẹ tọn wẹ wleawuna ẹn nado plọnnu mí. Ṣigba, mí na lẹnnupọndo owẹ̀n titengbe awe delẹ he e bẹhẹn ji, ehe yin dido to nuhe hú owhe 2 000 die wayi. Yé yin dido gbọn angẹli Gabliẹli dali, mẹhe “nọ nọte to Jiwheyẹwhe nukọn.” (Luku 1:19) Ninọmẹ tẹlẹ mẹ wẹ angẹli lọ do owẹ̀n titengbe enẹlẹ te?

Owẹ̀n enẹlẹ yin dido to nudi owhe 3 J.W.M. Fie wẹ Gabliẹli do owẹ̀n tintan lọ te? To lẹdo pópló Jude tọn lẹ mẹ, vlavo sẹpọ Jelusalẹm, fie yẹwhenọ Jehovah tọn de he nọ yin Zekalia nọ nọ̀. Ewọ po asi etọn Elizabẹti po ko whẹ́n mẹho, ṣigba yé ma tindo ovi. Ojlẹ wá sọ̀ na Zekalia nado yì wadevizọn taidi yẹwhenọ to tẹmpli Jiwheyẹwhe tọn mẹ to Jelusalẹm. To whenue e tin to tẹmpli mẹ, Gabliẹli sọawuhia ẹ to ajiji mẹ sẹpọ agbà nuyọnwan tọn lọ kọ̀n.

E sọgbe dọ obu ni jẹ Zekalia ji. Ṣigba, angẹli lọ dotuhomẹna ẹn dọmọ: “A dibu blo, Zekalia, na Jiwheyẹwhe ko sè ovẹ̀ towe, podọ asi towe Elizabẹti na ji visunnu de na we, hiẹ nasọ ylọ oyín etọn dọ Johanu.” Gabliẹli yidogọ dọ Johanu “na klo to Jehovah nukọn” bo nasọ “wleawu mẹhe jẹ lẹ tọn dai na Jehovah.”—Luku 1:13-17.

Na Zekalia, enẹ taidi nuhe ma yọnbasi. Etẹwutu? Na owhe ewọ po asi etọn po tọn ko sẹyì taun wutu. Ṣigba, Gabliẹli dọna ẹn dọmọ: “Hiẹ na lẹzun unbọpẹnnọ bo ma na penugo nado dọho kakajẹ azán he gbè onú ehelẹ na jọ, na hiẹ ma yí ohó ṣie . . . sè wutu.”—Luku 1:20.

To ojlẹ enẹ mẹ, gbẹtọ he to kọho lẹ to nuhà gando nuhewutu Zekalia do to gbàndọn sọmọ to fiwiwe lọ mẹ go. To godo mẹ, e tọ́njẹgbonu, ṣigba e ma sọgan dọho. Alọ lẹ kẹdẹ wẹ Zekalia sọgan yizan nado basi ohia lẹ na yé. E họnwun dọ e mọ numimọ jiawu de to whenue e to tẹmpli lọ mẹ.

To whenue Zekalia ko dotana sinsẹ̀nzọn etọn to tẹmpli mẹ godo, e lẹkọyi whégbè. To ojlẹ kleun de godo, Elizabẹti mọhò! Dile ohò lọ to whinwhẹ́n, Elizabẹti nọ whégbè na osun atọ́n nado whlá ede.

Enẹgodo, Gabliẹli sọ sọawuhia whla awetọ. Hlan mẹnu? Hlan awhli de he nọ yin Malia, mẹhe nọ nọ̀ Galili to tòdaho Nazalẹti tọn mẹ, to agewaji Jelusalẹm tọn. Etẹwẹ angẹli lọ dọna ẹn? E dọna ẹn dọmọ: “Jiwheyẹwhe ko do nukundagbe hia we.” E yidogọ dọmọ: “Pọ́n! hiẹ na mọhò bo ji visunnu de, hiẹ nasọ ylọ oyín etọn dọ Jesu. Ewọ na klo bo na yin yiylọdọ Visunnu Gigogán lọ tọn, . . . ewọ nasọ duahọlu do owhé Jakọbu tọn ji kakadoi, podọ Ahọluduta etọn ma na wá opodo.”—Luku 1:30-33.

Pọ́n lehe Gabliẹli na ko yọ́n pinpẹn lẹblanulọkẹyi he e tindo nado do owẹ̀n awe enẹlẹ tọn do sọ! Nuhewutu owẹ̀n enẹlẹ he wá sọn olọn mẹ do yin onú titengbe na wá họnwun na mí dile mí na to nuplọn dogọ gando Johanu po Jesu po go.