Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 86

Visunnu He Ko Bu lọ Lẹkọwa

Visunnu He Ko Bu lọ Lẹkọwa

LUKU 15:11-32

  • APAJLẸ VISUNNU HE BU LỌ TỌN

Whenue Jesu na apajlẹ lẹngbọ he bu lọ po abọgan-kuẹ dlakma he bu lọ po tọn, Pelea wẹ e na ko gbẹ́ pò te to whèzẹtẹn-waji Tọ̀sisa Jọdani tọn. Apajlẹ awe ehelẹ plọn mí dọ mí dona nọ jaya eyin ylandonọ de lẹnvọjọ bo lẹkọ do Jiwheyẹwhe dè. Falesi lẹ po wekantọ lẹ po ko mọhodọdo Jesu go, na e nọ kẹalọyi omẹ mọnkọtọn lẹ wutu. Ṣigba, be homọdọdomẹgotọ ehelẹ plọnnu sọn apajlẹ Jesu tọn awe enẹlẹ mẹ ya? Be yé mọnukunnujẹ numọtolanmẹ he Otọ́ olọn mẹ tọn mítọn nọ tindo na ylandonọ he lẹnvọjọ lẹ mẹ ya? Todin, Jesu na apajlẹ he whànmẹ de he zinnudo nuplọnmẹ titengbe enẹ dopolọ ji.

Apajlẹ lọ gando otọ́ de he tindo visunnu awe go, podọ visunnu pẹvi lọ ji wẹ apajlẹ lọ sinai do. Falesi lẹ po wekantọ lẹ po, gọna mẹdevo he to ohó Jesu tọn sè lẹ sọgan ko penugo nado plọnnu sọn nuhe e dọ gando visunnu pẹvi ehe go mẹ. Etomọṣo, mí ma dona yí nukun pẹvi do pọ́n nuhe Jesu dọ gando otọ́ lọ po visunnu mẹho lọ po go, na nuyiwa yelọsu tọn lẹ plọnnumẹ ga. Enẹwutu, lẹnnupọndo sunnu atọ̀n ehe lẹpo ji dile Jesu to apajlẹ lọ na.

Jesu bẹjẹeji dọmọ: “Dawe de tindo visunnu awe. Mẹhe yin yọpọ to yé mẹ lọ sọ dọna otọ́ etọn dọ, ‘Otọ́, na mi dehe yin adà ṣie to nutindo lọ lẹ mẹ.’ To whenẹnu, e má nutindo etọn lẹ na yé.” (Luku 15:11, 12) Doayi e go dọ visunnu pẹvi lọ ma to ogú etọn biọ, na otọ́ etọn ko kú wutu wẹ gba. Otọ́ lọ gbẹ́ pò togbẹ̀. Ṣogan, visunnu lọ jlo na mọ adà etọn yí todin, na e nido sọgan jẹ ede si bo yí ogú etọn zan dile e jlo do. Etẹwẹ e ka jlo na yí i do wà?

Jesu basi zẹẹmẹ dọ, “to azán vude godo, visunnu pẹvi lọ bẹ nulẹpo pli bo zingbejizọnlin yì otò dindẹn de mẹ, podọ finẹ wẹ e zan nutindo etọn lẹ do apà mẹ te gbọn gbẹzan he gblezọn de zinzan dali.” (Luku 15:13) Kakati nado gbọṣi hihọ́ glọ to whégbè to otọ́ etọn he yin mẹtọnhopọntọ bosọ nọ penukundo ovi etọn lẹ go ganji dè, visunnu ehe yì otò devo mẹ. To finẹ, e zan ogú etọn lẹpo do apà mẹ bo zan gbẹzan gblewa tọn. To nukọn mẹ, e wá biọ nuhahun mẹ, dile Jesu zindonukọn do dọmọ:

“To whenue e ko zan nulẹpo vọ̀, huvẹ sinsinyẹn de tọ́n to otò lọ pete mẹ, e sọ biọ nuhudo mẹ. E tlẹ yì bo jẹ kọ̀ji na dopo to tòvi otò enẹ tọn lẹ mẹ, bọ ewọ do e hlan ogle etọn mẹ nado penukundo ohàn lẹ go. E sọ nọ jlo nado dù núdùdù he ohàn lẹ nọ dù gọ́ho, podọ mẹdepope ma nọ na ẹn nudepope.”—Luku 15:14-16.

Sọgbe hẹ Osẹ́n Jiwheyẹwhe tọn, kanlin mawé de wẹ ohàn yin, ṣogan visunnu ehe wá tin to dandannu glọ nado wazọ́n taidi ohàn-yìntọ. Huvẹ blá ẹ sọmọ bọ e jlo nado dù núdùdù kanlin lẹ tọn, yèdọ núdùdù ohàn he go e to nukunpedo lẹ tọn. To nuhahun po flumẹjijẹ visunnu lọ tọn lẹ po mẹ, “e gọ̀ biọ ede mẹ.” Etẹwẹ e wà? E dọna ede dọ: “Nẹmunẹmu wẹ pakanọ otọ́ ṣie tọn lẹ he tindo núdùdù susugege, bọ yẹn to kúkú na huvẹ tofi! Yẹn na fọ́n bo zingbejizọnlin yì otọ́ ṣie dè bo dọna ẹn dọmọ: ‘Otọ́, yẹn ko waylando do Jiwheyẹwhe to olọn podọ do hiẹ. Yẹn masọ jẹ nado yin yiylọdọ visunnu towe ba. Yí mi do basi dopo to pakanọ towe lẹ mẹ.’” To whenẹnu, e fọ́n bo yì otọ́ etọn dè.—Luku 15:17-20.

Nawẹ otọ́ etọn na yinuwa gbọn? Be ewọ na bẹ adán do visunnu etọn ji bo wọhẹ ẹ na nulunu he e wà wayi bo de nado tọ́n sọn whégbè wẹ ya? Be otọ́ lọ na dovọ́na ẹn bo yí i to aliho mọmọ tọn mẹ wẹ ya? Eyin towe wẹ, nawẹ a na ko yinuwa gbọn? Eyin visunnu towe kavi viyọnnu towe wẹ lo, etẹwẹ a na wà?

 VISUNNU HE BU LỌ YIN MIMỌ

Jesu do numọtolanmẹ otọ́ lọ tọn po lehe e yinuwa do po hia dọmọ: “Dile [visunnu lọ] gbẹ́ pò to olá, otọ́ etọn mọ ẹn bọ lẹblanu whàn ẹn, e sọ họ̀nwezun bo gbò e fán bosọ donùnùgo na ẹn.” (Luku 15:20) Otọ́ lọ sọgan ko sè dọ visunnu etọn zan gbẹzan he gblezọn, ṣogan e yí i do whégbè. Be apajlẹ ehe na gọalọna nukọntọ Ju lẹ tọn he nọ sọalọakọ́n dọ emi yọ́n Jehovah bo nọ sẹ̀n ẹn lẹ nado doayi lehe Otọ́ olọn mẹ tọn mítọn nọ yinuwa hẹ ylandonọ he lẹnvọjọ lẹ do go ya? Podọ be yé na mọnukunnujẹemẹ dọ gbigbọ dopolọ wẹ nọ whàn Jesu nado kẹalọyi gbẹtọ lẹ ya?

Otọ́ lọ na ko gbọn wuntuntun dali mọ to visunnu etọn he blawu bo kúṣiọ sin nukunmẹ dọ e ko lẹnvọjọ. Ṣogan, afọdide owanyinọ he otọ́ lọ ze nado yì pé e hẹn ẹn bọawuna visunnu lọ nado yigbe ylando etọn lẹ tọn. Jesu dọmọ: “To whenẹnu, visunnu lọ dọna ẹn dọ, ‘Otọ́, yẹn ko waylando do Jiwheyẹwhe to olọn podọ do hiẹ. Yẹn masọ jẹ nado yin yiylọdọ visunnu towe ba.’”—Luku 15:21.

Otọ́ lọ degbena afanumẹ etọn lẹ dọmọ: “Mì yawu! bo hẹn tewu de wá, yèdọ dehe yọ́n hugan, bo do na ẹn, bosọ do alọkẹ de do alọ na ẹn podọ afọpa do afọ na ẹn. Podọ mì hẹn oyìnsú winyanwinyan he dojó de wá, bo hù i bosọ gbọ mí ni dù bo jaya, na visunnu ṣie ehe ko kú bo gọwá ogbẹ̀ whladopo dogọ; e ko bu bosọ yin mimọ.” Podọ “yé sọ jẹ ayajẹ ji.”—Luku 15:22-24.

To ojlẹ enẹ mẹ, visunnu mẹho lọ to glemẹ. Jesu dọ gandego dọmọ: “Dile e ja bo sẹpọ whégbè, e sè ogbè nuhiho po wedudu po tọn. Enẹwutu, e ylọ dopo to devizọnwatọ lẹ mẹ wá ede dè bo kàn nuhe to jijọ biọ. Ewọ dọna ẹn dọ, ‘Nọvisunnu towe ko wá, bọ otọ́ towe hù oyìnsú winyanwinyan he dojó, na e mọ ẹn to agbasalilo mẹ wutu.’ Ṣigba, ewọ gblehomẹ bo ma jlo na biọ whégbè. To whenẹnu, otọ́ etọn tọ́n wá bo jẹ vivẹ̀ ẹ ji. Ewọ gblọnna otọ́ etọn dọ, ‘Sọn owhe susu die gbọ́n wẹ yẹn ko to sinsẹ̀n we bo ma tùnafọ anademẹ towe ji pọ́n gbede, ṣogan  hiẹ ma na mi gbọgbọẹvu dopo nado jaya hẹ họntọn ṣie lẹ pọ́n gbede. Ṣigba, tlolo he visunnu towe ehe, he zan nutindo towe lẹ do apà mẹ hẹ galọtọ lẹ wá, hiẹ hù oyìnsú winyanwinyan he dojó na ẹn.’”—Luku 15:25-30.

Taidi visunnu mẹho lọ, mẹnu lẹ wẹ mọhodọdo lẹblanu po ayidonugo po he Jesu na gbẹtọ paa lẹ po ylandonọ lẹ po go wayi? Wekantọ lẹ po Falesi lẹ po wẹ. Jesu na apajlẹ ehe, na yé nọ mọhodọdo ewọ go dọ e nọ kẹalọyi ylandonọ lẹ wutu. Na nugbo tọn, mẹhe nọ mọhodọdo lẹblanu Jiwheyẹwhe tọn go lẹpo wẹ dona lẹnayihamẹpọn do nuplọnmẹ ehe ji.

Nado dotana apajlẹ etọn, Jesu do lehe otọ́ lọ vẹ̀ visunnu mẹho etọn do hia dọmọ: “Ovi, whepoponu wẹ hiẹ tin hẹ mi, podọ towe wẹ nuhe yin ṣie lẹpo, ṣigba e jẹ dọ mí ni jaya bo hùnhomẹ, na nọvisunnu towe ko kú bo gọwá ogbẹ̀, podọ ewọ ko bu bosọ yin mimọ.”—Luku 15:31, 32.

Jesu ma dọ nuhe visunnu mẹho lọ wà to godo mẹ. Ṣigba, to okú po fọnsọnku Jesu tọn po godo, “yẹwhenọ susu sọ lẹzun yisenọ.” (Owalọ lẹ 6:7) Mẹhe dotó Jesu tlọlọ to whenue e to apajlẹ huhlọnnọ ehe na gando visunnu he ko bu lọ go delẹ sọgan ko tin to omẹ ehelẹ mẹ. Mọwẹ, e tlẹ yọnbasi na yewlẹ lọsu nado gọ̀ biọ yede mẹ bo lẹnvọjọ bosọ lẹkọ do Jiwheyẹwhe dè.

Bẹsọn gbenẹgbe, devi Jesu tọn lẹ sọgan nọ lẹnayihamẹpọn do nuplọnmẹ titengbe he apajlẹ dagbe ehe bẹhẹn lẹ ji, podọ yé dona nọ wàmọ. Nuplọnmẹ tintan wẹ yindọ, nuyọnẹnnu wẹ e yin nado gbọṣi hihọ́ glọ to omẹ Jiwheyẹwhe tọn lẹ ṣẹnṣẹn, to nukunpedomẹgo Otọ́ mítọn he yiwanna mí bosọ nọ wleawu nulẹ tọn na mí tọn glọ, kakati nado to fuflupé to ojlo gblezọn lẹ godo to “otò dindẹn” yẹhiadonu tọn de mẹ.

Nuplọnmẹ devo wẹ yindọ, eyin depope to mí mẹ danbú sọn aliho Jiwheyẹwhe tọn ji, mí dona gbọn whiwhẹ dali lẹkọwa Otọ́ mítọn dè nado gọ̀ nukundagbe etọn mọ.

Humọ, nuplọnmẹ devo de họnwun to aliho voovo he mẹ otọ́ lọ po visunnu mẹho lọ po yinuwa te mẹ. Otọ́ lọ do gbigbọ jonamẹ tọn hia bo kẹalọyi visunnu etọn, to whenuena visunnu mẹho lọ hẹn nọvisunnu etọn do homẹ bo gbẹ́ nado kẹalọyi i. E họnwun dọ ojlo devizọnwatọ Jiwheyẹwhe tọn lẹ tọn wẹ nado nọ jona mẹhe ko danbú wayi de bo kẹalọyi i, eyin mẹlọ lẹnvọjọ nugbonugbo bosọ lẹkọwa ‘owhé Otọ́ lọ tọn gbè.’ Mì gbọ mí ni nọ jaya eyin mẹmẹsunnu mítọn de he ‘ko kú gọwá ogbẹ̀’ podọ eyin “ewọ ko bu bosọ yin mimọ.”

Plọnnu Dogọ

Be A ‘Mọnukunnujẹ Zẹẹmẹ lọ mẹ’ Ya?

Etẹwẹ apajlẹ Jesu tọn gando nudotọ he damlọn lọ, odọ̀ lọ, po visunnu duvanọ lọ po go zẹẹmẹdo?