Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 98

Apọsteli lẹ Gbẹ́ Pò to Otẹn He Yiaga Dín

Apọsteli lẹ Gbẹ́ Pò to Otẹn He Yiaga Dín

MATIU 20:17-28 MALKU 10:32-45 LUKU 18:31-34

  • JESU VỌ́ DỌ DỌDAI GANDO OKÚ ETỌN GO

  • ALỌGIGỌNA APỌSTELI LẸ GANDO OJLO YETỌN NA OTẸN HE YIAGA GO

Dile Jesu po devi etọn lẹ po to tadona gbejizọnlin yetọn gbọn hùwaji to Pelea pànta Jelusalẹm, yé dasá Tọ̀sisa Jọdani sẹpọ Jẹliko. Mẹdevo lẹ to gbejizọnlinzin hẹ yé, na hùnwhẹ Juwayi owhe 33 W.M. tọn wẹ.

Jesu to nukọn na devi lẹ bo magbe nado jẹ tòdaho lọ mẹ jẹnukọnna Juwayi lọ. Ṣigba, devi lẹ to budi. To ojlẹ de mẹ wayi, whenue Lazalọsi kú bọ Jesu jlo na tọ́n sọn Pelea yì Jude, Tọmasi dọna mẹhe pò lẹ dọmọ: “Mì gbọ mí ni yì ga, na mí nido sọgan kú hẹ ẹ.” (Johanu 11:16, 47-53) Enẹwutu, owùnu wẹ e yin nado yì Jelusalẹm, podọ owhẹ̀ devi lẹ tọn whẹ́n nado dibu.

Nado wleawuna apọsteli lẹ na nuhe to nukọn ja lẹ, Jesu pli yé dovo bo dọna yé dọmọ: “Mí hẹji jei Jelusalẹm, podọ Visunnu gbẹtọ tọn na yin zizedo alọmẹ na yẹwhenọgán lẹ po wekantọ lẹ po. Yé nasọ gblewhẹ okú tọn do e bo na ze e jo na omẹ akọta lẹ tọn na e nido yin ṣinṣanko bo yin hihò bosọ yin hùhù do pòtin ji; podọ to azán atọ̀ntọ gbè, e na yin finfọn.”—Matiu 20:18, 19.

Whla atọ̀ntọ die he Jesu to hodọna devi etọn lẹ gando okú po fọnsọnku etọn po go. (Matiu 16:21; 17:22, 23) Ṣigba todin, e dọ dọ emi na yin hùhù do pòtin ji. Yé dotoaina ẹn, amọ́ yé ma yọ́n nuhe enẹ zẹẹmẹdo. Vlavo yé to nukundo dọ ahọluduta Islaeli tọn na yin hinhẹn gọwá aigba ji bo jlo na mọ gigo po gbégbò po yí hẹ Jesu to ahọluduta aigba ji tọn de mẹ.

Onọ̀ apọsteli Jakọbu po Johanu po tọn, vlavo Salome, tin to gbejizọnlinzintọ lọ lẹ mẹ ga. Jesu ko do yinkọ de na apọsteli awe ehelẹ he zẹẹmẹdo “Visunnu Hẹviosò tọn lẹ,” matin ayihaawe na yé nọ yawu wadán wutu. (Malku 3:17; Luku 9:54) Ojlẹ delẹ die wayi, yé omẹ awe lẹ tindo ojlo zogbe nado tin to otẹn he yiaga mẹ to Ahọluduta Klisti tọn mẹ. Onọ̀ yetọn yọ́n enẹ ganji. Todin, e dọnsẹpọ Jesu do ota yetọn mẹ bo dẹ́ do odò to nukọn etọn bosọ jlo na biọ nude. Jesu dọna ẹn dọmọ: “Etẹwẹ hiẹ jlo?” E dọmọ: “Degbe dọ visunnu ṣie awe ehelẹ ni sinai, dopo to adusilọ towe mẹ podọ awetọ to amiyọnlọ towe mẹ, to Ahọluduta towe mẹ.”—Matiu 20:20, 21.

Na nugbo tọn, Jakọbu po Johanu po dè wẹ obiọ enẹ wá sọn. Na Jesu ṣẹṣẹ donù winyan po mẹdèpo he to tepọn ẹn po go wutu, e dọna yé dọmọ: “Mìwlẹ ma yọ́n nuhe biọ mì te. Be mìwlẹ sọgan nù kọfo he yẹn jlo na nù lọ ya?” Yé gblọn dọmọ: “Mí sọgan.” (Matiu 20:22) Ṣigba, e taidi dọ yé ma yọ́n nuhe ehe zẹẹmẹdo na yé nugbonugbo.

Etomọṣo, Jesu dọna yé dọmọ: “Mì na nù kọfo ṣie nugbo, ṣigba nado sinai to adusilọ ṣie mẹ podọ to amiyọnlọ ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe Otọ́ ṣie ko wleawu etọn dai na lẹ.”—Matiu 20:23.

To whenue apọsteli ao he pò lẹ sè nuhe Jakọbu po Johanu po biọ, yé gblehomẹ. Be Jakọbu po Johanu po ko dọ linlẹn yetọn tọ́n madoadúdẹji to nudindọn he wayi to apọsteli lẹ ṣẹnṣẹn gando mẹhe klohugan go mẹ wẹ ya? (Luku 9:46-48) Depope he whẹho lọ yin, obiọ dintọn lọ dehia dọ yé Omẹ Wiawe lẹ ma yí ayinamẹ Jesu tọn gando mẹdezewhè go do yizan mẹ. Ojlo yetọn na otẹn he yiaga ma busẹ.

Jesu de nado didẹ nudindọn ehe po mẹhẹndohomẹ he e to hinhẹnwa po. E ylọ Omẹ Wiawe lẹ pli bo na yé ayinamẹ po owanyi po, dọmọ: “Mì yọnẹn dọ mẹhe sọawuhia nado to gandu do akọta lẹ ji nọ duklunọ do yé ji podọ omẹ gboogbo lẹ nọ paṣẹ glanglan do yé ji. E ma yinmọ to mìwlẹ ṣẹnṣẹn gba; ṣigba mẹdepope he jlo na lẹzun kiklo to mì ṣẹnṣẹn dona yin lizọnyitọ mìtọn, podọ mẹdepope he jlo na yin tintan to mì ṣẹnṣẹn dona yin afanumẹ mẹlẹpo tọn.”—Malku 10:42-44.

Jesu dọ mẹhe sin apajlẹ yé dona hodo—yèdọ apajlẹ etọn. E basi zẹẹmẹ dọmọ: “Visunnu gbẹtọ tọn wá, e ma yin nado yin lizọnyina gba, ṣigba nado yilizọn namẹ bo ze ogbẹ̀ etọn jo taidi ofligọ de do ota mẹsusu tọn mẹ.” (Matiu 20:28) Na nudi owhe atọ̀n, Jesu to lizọnyi do mẹdevo lẹ tamẹ. Podọ e nasọ wàmọ kaka bo kú do ota gbẹtọvi lẹ tọn mẹ! Devi lẹ dona wleawuna jijọ Klisti tọn enẹ nkọ nado nọ yilizọn namẹ kakati nado yin lizọnyina, nado nọ ze yede whè kakati nado nọ dín otẹn he yiaga.