Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 95

Nuplọnmẹ Gando Gbẹdai po Wanyina Yọpọvu lẹ po Go

Nuplọnmẹ Gando Gbẹdai po Wanyina Yọpọvu lẹ po Go

MATIU 19:1-15 MALKU 10:1-16 LUKU 18:15-17

  • JESU DO LINLẸN JIWHEYẸWHE TỌN HIA GANDO GBẸDAI GO

  • NUNINA TLẸNMẸNINỌ TỌN

  • NUHUDO LỌ NADO TAIDI YỌPỌVU LẸ

Jesu po devi etọn lẹ po tlọ́n Galili bo dasá Tọ̀sisa Jọdani tọn dedo hùwaji gbọn Pelea. To whenue Jesu wá Pelea gbọngodo, e ko dọ nujinọtedo Jiwheyẹwhe tọn gando gbẹdai go na Falesi lẹ. (Luku 16:18) Todin, yé fọ́n whẹho enẹ dote nado tẹ́n Jesu pọ́n.

Mose wlan dọ yọnnu de sọgan yin gbigbẹdai eyin “nuhe ma jẹ de” yin mimọ to ewọ mẹ. (Deutelonomi 24:1) Onú voovo wẹ gbẹtọ lẹ nọ lẹndọ e yin whẹwhinwhẹ́n na gbẹdai. Mẹdelẹ yise dọ whẹho flinflin delẹ sọgan zọ́n. Enẹwutu, Falesi lẹ kanse dọmọ: “Be e sọgbe hẹ osẹ́n na sunnu de nado gbẹ́ asi etọn dai na whẹwhinwhẹ́n depope poun wutu ya?”—Matiu 19:3.

Kakati nado dọ linlẹn gbẹtọvi tọn, Jesu gbọn azọ́nyinyọnẹn dali donù tito alọwle tọn he Jiwheyẹwhe zedai go. “Be mìwlẹ ma ko hia dọ mẹhe dá yé sọn bẹjẹeji basi yé asu po asi po bosọ dọ: ‘Na whẹwhinwhẹ́n ehe wutu, sunnu na jo otọ́ etọn po onọ̀ etọn po do bo na sẹbọdo asi etọn go, bọ yé omẹ awe lẹ na lẹzun agbasalan dopo’ ya? Sọmọ bọ yé masọ yin agbasalan awe ba, adavo dopo. Enẹwutu, nuhe Jiwheyẹwhe ko kọndopọ, mì dike mẹde klan ẹn blo.” (Matiu 19:4-6) To whenue Jiwheyẹwhe ze tito alọwle tọn dai to Adam po Evi po ṣẹnṣẹn, e ma dọ whẹwhinwhẹ́n he sọgan zọ́n bọ alọwle yetọn na gbà.

Falesi lẹ jẹ nudọn hẹ Jesu ji, bo dọmọ: “To whelọnu lo, naegbọn Mose do nagbè nado nọ na owe gbẹdai tọn de bo gbẹ́ ẹ dai?” (Matiu 19:7) Jesu dọna yé dọmọ: “Na ahun sinsinyẹn mìtọn wutu wẹ Mose do yigbena mì nado nọ gbẹ́ asi mìtọn lẹ dai, ṣigba e ma to mọ sọn bẹjẹeji gba.” (Matiu 19:8) Hogbe lọ “bẹjẹeji” ma dlẹnalọdo azán Mose tọn gbè; kakatimọ whenue Jiwheyẹwhe ze tito alọwle tọn dai to Edẹni mẹ wẹ.

Enẹgodo, Jesu do nugbo titengbe de hia dọmọ: “Yẹn dọna mì dọ mẹdepope he gbẹ́ asi etọn dai bọ e ma yin na whẹwhinwhẹ́n fẹnnuwiwa zanhẹmẹ tọn [Glẹki, pọlnẹia] wutu, bo wlealọ hẹ devo, e deayọ.” (Matiu 19:9) Enẹwutu, fẹnnuwiwa zanhẹmẹ tọn wẹ yin whẹwhinwhẹ́n sinai do Owe-wiwe ji dopo gee lọ na gbẹdai.

Enẹ whàn devi lẹ nado dọmọ: “Eyin mọ wẹ whẹho lọ na sunnu de po asi etọn po, be e ma yin nuyọnẹnnu nado wlealọ.” (Matiu 19:10) E họnwun dọ eyin mẹde to nulẹnpọn do alọwle ji, e dona flindọ kanṣiṣa tẹgbẹ tọn de wẹ!

Na nuhe dù tlẹnmẹninọ, Jesu basi zẹẹmẹ dọ mẹdelẹ yin jiji taidi ojọ̀ bo ma sọgan tindo kọndopọ alọwle tọn. Mẹdevo lẹ yin hinhẹn zun ojọ̀ bo ma sọgan tindo kọndopọ zanhẹmẹ tọn. Podọ mẹdevo lẹ hù ojlo lọ nado tindo kọndopọ zanhẹmẹ tọn. Yé wàmọ nado sọgan na ayidonugo whẹho he gando Ahọluduta lọ go lẹ to gigọ́ mẹ. Jesu dotuhomẹna todoaitọ etọn lẹ dọmọ: “Mì gbọ mẹhe sọgan natẹn [tlẹnmẹninọ] ni natẹn ẹn.”—Matiu 19:12.

Todin, gbẹtọ lẹ jẹ ovi pẹvi yetọn lẹ plan wá Jesu dè ji. Ṣigba, devi lẹ jẹ nugbẹna yé ji, vlavo na yé ma jlo dọ yé ni dotukla Jesu wutu. Whenue Jesu mọ ehe, e gblehomẹ bo dọna yé dọmọ: “Mì gbọ yọpọvu lẹ ni wá dè e; mì tẹnpọn nado glọnalina yé blo, na omẹ mọnkọtọn lẹ wẹ Ahọluduta Jiwheyẹwhe tọn tin na. Nugbo wẹ yẹn dọna mì: Mẹdepope he ma yí Ahọluduta Jiwheyẹwhe tọn taidi yọpọvu de ma na biọ e mẹ to aliho depope mẹ.”—Malku 10:14, 15; Luku 18:15.

Nuplọnmẹ dagbe nankọ die! Nado biọ Ahọluduta Jiwheyẹwhe tọn mẹ, mí dona yin homẹmimiọnnọ bo nọ kẹalọyi nuplọnmẹ kẹdẹdi yọpọvu lẹ. Todin, nado do owanyi he e tindo na ovivu lẹ hia, Jesu bẹ yé do awà mẹ bosọ jẹ didona yé ji. Podọ owanyi sisosiso mọnkọtọn wẹ e tindo na mẹhe “yí Ahọluduta Jiwheyẹwhe tọn taidi yọpọvu de” lẹpo.—Luku 18:17.