Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 96

Jesu Na Gblọndo Dẹpẹ He Yin Ogán Adọkunnọ De

Jesu Na Gblọndo Dẹpẹ He Yin Ogán Adọkunnọ De

MATIU 19:16-30 MALKU 10:17-31 LUKU 18:18-30

  • ADỌKUNNỌ DE KANHOSE GANDO OGBẸ̀ MADOPODO GO

Jesu gbẹ́ to gbejizọnlinzin gbọn Pelea jei Jelusalẹm. Dẹpẹ adọkunnọ de họ̀nwezun wá e dè bo jẹklo to nukọn etọn. Dẹpẹ lọ yin “ogán de,” vlavo e nọ wadevizọn taidi ogán sinagọgu tọn de kavi taidi dopo to hagbẹ Sanhedlin tọn lẹ mẹ. E kanse dọmọ: “Mẹplọntọ Dagbe, etẹwẹ yẹn dona wà nado dugu ogbẹ̀ madopodo tọn?”—Luku 8:41; 18:18; 24:20.

Jesu gblọn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo mẹdopo, yèdọ Jiwheyẹwhe.” (Luku 18:19) Dẹpẹ lọ na ko yí hogbe lọ “mẹdagbe” zan taidi tẹnmẹ-yinkọ aṣa tọn de, dile labi lẹ nọ wà do. Mahopọnna dọ Jesu yin mẹplọntọ dagbe, e hẹn ẹn zun yinyọnẹn na dawe lọ dọ Jiwheyẹwhe kẹdẹ wẹ tẹnmẹ-yinkọ lọ “Mẹdagbe” jẹna.

Jesu na ẹn ayinamẹ dọmọ: “Ṣigba, eyin hiẹ jlo na biọ ogbẹ̀ mẹ, nọ yìn gbedide lẹ to whepoponu.” Enẹwutu, dẹpẹ lọ kanse dọmọ: “Detẹ lẹ wẹ?” Jesu slẹ atọ́n to Gbedide Ao lọ lẹ mẹ—yèdọ dehe gando hlọnhuhu, ayọdide, ajojijẹ, kunnudide lalo po gbégbigbòna mẹjitọ mẹtọn lẹ po go lẹ. Enẹgodo, e donù gbedide titengbe hugan de go dọmọ: “Hiẹ dona yiwanna kọmẹnu towe di dewe.”—Matiu 19:17-19.

Dawe lọ gblọn dọmọ: “Yẹn ko yìn ehe lẹpo; etẹwẹ gbẹsọ pò na mi?” (Matiu 19:20) E sọgan ko lẹndọ nudagbe he na hẹn emi zun omẹ asuka whenuho tọn de bibasi wẹ pò na emi nado pegan na ogbẹ̀ madopodo. Na Jesu mọdọ ahundopo wẹ e do to nukanbiọ wutu, e “yiwanna ẹn.” (Malku 10:21) Ṣigba, nude to aliglọnna dawe lọ.

Dawe lọ yiwanna nutindo etọn lẹ, enẹwutu Jesu dọmọ: “Onú dopo wẹ whèdo we: Yì, bo sà nuhe hiẹ tindo lẹ bosọ na wamọnọ lẹ, hiẹ nasọ tindo adọkun to olọn mẹ, enẹgodo wá bo lẹzun hodotọ ṣie.” Dawe lọ sọgan má akuẹ etọn na wamọnọ lẹ, na yé ma sọgan suahọ ẹ wutu, bo wá lẹzun devi Jesu tọn. Ṣigba, onú etọn na ko wàlẹblanuna Jesu dile e mọ bọ e fọ́n bo lẹkọ dedo po awubla po. Owanyi he dawe lọ tindo na adọkunnu lẹ, yèdọ “adọkunnu susu” etọn lẹ ma dike e ni doayi adọkunnu nujọnu tọn go. (Malku 10:21, 22) Jesu dọmọ: “Lehe e na vẹawuna mẹhe tindo akuẹ lẹ nado biọ Ahọluduta Jiwheyẹwhe tọn mẹ do sọ!”—Luku 18:24.

Hogbe ehelẹ po nuhe Jesu dọ bọdego po paṣa devi lẹ taun, na e dọmọ: “Na nugbo tọn, e bọawuna kanklosọ́ de nado gbọn onù yẹnvi he nọ tọ̀ avọ̀ de tọn mẹ hú na adọkunnọ de nado biọ Ahọluduta Jiwheyẹwhe tọn mẹ.” Enẹ zọ́n bọ devi lẹ kanse dọmọ: “Mẹnu wẹ sọgan yin whinwhlẹngán lo?” Be whlẹngán mimọ vẹawu sọmọ bọ e glo gbẹtọvi wẹ ya? Jesu pọ́n yé tlintlin bo dọmọ: “Nuhe ma yọnbasi na gbẹtọ lẹ yọnbasi na Jiwheyẹwhe.”—Luku 18:25-27.

Pita dohia dọ yé ko basi nudide he gbọnvona dawe adọkunnọ lọ tọn dọmọ: “Pọ́n! Míwlẹ ko jo nulẹpo do bo hodo we; todin, etẹwẹ mí na mọyi sọn e mẹ taun?” Jesu do kọdetọn he nudide dagbe yetọn na tindo to godo mẹ hia dọmọ: “Nugbo wẹ yẹn dọna mì, to whenuena Visunnu gbẹtọ tọn na sinai to ofìn gigonọ etọn ji to ojlẹ onú lẹ hinhẹn jẹ yọyọ tọn whenu, mì mẹhe ko hodo mi lẹ na sinai do ofìn 12 ji, bo na to whẹdana whẹndo 12 Islaeli tọn lẹ.”—Matiu 19:27, 28.

E họnwun dọ, sọgodo hodọ wẹ Jesu te, whenue nulẹ na yin hinhẹn jẹ yọyọ to aigba ji, dile e ko te do to jipa Edẹni tọn mẹ. Pita po devi he pò lẹ po na yin ahọsuna to whenue yé na dugán hẹ Jesu do Paladisi aigba ji tọn lọ ji, yèdọ ale de he hugan avọ́sinsan depope he yé sọgan basi!

Ṣigba, e ma yin sọgodo wẹ ale lọ lẹpo te. Devi etọn lẹ ko to vivi delẹ tọn dù to alọnu. Jesu dọmọ: “Mẹdepope ma tin he jo owhé, asi, nọvisunnu lẹ, mẹjitọ lẹ, kavi ovi lẹ do na Ahọluduta Jiwheyẹwhe tọn wutu he ma na mọyi do donu susu ji to ojlẹ ehe mẹ podọ ogbẹ̀ madopodo to titonu he ja mẹ.”—Luku 18:29, 30.

Mọwẹ, fidepope he devi etọn lẹ yì, yé sọgan duvivi gbẹdido pẹkipẹki hẹ yisenọ hatọ lẹ tọn, ehe sọ họakuẹ hugan dehe nọ tin to hagbẹ whẹndo tọn jọnun lẹ ṣẹnṣẹn. E blawu dọ vlavo dona enẹ po ale lọ nado nọgbẹ̀ to Ahọluduta olọn tọn Jiwheyẹwhe tọn mẹ po na gbọ dẹpẹ he yin ogán adọkunnọ lọ go.

Jesu yidogọ dọmọ: “Ṣigba, mẹsusu he yin tintan na lẹzun godotọ podọ godotọ na lẹzun tintan.” (Matiu 19:30) Etẹ dọ wẹ e te?

Dẹpẹ he yin ogán adọkunnọ lọ tin to omẹ “tintan” lẹ mẹ, na e tin to nukọntọ Ju lẹ tọn mẹ. Na e nọ payi gbedide Jiwheyẹwhe tọn lẹ go wutu, nugopipe etọn zẹ̀ nuhe yè sọgan donukun sọn e si go. Ṣogan, adọkun po nutindo lẹ po wẹ to otẹn tintan mẹ na ẹn. To vogbingbọn mẹ, gbẹtọ paa he to otò lọ mẹ lẹ nọ mọdọ nuplọnmẹ Jesu tọn lẹ yin nugbo bo nọ namẹ ogbẹ̀. To linlẹn de mẹ, yewlẹ ko yin “godotọ” dai, amọ́ todin yé to lilẹzun omẹ “tintan.” Yé sọgan tindo todido nado sinai do ofìn ji to olọn mẹ hẹ Jesu bo dugán do Paladisi aigba ji tọn lọ ji.