Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 92

Pòtọnọ Dopo Wẹ Do Pinpẹn-Nutọn-Yinyọnẹn Hia

Pòtọnọ Dopo Wẹ Do Pinpẹn-Nutọn-Yinyọnẹn Hia

LUKU 17:11-19

  • JESU HẸNAZỌ̀NGBỌNA PÒTỌNỌ AO

Nado hẹn sébibla Sanhedlin lọ tọn nado hù i zun ovọ́, Jesu zingbejizọnlin yì tòdaho Eflaimi tọn mẹ to agewaji whèzẹtẹn Jelusalẹm tọn. Ewọ po devi etọn lẹ po gbọṣi finẹ, yèdọ fie kẹntọ etọn lẹ ma gán mọ ẹn te. (Johanu 11:54) Ṣigba, ojlẹ hùnwhẹ Juwayi owhe 33 W.M. tọn to sisẹpọ, bọ Jesu nasọ dedo to madẹnmẹ. E zingbejizọnlin pànta agewaji gbọn Samalia bo hẹji yì Galili, yèdọ whla godo tọn he e yì lẹdo ehe mẹ jẹnukọnna okú etọn.

To bẹjẹeji gbejizọnlin lọ tọn, dile Jesu to yìyì sọn gbétatò de mẹ jẹ devo mẹ, e pé dawe ao delẹ he to pòzọ̀n jẹ. Wunmẹ azọ̀n ehe tọn delẹ sọgan dù nugonu agbasa tọn lẹ taidi alọvi lẹ, afọvi lẹ, kavi otó lẹ vudevude. (Osọha lẹ 12:10-12) Osẹ́n Jiwheyẹwhe tọn biọ dọ pòtọnọ de ni nọ dawhá dọ, “Mawé, mawé!” bo nọ nọ̀ olá.—Levitiku 13:45, 46.

Enẹwutu, pòtọnọ ao lọ lẹ tin to olá na Jesu. Ṣogan, yé yí ogbè lélé do dawhá dọmọ: “Jesu, Nuplọnmẹtọ, wàlẹblanuna mí!” To whenue Jesu mọ pòtọnọ lọ lẹ, e dọna yé dọmọ: “Mì yì, bo do mìde hia yẹwhenọ lẹ.” (Luku 17:13, 14) Gbọnmọ dali, e na sisi Osẹ́n Jiwheyẹwhe tọn he nagbè yẹwhenọ lẹ nado lá dọ pòtọnọ he ko jẹgangan lẹ yin wiwe. Whenẹnu, yé sọgan gọ̀ jẹ pọnọ ji hẹ mẹhe to gángán lẹ.—Levitiku 13:9-17.

Pòtọnọ ao lọ lẹ dejido huhlọn Jesu tọn nado wà azọ́njiawu go. Enẹwutu, yé dedo yẹwhenọ lẹ dè, podọ yé tlẹ yin azọ̀nhẹngbọna whẹpo do jẹ dọ́n. Yise yetọn to Jesu mẹ hẹn ale wá na yé to whenue yé pò to aliji. Yé jẹ mimọ ji to yede mẹ podọ to agbasa yetọn go dọ yé ko gọ̀ jẹgangan!

Ṣinẹnẹ to pòtọnọ he ko yin kiklọ́we lọ lẹ mẹ wleali bo dedo. Amọ́ dopo to yé mẹ ma wàmọ. Dawe ehe, yèdọ Samalianu de, lẹkọwa nado dín Jesu. Etẹwutu? Dawe lọ yọ́n pinpẹn nuhe Jesu wà na ẹn lọ tọn taun. Pòtọnọ dai tọn ehe “to gigopana Jiwheyẹwhe po ogbè lélé po,” na e mọdọ Jiwheyẹwhe wẹ hẹn yọnbasi bọ emi gọ̀ jẹgangan. (Luku 17:15) Whenue e mọ Jesu, e họ́jai to nukọn etọn bo to pẹdona ẹn.

Jesu dọna mẹhe lẹdo e pé lẹ dọ: “Omẹ ao wẹ yin kiklọ́we, kavi e ma yin mọ wẹ? To whelọnu lo, fie wẹ omẹ ṣinẹnẹ he pò lẹ te? Be mẹdepope ma yin mimọ he lẹkọwa nado pagigona Jiwheyẹwhe gbọnvona dawe ehe he wá sọn akọta devo mẹ wẹ?” Whenẹnu, Jesu dọna Samalianu lọ dọmọ: “Fọ́n, bo yì; yise towe ko hẹn we jẹgangan.”—Luku 17:17-19.

Gbọn azọ̀nhinhẹngbọna pòtọnọ ao lọ lẹ dali, Jesu dohia dọ emi tindo godonọnamẹ Jehovah Jiwheyẹwhe tọn. Todin, e ma yindọ dopo to omẹ ao lọ lẹ mẹ yin azọ̀nhẹngbọna gbọn nuyiwa Jesu tọn gblamẹ kẹdẹ wẹ gba, ṣigba e yọnbasi dọ ewọ sọ tin to aliho ogbẹ̀ tọn lọ ji ga. To ojlẹ mítọn mẹ, Jiwheyẹwhe masọ to Jesu yizan nado hẹnazọ̀ngbọnamẹ to aliho mọnkọtọn mẹ ba. Etomọṣo, yise tintindo to Jesu mẹ, sọgan zọ́n bọ mí na tin to aliho ogbẹ̀ tọn ji, yèdọ aliho ogbẹ̀ madopodo tọn ji. Be mí nọ dohia dọ mí yọ́n pinpẹn-nutọn dile dawe Samalianu lọ wà do ya?