Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 89

E Dọyẹwheho to Pelea Dile E Jei Jude

E Dọyẹwheho to Pelea Dile E Jei Jude

LUKU 17:1-10 JOHANU 11:1-16

  • E YLAN TAUN NADO HẸN MẸDE DAHLI

  • NỌ JONAMẸ BO NỌ DO YISE HIA

E ko yì ojlẹ de din bọ Jesu to lẹdo he to “Jọdani godo” de mẹ he nọ yin Pelea. (Johanu 10:40) Todin, e to gbejizọnlinzin pànta Jelusalẹm to hùwaji.

Jesu ma to edeṣo. Devi etọn lẹ to gbejizọnlinzin hẹ ẹ, gọna “gbẹtọgun daho lẹ” he bẹ tòkuẹ-ṣinyantọ lẹ po ylandonọ lẹ po hẹn. (Luku 14:25; 15:1) Falesi po wekantọ lẹ po he nọ mọhodọdo nuhe Jesu to didọ bo to wiwà lẹ go lọsu to yé mẹ ga. Yé na ko to nulẹnpọn do nususu ji to whenue yé ko dotó apajlẹ Jesu tọn lẹ gando lẹngbọ he bu lọ, visunnu he bu lọ, podọ dawe adọkunnọ lọ po Lazalọsi po go godo.—Luku 15:2; 16:14.

Vlavo po homọdọdomẹgo gọna awọnlín he nukundiọsọmẹtọ etọn lẹ yẹ́n do e po to ayiha mẹ, Jesu lẹ́ ayidonugo etọn hlan devi etọn lẹ. E donù nuagokun delẹ go he e ko plọnmẹ wayi to Galili.

Di apajlẹ, Jesu dọmọ: “E glo nado dapana nuhe nọ hẹnmẹ dahli lẹ. Etomọṣo, dindọn hlan mẹhe gblamẹ yé gbọn do wá! . . . Mì payi mìde go. Eyin mẹmẹsunnu towe waylando de, gbẹnuna ẹn, podọ eyin e lẹnvọjọ, jona ẹn. Eyin e tlẹ waylando do we whla ṣinawe to gbèdopo bo lẹkọwa dè we whla ṣinawe, bo dọmọ, ‘Yẹn lẹnvọjọ,’ hiẹ dona jona ẹn.” (Luku 17:1-4) Hodidọ godo tọn ehe dona ko hẹn Pita flin kanbiọ he ewọ kanse wayi gando jonamẹ whla ṣinawe go.—Matiu 18:21.

Be devi lẹ na penugo nado yinuwa sọgbe hẹ ohó Jesu tọn lẹ ya? Whenue yé dọna Jesu dọ, “Do yise yise ji na mí,” ewọ na yé jide dọ: “Eyin mì tindo yise he sọ okún mutaldi tọn de, mì na dọna atin sikamini tọn ehe dọ, ‘Họ̀n adọ̀ bo yin dido do ohù mẹ!’ e nasọ setonuna mì.” (Luku 17:5, 6) Mọwẹ, yise tintindo jẹ obá de mẹ tlẹ ko pé nado wà onú daho lẹ dotana.

Jesu zindonukọn bo plọnmẹ dọ nujọnu wẹ e yin nado tindo whiwhẹ po pọndohlan jlẹkaji tọn po gando mẹdetiti go to whenue e dọna apọsteli lẹ dọ: “Mẹnu wẹ tin to mì mẹ he tindo afanumẹ de he to aigba-jlo kavi to kanlin yìn bọ to whenue e lẹkọ sọn glemẹ ewọ na dọna ẹn dọ, ‘Wáfi to afọdopolọji bo jagla to tafo kọ̀n’? Kakatimọ, be e ma na dọna ẹn dọ, ‘Wleawu nude tọn na mi nado dù to whèjai, bo ze azọ́nvọ̀ do bosọ yilizọn na mi kakajẹ whenue yẹn na dù bo nù fó; to enẹgodo hiẹ sọgan dù bo nù’? E ma na dopẹna afanumẹ lọ na ewọ wà nuhe yin didena ẹn lẹ wutu, kavi e na wàmọ wẹ? Enẹwutu, mìlọsu ga, to whenue mì ko wà nuhe yin didena mì lẹ godo, mì dọ, ‘Afanumẹ madoalenọ lẹ wẹ mí. Nuhe mí dona wà wẹ mí wà.’”—Luku 17:7-10.

Devizọnwatọ Jiwheyẹwhe tọn lẹ dopodopo dona yọnẹn dọ nujọnu wẹ e yin nado nọ ze ojlo Jiwheyẹwhe tọn do otẹn tintan mẹ. Humọ, mẹdopodopo dona nọ flindọ lẹblanulọkẹyi de wẹ e yin nado nọ sẹ̀n Jiwheyẹwhe taidi hagbẹ whédo etọn tọn.

E taidi dọ to hodidọ ehe godo tlolo wẹ wẹnsagun de he Malia po Malta po dohlan wá. Nọviyọnnu Lazalọsi tọn lẹ wẹ yé yin bo nọ nọ̀ Bẹtani to Jude. Wẹnsagun lọ dọmọ: “Oklunọ, pọ́n! mẹhe hiẹ yiwanna lọ to azọ̀njẹ.”—Johanu 11:1-3.

Dile Jesu tlẹ sè dọ họntọn etọn Lazalọsi to azọ̀n sinsinyẹn jẹ, e ma dike awubla ni hẹn awuku i. Kakatimọ, e dọmọ: “Azọ̀n ehe ma na dekọtọn do okú mẹ gba, ṣigba nado na gigo Jiwheyẹwhe wutu wẹ, na Visunnu Jiwheyẹwhe tọn nido sọgan yin gigopana gbọn ehe gblamẹ.” E nọ fie e te na azán awe, podọ to enẹgodo e dọna devi etọn lẹ dọmọ: “Mì gbọ mí ni yì Jude whladopo dogọ.” Yé jẹagọdo bo dọmọ: “Labi, to agọe poun wẹ omẹ Jude tọn lẹ to dindin nado dlan zannu do we, bọ hiẹ nasọ vọ́ yì finẹ ya?”—Johanu 11:4, 7, 8.

Jesu gblọn dọmọ: “Gànhiho wiawe wẹ tin to okle dopo mẹ, kavi e ma yin mọ wẹ? Eyin mẹde to zọnlinzin to okle, e ma nọ gbà afọ do nudepope go, na ewọ nọ mọ hinhọ́n aihọn ehe tọn wutu. Ṣigba, eyin mẹde to zọnlinzin to zánmẹ, e nọ gbà afọ do núgo, na hinhọ́n ma tin to ewọ mẹ wutu.” (Johanu 11:9, 10) Nuhe dọ Jesu te wẹ na ko yindọ, ojlẹ he Jiwheyẹwhe de na ẹn nado hẹn lizọnyizọn etọn di ma ko wá vivọnu. Whẹpo e nado wá vivọnu, Jesu dona yí ojlẹ gli he pò na ẹn lọ zan to gigọ́ mẹ.

Jesu yidogọ dọmọ: “Lazalọsi họntọn mítọn to amlọndọ, ṣigba yẹn jei finẹ nado fọ́n ẹn.” Na devi lẹ lẹndọ gbigbọjẹ wẹ Lazalọsi te poun bo na wá gọ̀ jẹgangan wutu, yé dọmọ: “Oklunọ, eyin amlọndọ wẹ e te, e na jẹgangan.” Jesu hùn dọna yé dọmọ: “Lazalọsi ko kú . . . Ṣigba, mì gbọ mí ni yì e dè.”—Johanu 11:11-15.

Tọmasi yọnẹn dọ Jesu sọgan yin hùhù to Jude, ṣogan na e jlo na nọgodona ẹn wutu, e dotuhomẹna devi hatọ etọn lẹ dọmọ: “Mì gbọ mí ni yì ga, na mí nido sọgan kú hẹ ẹ.”—Johanu 11:16.