Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 69

Otọ́ Yetọn—Ablaham Kavi Lẹgba?

Otọ́ Yetọn—Ablaham Kavi Lẹgba?

JOHANU 8:37-59

  • JU LẸ SỌALỌAKỌ́N DỌ ABLAHAM WẸ YIN OTỌ́ YETỌN

  • WHẸPO ABLAHAM DO YIN JIJI, JESU KO TIN

Jesu gbẹ́ pò to Jelusalẹm na Hùnwhẹ Gòhọtúntún tọn, bo zindonukọn nado to nugbo titengbe delẹ plọnmẹ. Ju he to finẹ lẹ ṣẹṣẹ dọna ẹn dọmọ: “Kúnkan Ablaham tọn wẹ mí podọ mí ma ko yin afanumẹ na mẹde pọ́n gbede.” Jesu gblọnna yé dọmọ: “Yẹn yọnẹn dọ kúnkan Ablaham tọn wẹ mìwlẹ; ṣigba mì to dindin nado hù mi, na ohó ṣie lẹ ma mọ otẹn to ohò mìtọn mẹ wutu. Nuhe yẹn ko mọ to Otọ́ ṣie dè lẹ dọ wẹ yẹn te; mìwlẹ sọ to nuhe mì ko sè sọn otọ́ mìtọn dè lẹ wà.”—Johanu 8:33, 37, 38.

Nuhe dọ Jesu te họnwun: Otọ́ etọn gbọnvo na yetọn. Na yé ma mọnukunnujẹ nuhe dọ Jesu te mẹ wutu, yé vọ́ alọsọakọ́n dọmọ: “Ablaham wẹ otọ́ mítọn.” (Johanu 8:39; Isaia 41:8) To paa mẹ, kúnkan etọn lẹ wẹ yé yin. Enẹwutu, yé nọ lẹndọ yé tindo yise he Ablaham, yèdọ họntọn Jiwheyẹwhe tọn tindo nkọ.

Ṣigba, Jesu na yé gblọndo he hẹnmẹjọsi de dọmọ: “Eyin mìwlẹ yin ovi Ablaham tọn lẹ, mì bo wazọ́n he yin Ablaham tọn lẹ.” Na nugbo tọn, visunnu dagbe de nọ hodo apajlẹ otọ́ etọn tọn. Jesu zindonukọn dọmọ: “Ṣigba, todin mìwlẹ to dindin nado hù yẹn mẹhe ko dọ nugbo he yẹn ko sè sọn Jiwheyẹwhe dè na mì. Ablaham ma wà ehe gba.” Enẹgodo, Jesu dọ hogbe he paṣamẹ ehelẹ na yé dọmọ: “Azọ́n he yin otọ́ mìtọn tọn lẹ wà wẹ mì te.”—Johanu 8:39-41.

Ṣogan, Ju lẹ ma ko yọ́n mẹhe hodọ Jesu te. Yé sọalọakọ́n dọ visunnu jọnun lẹ wẹ yé yin bo dọ dọ, “Míwlẹ ma yin ayọvi gba; Otọ́ dopo wẹ mí tindo, yèdọ Jiwheyẹwhe.” Ṣigba, be Jiwheyẹwhe wẹ yin Otọ́ yetọn nugbonugbo ya? Jesu dọmọ: “Eyin Jiwheyẹwhe wẹ yin Otọ́ mìtọn, mì na ko yiwanna mi, na Jiwheyẹwhe dè wẹ yẹn wá sọn bo do tin tofi. Yẹn ma wá na dee gba, ṣigba Ewọ wẹ do mi hlan.” Jesu kàn kanbiọ de sè bosọ na gblọndo etọn na ede dọmọ: “Naegbọn mì ma do yọ́n nuhe dọ yẹn te? Na mì ma sọgan dotoaina ohó ṣie wutu.”—Johanu 8:41-43.

Jesu ko tẹnpọn nado do nuhe na yin kọdetọn lọ hia eyin yè gbẹ́ ẹ dai. Ṣigba, todin e dọna yé madoadúdẹji dọmọ: “Otọ́ mìtọn Lẹgba dè wẹ mì wá sọn, mì sọ jlo nado wà ojlo otọ́ mìtọn tọn lẹ.” Nawẹ otọ́ yetọn nọ yinuwa gbọn? Jesu do e hia to aliho he họnwun mẹ dọmọ: “Hlọnhutọ de wẹ ewọ sọn dowhenu, e masọ nọ nọte to nugbo mẹ.” Jesu yidogọ dọmọ: “Ewọ he yin Jiwheyẹwhe tọn nọ dotoaina ohó Jiwheyẹwhe tọn lẹ. Ehe wutu wẹ mìwlẹ ma do dotoai, na mì ma yin Jiwheyẹwhe tọn wutu.”—Johanu 8:44, 47.

Whẹgbledomẹ enẹ hẹn homẹgble Ju lẹ bọ yé gblọn dọmọ: “Be owhẹ̀ mítọn ma whẹ́n bọ mí do dọ dọ, Samalianu de wẹ hiẹ bosọ tindo aovi de ya?” Wangbẹna wẹ yé dohia Jesu to whenue yé ylọ ẹ dọ “Samalianu de.” Ṣigba, Jesu dovọ́na hodidọ mẹdèpo tọn yetọn bo gblọn dọmọ: “Yẹn ma tindo aovi de gba, ṣigba Otọ́ ṣie gbògbéna wẹ yẹn te, bọ mìwlẹ ma gbògbéna mi.” Opagbe jiawu he Jesu do dọmọ: “Eyin mẹde payi ohó ṣie go, ewọ ma na kú gbede,” dohia dọ whẹho sinsinyẹn de wẹ. Ewọ ma to didọ dọ apọsteli lẹ po mẹdevo he hodo e lẹ po ma na kú gbede gba. Kakatimọ, yé ma na mọ vasudo madopodo yí, enẹ wẹ “okú awetọ,” he ma tindo todido fọnsọnku tọn.—Johanu 8:48-51; Osọhia 21:8.

Ṣigba, Ju lẹ mọnukunnujẹ hodidọ Jesu tọn lẹ mẹ to aliho paa tọn mẹ bo dọmọ: “Todin wẹ mí yọnẹn dọ hiẹ tindo aovi de. Ablaham kú, yẹwhegán lẹ lọsu ga; ṣigba hiẹ dọ dọ, ‘Eyin mẹde payi ohó ṣie go, ewọ ma na dọ́ okú pọ́n gbede.’ Hiẹ ma klohu otọ́ mítọn Ablaham, mẹhe kú, kavi hiẹ wàmọ wẹ? . . . Mẹnu wẹ hiẹ lẹndọ a yin?”—Johanu 8:52, 53.

E họnwun dọ Jesu to nùzindeji dọ ewọ wẹ Mẹsia lọ. Kakati nado na gblọndo na kanbiọ yetọn lẹ to aliho tlọlọ tọn mẹ gando mẹhe ewọ yin go, e dọmọ: “Eyin yẹn pagigona dee, gigo ṣie ma yin nude. Otọ́ ṣie wẹ nọ pagigona mi, mẹhe mìwlẹ  ylọdọ Jiwheyẹwhe mìtọn; ṣogan, mìwlẹ ma ko yọ́n ewọ. Ṣigba, yẹn yọ́n ewọ. Podọ eyin yẹn dọ dọ yẹn ma yọ́n ewọ, be yẹn taidi mìwlẹ, yèdọ lalonọ de.”—Johanu 8:54, 55.

Todin, Jesu lẹkọwa apajlẹ tọgbo nugbonọ yetọn Ablaham tọn ji bo dọmọ: “Ablaham otọ́ mìtọn jaya tlala dile e to nukundo nado mọ azán ṣie, ewọ sọ mọ ẹn bo jaya.” Na Ablaham tindo yise to opagbe Jiwheyẹwhe tọn mẹ wutu, e nọ jejeji nado mọ wiwá Mẹsia lọ tọn. Ju lẹ ma yí nuhe e dọ sè bo gblọn dọmọ: “Hiẹ ma ko tindo owhe 50 todin, ṣogan hiẹ ko mọ Ablaham?” Jesu gblọnna yé dọmọ: “Nugbonugbo wẹ yẹn dọna mì dọ, Whẹpo Ablaham do yin jiji, yẹn ko tin.” Ewọ to alọdlẹndo gbẹninọ etọn taidi angẹli huhlọnnọ de to olọn mẹ jẹnukọnna aigba ji wiwá etọn.—Johanu 8:56-58.

Ju lẹ gblehomẹ na Jesu dọ dọ emi ko nọgbẹ̀ jẹnukọnna Ablaham bo jlo na dlan zannu do e. Ṣigba, Jesu tọ́n sọn finẹ awuyẹyẹ-afọyẹyẹ.

Plọnnu Dogọ

HODO APAJLẸ YISE YETỌN TỌN

Ablaham—“Otọ́ Mẹhe Tindo Yise” Lẹpo Tọn

Nawẹ Ablaham do yise hia gbọn? Aliho tẹlẹ mẹ wẹ hiẹ na jlo nado hodo apajlẹ yise Ablaham tọn te?