Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 79

Nuhewutu Vasudo to Tepọn Ju Mayisenọ Lẹ

Nuhewutu Vasudo to Tepọn Ju Mayisenọ Lẹ

LUKU 13:1-21

  • JESU DE NUPLỌNMẸ DE SỌN NUGBAJẸMẸJI AWE DELẸ MẸ

  • YỌNNU HE NỌ ZỌ̀N TỌ́TỌ́ DE YIN AZỌ̀NHẸNGBỌNA TO GBỌJẸZANGBE

Jesu ko tẹnpọn to aliho susu mẹ nado whàn gbẹtọ lọ lẹ nado lẹnnupọndo haṣinṣan yetọn hẹ Jiwheyẹwhe ji. Dotẹnmẹ devo hundote nado wàmọ to whenue e ko dọho hẹ gbẹtọ lẹ to gbonu owhé Falesi de tọn godo.

Delẹ to yé mẹ donù nugbajẹmẹji de go. Yé dọho gando “Galilinu lẹ go, ohùn mẹhe tọn [Ayimatẹn-gán Lomu tọn Pọntiu] Pilati flusọ́ po avọ́sinsan yetọn lẹ po.” (Luku 13:1) Etẹ dọ wẹ yé te taun?

Vlavo Galilinu ehelẹ yin hùhù to whenue Ju fọtọ́n susu fọngu do Pilati ji, na e yí akuẹ sọn adọkun potin tẹmpli tọn mẹ nado basi osinwhín de nado dọ̀n osin wá Jelusalẹm wutu. Pilati sọgan ko mọ akuẹ lọ yí po gbekọndopọ nukọntọ tẹmpli mẹ tọn lẹ tọn po. Mẹhe to linlin nugbajẹmẹji ehe tọn na lẹ sọgan lẹndọ Galilinu lẹ jiya nujijọ ehe tọn na yé hùwhẹ walọ ylankan tọn wutu. Ṣigba, Jesu jẹagọdo pọndohlan enẹ.

E kanse dọmọ: “Be mìwlẹ lẹndọ Galilinu enẹlẹ yin ylandonọ hú Galilinu he pò lẹpo na yé jiya onú ehelẹ tọn wutu wẹ ya?” Jesu gblọn dọ lala. Ṣigba, e yí nujijọ ehe zan nado na avase Ju lẹ dọmọ: “Eyin mìwlẹ ma lẹnvọjọ, mìmẹpo wẹ na yin vivasudo to aliho mọnkọtọn mẹ.” (Luku 13:2, 3) Enẹgodo, Jesu donù nugbajẹmẹji devo he sọgan ko jọ ojlẹ vude to tintan lọ godo go, ehe sọgan ko gando osinwhín lọ bibasi go, e kanse dọmọ:

“Omẹ 18 he ji atọ̀họ̀ Siloami tọn họ́ jẹ, bo hù lẹ, be mìwlẹ lẹndọ yé yin ylandonọ hú mẹhe pò lẹpo he nọ nọ̀ Jelusalẹm wẹ ya?” (Luku 13:4) Gbẹtọgun lọ sọgan lẹndọ omẹ enẹlẹ kú na nuylankan he dopodopo yetọn lẹ wà wutu. Whladopo dogọ Jesu jẹagọdo pọndohlan enẹ. E yọnẹn dọ “ojlẹ po kosọ po” nọ wá, podọ e yọnbasi dọ ehe wẹ hẹn nugbajẹmẹji lọ wá ga. (Yẹwhehodọtọ 9:11) Ṣigba, gbẹtọ lọ lẹ dona plọn nude sọn nujijọ lọ mẹ. Jesu dọmọ: “Eyin mìwlẹ ma lẹnvọjọ, mìmẹpo wẹ na yin vivasudo to aliho mọnkọtọn mẹ.” (Luku 13:5) Ṣigba, naegbọn e do to nùzindo ehe ji todin?

Ojlẹ he pò na ẹn nado hẹn lizọnyizọn etọn di wẹ zọ́n, podọ e zinnudo whẹho lọ ji to aliho ehe mẹ dọmọ: “Dawe de tindo ovòtin de he yin dido do vẹngle etọn mẹ, e sọ wá nado dín sinsẹ́n to e ji, ṣigba e ma mọ depope. To whenẹnu, e dọna vẹngle-zọ́nwatọ etọn dọ, ‘E ko yì owhe atọ̀n he yẹn to wiwá bo to sinsẹ́n dín to ovòtin ehe ji, ṣigba yẹn ma mọ depope. Sán ẹn liai! Naegbọn e nado to tẹnmẹ ján aigba sọmọ?’ E gblọnna ẹn dọmọ, ‘Oklunọ, jo e do na owhe ehe ga, kaka yẹn nado kùndò lẹdo e bo bẹ ogbó do e mẹ, podọ eyin e de sinsẹ́n tọ́n to sọgodo, be e yọ́n, ṣigba eyin e ma yinmọ, hiẹ na sán ẹn liai.’”—Luku 13:6-9.

Na nuhe hugan owhe atọ̀n, Jesu ko to tintẹnpọn nado whàn Ju lẹ nado wleawuna yise. Ṣigba, vude poun to yé mẹ wẹ lẹzun devi lẹ bo sọgan yin pinpọnhlan taidi sinsẹ́n tuklajijẹ etọn tọn. Todin, to owhe ẹnẹtọ lizọnyizọn etọn tọn mẹ, e yidogọna vivẹnudido etọn to lizọnyizọn lọ mẹ. E taidi dọ e to dòkun lẹdo ovòtin Juvi lẹ tọn bo to ogbó bẹ do e mẹ gbọn yẹwhehodidọ po mẹpinplọn po to Jude po Pelea po dali. Kọdetọn tẹwẹ ehe hẹnwa? Omẹ vude poun wẹ kẹalọyi i to Ju lẹ mẹ. Akọta lọ to pọmẹ gbẹ́ nado lẹnvọjọ bo wá tin to hukanji todin nado yin vivasudo.

Awugbopo suhugan yetọn tọn nado kẹalọyi i sọawuhia whladopo dogọ to ojlẹ vude godo to Gbọjẹzangbe. Jesu to mẹplọn to sinagọgu de mẹ. E mọ nawe de, he to nuyiwadomẹji aovi lẹ tọn glọ, bo nọ zọ̀n tọ́tọ́ sọn owhe 18 die. Jesu do awuvẹmẹ hia ẹ bo dọmọ: “Nawe, hiẹ yin tuntundote sọn awutu towe mẹ.” (Luku 13:12) Jesu ze alọ etọn do nawe lọ ji bọ to afọdopolọji e jlọ nọte bosọ jẹ gigopana Jiwheyẹwhe ji.

Enẹ gblehomẹna ogán sinagọgu tọn lọ bọ e dọmọ: “Azán ṣidopo wẹ tin na azọ́n; enẹwutu to azán enẹlẹ gbè, mì wá bo yin azọ̀nhẹngbọna, ṣigba e yin to Gbọjẹzangbe blo.” (Luku 13:14) Ogán sinagọgu tọn lọ ma gbẹ́ dọ Jesu ma tindo huhlọn nado gbọazọ̀nna gbẹtọ lẹ gba; kakatimọ, e to nugbẹna gbẹtọ lẹ ma nado nọ wá nado yin azọ̀nhẹngbọna to Gbọjẹzangbe! Jesu gblọn to aliho he sọgbe bosọ họnwun ehe mẹ dọmọ: “Mì yẹnuwatọ lẹ, be dopodopo mìtọn ma nọ tún oyìnsú etọn kavi kẹtẹkẹtẹ etọn sọn apó mẹ to Gbọjẹzangbe bo nọ plan ẹn yì nado na ẹn osin ya? To whelọnu lo, be e ma jẹ dọ nawe he yin viyọnnu Ablaham tọn ehe, he Satani ko dogàn, yèdọ sọn owhe 18 die gbọ́n lọ ni yin tuntundote sọn ogàn ehe mẹ to Gbọjẹzangbe ya?”—Luku 13:15, 16.

Winyan hù nukundiọsọmẹtọ lẹ, ṣigba gbẹtọgun lọ jaya na onú gigonọ he yé mọ bọ Jesu to wiwà lẹ. Enẹgodo, Jesu vọ́ apajlẹ dọdai tọn awe he e na gando Ahọluduta lọ go delẹ dọ to Jude, ehe e ko na wayi to tọjihun de mẹ to Ohù Galili tọn ji.—Matiu 13:31-33; Luku 13:18-21.