Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 70

Jesu Hẹnazọ̀ngbọna Dawe de He Yin Jiji di Nukuntọ́nnọ

Jesu Hẹnazọ̀ngbọna Dawe de He Yin Jiji di Nukuntọ́nnọ

JOHANU 9:1-18

  • NUBIỌDUTỌ HE YIN JIJI DI NUKUNTỌ́NNỌ DE YIN AZỌ̀NHẸNGBỌNA

Jesu gbẹ́ pò to Jelusalẹm to Gbọjẹzangbe. Dile ewọ po devi etọn lẹ po to zọnlinzin gbọn tòdaho lọ mẹ, yé mọ nubiọdutọ de he yin jiji di nukuntọ́nnọ. Devi lẹ kanse Jesu dọmọ: “Labi, mẹnu wẹ waylando, dawe ehe kavi mẹjitọ etọn lẹ, bọ ewọ do yin jiji di nukuntọ́nnọ?”—Johanu 9:2.

Devi lẹ yọnẹn dọ dawe lọ ma tindo alindọn mayinukundomọ de he nọgbẹ̀ jẹnukọnna jiji etọn, ṣogan e to pipaṣa yé vlavo eyin mẹde sọgan waylando to adọ̀ onọ̀ etọn tọn mẹ. Jesu gblọn dọmọ: “Dawe ehe kavi mẹjitọ etọn lẹ ma waylando gba, ṣigba na azọ́n Jiwheyẹwhe tọn lẹ nido sọgan yin hinhẹn sọawuhia gando ewọ go wutu wẹ.” (Johanu 9:3) Enẹwutu, dawe lọ kavi mẹjitọ etọn lẹ ma hùwhẹ tangan de kavi waylando de he zọ́n bọ e do tọ́nnukun. Kakatimọ, ylando Adam tọn wẹ dekọtọn do mapenọ-yinyin mẹ na gbẹtọvi lẹpo bosọ nọ hẹn oblọ lẹ taidi nukuntintọ́n wá. Ṣigba, nukuntintọ́n dawe lọ tọn hùn dotẹnmẹ dote na Jesu nado hẹn azọ́n Jiwheyẹwhe tọn lẹ sọawuhia, dile e ko basi do to ojlẹ delẹ mẹ wayi bo hẹnazọ̀ngbọna gbẹtọ lẹ.

Jesu zinnudeji dọ azọ́n ehe dona yin wiwà to niyaniya mẹ. E dọmọ: “Mí dona wà azọ́n ewọ he do mi hlan tọn lẹ to whenue okle gbẹ́ pò to ote; ozán na wá kú bọ mẹdepope ma sọgan wazọ́n. Dile e na dẹnsọ bọ yẹn na to aihọn mẹ, yẹn wẹ hinhọ́n aihọn lọ tọn.” (Johanu 9:4, 5) Na nugbo tọn, to madẹnmẹ, okú Jesu tọn zọ́n bọ ewọ na tin to zinvlu mẹ to yọdò mẹ, fie e ma sọgan wà nude te. Ṣigba todin whẹ́, ewọ wẹ yin asisa hinhọ́n tọn na aihọn lọ.

Ṣigba, be Jesu na hẹnazọ̀ngbọna dawe lọ ya, podọ eyin mọ wẹ, gbọnna? Jesu túntán do kọmẹ bosọ yí otán lọ do yàn okọ́. E sá okọ́ yinyan lọ do nukun dawe lọ tọn lẹ ji, bo dọna ẹn dọmọ: “Yì klọ́ ẹ to osindò Siloami tọn mẹ.” (Johanu 9:7) Dawe lọ setonuna nuhe Jesu dọ. To whenue e wàmọ, e jẹ numọ ji! Pọ́n ayajẹ he e na ko tindo to whenue e mọnú whla tintan to gbẹzan etọn mẹ!

E paṣa kọmẹnu po mẹdevo he yọ́n ẹn dai lẹ po to whenue yé mọdọ e ko jẹ numọ ji. Yé kanse dọ, “Dawe he nọ sinai bo nọ to nubiọ dai lọ die, kavi e ma yin mọ wẹ?” Mẹdelẹ dọ dọ, “Ewọ lọ wẹ.” Ṣigba, e vẹawuna mẹdevo lẹ nado yí ehe sè, bọ yé dọmọ: “Gbede, ṣigba e di i wẹ.” Dawe lọ lọsu gblọn dọmọ: “Yẹn wẹ.”—Johanu 9:8, 9.

Enẹwutu, yé kanse e dọmọ: “To whelọnu lo, nawẹ nukun towe lẹ wagbọn do hùn?” E gblọn dọmọ: “Dawe lọ he nọ yin Jesu wẹ yàn okọ́ bo tlẹ́ ẹ do nukun ṣie lẹ ji bosọ dọna mi dọ, ‘Yì Siloami mẹ bo klọ́ ẹ.’ To whenẹnu, yẹn yì bo klọ́ ẹ bosọ mọnú.” Enẹgodo, yé kanse e dọmọ: “Fie wẹ dawe enẹ te?” Nubiọdutọ lọ sọ gblọn dọmọ: “Yẹn ma yọnẹn.”—Johanu 9:10-12.

Gbẹtọ lọ lẹ plan dawe lọ yì Falesi lẹ dè, na yelọsu jlo na yọ́n lehe e wagbọn do jẹ numọ ji. E dọna yé dọmọ: “E sá okọ́ yinyan do nukun ṣie lẹ ji, yẹn sọ klọ́ ẹ bo mọnú.” Nuhe sọgbe wẹ e na ko yin dọ Falesi lẹ ni jaya hẹ dawe nubiọdutọ he yin azọ̀nhẹngbọna lọ. Kakatimọ, mẹdelẹ to yé mẹ gblewhẹdo Jesu dọmọ: “Dawe ehe ma wá sọn Jiwheyẹwhe dè gba, na e ma nọ yìn Gbọjẹzan wutu.” Etomọṣo, mẹdevo lẹ dọmọ: “Nawẹ dawe de he yin ylandonọ sọgan basi ohia mọnkọtọn lẹ gbọn?” (Johanu 9:15, 16) Enẹwutu, kinklan biọ ṣẹnṣẹn yetọn.

Na yé tindo pọndohlan voovo ehelẹ wutu, yé lẹhlan dawe he ko to numọ todin lọ bo kanse e dọmọ: “Etẹwẹ hiẹ dọ gando ewọ go, to whenue e yindọ ewọ hùn nukun towe lẹ?” Dawe lọ ma tindo ayihaawe depope gando Jesu go, podọ e gblọn dọmọ: “Yẹwhegán de wẹ ewọ.”—Johanu 9:17.

Ju lẹ gbẹ́ nado yí ehe sè. Yé sọgan ko lẹndọ sébibla de tin to Jesu po dawe lọ po ṣẹnṣẹn nado doyẹklọ gbẹtọ lẹ. Yé wá tadona kọ̀n dọ aliho dopo nado didẹ whẹho lọ wẹ nado kanhose mẹjitọ nubiọdutọ lọ tọn lẹ, vlavo eyin nukuntọ́nnọ wẹ dawe lọ yin nugbonugbo to dai.