Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 80

Lẹngbọhọtọ Dagbe lọ po Lẹngbọpo lọ lẹ Po

Lẹngbọhọtọ Dagbe lọ po Lẹngbọpo lọ lẹ Po

JOHANU 10:1-21

  • JESU DỌHODO LẸNGBỌHỌTỌ DAGBE LỌ PO LẸNGBỌPO LỌ LẸ PO JI

Dile Jesu zindonukọn bo to mẹplọn to Jude, e dọ̀n ayidonugo todoaitọ etọn lẹ tọn wá nuhe yé sọgan yawu mọnukunnujẹemẹ de ji—enẹ wẹ lẹngbọ po lẹngbọpo lẹ po. Ṣigba, yẹhiadonu-liho wẹ e to hodọ te. Ju lẹ sọgan ko flin hogbe Davidi tọn lẹ dọmọ: “Jehovah wẹ Lẹngbọhọtọ ṣie. Yẹn ma na jẹdò nudepope tọn. E nọ hẹn mi mlọnai to fie amakikọ sù te.” (Psalm 23:1, 2) Psalm-kantọ devo basi oylọna akọta lọ dọmọ: “Mì gbọ mí ni jẹklo to Jehovah, Mẹdatọ mítọn nukọn. Na ewọ wẹ Jiwheyẹwhe mítọn, podọ míwlẹ wẹ omẹ etọn lẹ, bọ ewọ nọ penukundo mí go di lẹngbọ lẹ to kanlindugbo de mẹ.” (Psalm 95:6, 7) Na nugbo tọn, e ko dẹn bọ Islaelivi lẹ to Osẹ́n lọ glọ nọ yin yiyijlẹdo pipli lẹngbọ lẹ tọn de go.

“Lẹngbọ” ehelẹ tin to “lẹngbọpo” de mẹ to linlẹn lọ mẹ dọ yé yin jiji do alẹnu Osẹ́n Mose tọn mẹ. Osẹ́n lọ taidi adó de, he klan yé sọn nuyiwadomẹji ylankan mẹhe lẹdo yé bo ma tin to tito ehe glọ lẹ tọn go. Ṣigba, delẹ to Islaelivi lẹ mẹ yinuwa hẹ lẹngbọpa Jiwheyẹwhe tọn to aliho agọ̀ mẹ. Jesu dọmọ: “Nugbonugbo wẹ yẹn dọna mì dọ, Ewọ he ma gbọn ohọ̀n lọ nù biọ lẹngbọpo lọ mẹ ṣigba he hẹji gbọn fidevo biọ e mẹ, ajotọ po whébẹtọ po wẹ omẹ enẹ. Ṣigba, ewọ he gbọn ohọ̀n lọ nù biọ e mẹ wẹ lẹngbọhọtọ lẹngbọ lẹ tọn.”—Johanu 10:1, 2.

Gbẹtọ lọ lẹ sọgan ko lẹnnupọndo sunnu he sọalọakọ́n dọ emi yin Mẹsia kavi Klisti lọ lẹ ji. Omẹ enẹlẹ taidi ajotọ lẹ po whébẹtọ lẹ po. Enẹwutu, gbẹtọ lọ lẹ ma dona hodo mẹklọtọ mọnkọtọn lẹ. Kakatimọ, yé dona hodo “lẹngbọhọtọ lẹngbọ lẹ tọn,” mẹhe Jesu dọho gandego dọmọ:

“Họ̀njinọtọ lọ sọ hùnhọ̀n na ewọ, podọ lẹngbọ lẹ dotoaina ogbè etọn, ewọ sọ ylọ lẹngbọ etọn titi lẹ gbọn oyín yetọn dali bo plan yé tọ́n. To whenue e ko plan etọn titi lẹpo tọ́n, e jẹnukọnna yé, lẹngbọ lẹ sọ hodo e, na yé yọ́n ogbè etọn wutu. Jonọ de wẹ yé ma na hodo to aliho depope mẹ, ṣigba yé na họnyi sọn ewọ dè, na yé ma yọ́n ogbè jonọ lẹ tọn wutu.”—Johanu 10:3-5.

To ojlẹ de mẹ wayi, Johanu Baptizitọ lọ yinuwa taidi họ̀njinọtọ de bo do Jesu hia taidi mẹhe lẹngbọ yẹhiadonu tọn he tin to Osẹ́n glọ lẹ dona hodo. Humọ, lẹngbọ delẹ to Galili podọ tofi to Jude, ko yọ́n ogbè Jesu tọn. Fie wẹ e na ‘plan yé tọ́nyi’? Podọ ale tẹwẹ na wá sọn hihodo e mẹ? Mẹhe to apajlẹ ehe sè delẹ sọgan ko to kanbiọ enẹlẹ kanse yede, na ‘yé ma yọ́n zẹẹmẹ nuhe e to didọna yé lẹ tọn’ wutu.—Johanu 10:6.

Jesu basi zẹẹmẹ dọmọ: “Nugbonugbo wẹ yẹn dọna mì dọ, Yẹn wẹ ohọ̀n lọ na lẹngbọ lẹ. Ajotọ po whébẹtọ po wẹ yemẹpo he wá bo gbọn lalo dali yí oyín ṣie zan lẹ; ṣigba lẹngbọ lẹ ma dotoaina yé gba. Yẹn wẹ ohọ̀n lọ; mẹdepope he gbọn yẹn nù biọ e mẹ na yin whinwhlẹngán, podọ ewọ na biọ e mẹ bo tọ́n bosọ mọ kanlindugbo.”—Johanu 10:7-9.

E họnwun dọ onú yọyọ de hodọ wẹ Jesu te. Todoaitọ etọn lẹ yọnẹn dọ ewọ ma yin ohọ̀n he nù yé na gbọn biọ alẹnu Osẹ́n tọn lọ mẹ, ehe ko tin sọn owhe kanweko susu die. Enẹwutu, nuhe dọ e te wẹ yindọ lẹngbọ he e “plan tọ́n” lẹ dona biọ lẹngbọpo devo mẹ. Kọdetọn tẹwẹ ehe na hẹnwa?

Jesu basi zẹẹmẹ do azọngban etọn ji yinukọn dọmọ: “Yẹn wá na yé nido tindo ogbẹ̀ podọ nado sọgan tindo e to gigọ́ mẹ. Yẹn wẹ lẹngbọhọtọ dagbe lọ; lẹngbọhọtọ dagbe nọ ze alindọn etọn jo do ota lẹngbọ lẹ tọn mẹ.” (Johanu 10:10, 11) Jesu ko miọnhomẹna devi etọn lẹ wayi dọmọ: “Mì dibu blo, lẹngbọpa pẹvi, na Otọ́ mìtọn mọdọ e jẹ nado na mì Ahọluduta lọ.” (Luku 12:32) Na nugbo tọn, mẹhe “lẹngbọpa pẹvi” lọ bẹhẹn lẹ wẹ mẹhe Jesu na plan yì lẹngbọpo yọyọ lọ mẹ, na yé nido sọgan “tindo ogbẹ̀ podọ nado sọgan tindo e to gigọ́ mẹ.” Dona nankọ die nado yin apadewhe lẹngbọpo enẹ tọn!

Ṣigba, Jesu ma fó whẹho lọ do finẹ. E dọmọ: “Yẹn sọ tindo lẹngbọ devo lẹ, he ma yin apó ehe tọn; yewlẹ ga wẹ yẹn dona hẹnwa, yé nasọ dotoaina ogbè ṣie, podọ yé na lẹzun lẹngbọpa dopo, lẹngbọhọtọ dopo.” (Johanu 10:16) “Lẹngbọ devo” ehelẹ “ma yin apó ehe tọn.” Enẹwutu, apó devo mẹ wẹ yé na yin bibẹdo, ehe gbọnvona “lẹngbọpa pẹvi” lọ tọn he na dugu Ahọluduta lọ tọn. Todido voovo wẹ lẹngbọpo awe ehelẹ tindo. Etomọṣo, lẹngbọ he tin to lẹngbọpo awe ehelẹ mẹ wẹ na mọaleyi sọn azọngban Jesu tọn mẹ. E dọmọ: “Ehe wutu wẹ Otọ́ lọ yiwanna mi, na yẹn ze alindọn ṣie jo.”—Johanu 10:17.

Mẹsusu to gbẹtọgun lọ mẹ yigbe dọmọ: “E tindo aovi de bosọ hùnalẹ̀.” Ṣigba, mẹdevo lẹ dohia dọ yé tindo ojlo to nuhe dọ e te mẹ bosọ yin whinwhàn nado hodo Lẹngbọhọtọ Dagbe lọ. Yé dọmọ: “Ohó ehelẹ ma taidi mẹhe tindo aovi de tọn gba. Aovi de ma sọgan hùn nukun nukuntọ́nnọ lẹ tọn, kavi e sọgan wàmọ wẹ?” (Johanu 10:20, 21) E họnwun dọ yé to hodọ gando dawe he yin jiji di nukuntọ́nnọ bọ Jesu hẹnazọ̀ngbọna wayi lọ go.