Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 77

Jesu Na Ayinamẹ Gando Adọkunnu lẹ Go

Jesu Na Ayinamẹ Gando Adọkunnu lẹ Go

LUKU 12:1-34

  • APAJLẸ DAWE ADỌKUNNỌ LỌ TỌN

  • JESU DỌHO GANDO OHỌ́N LẸ PO VOUNVOUN LẸ PO GO

  • “LẸNGBỌPA PẸVI” DE HE NA TIN TO AHỌLUDUTA LỌ MẸ

Dile Jesu to núdù to owhé Falesi lọ tọn gbè, gbẹtọ fọtọ́n susu lẹ ko pli dopọ do gbonu owhé lọ tọn bo to tenọpọn ẹn. E ko tindo numimọ mọnkọtọn lẹ wayi po gbẹtọgun lẹ po to Galili. (Malku 1:33; 2:2; 3:9) To Jude, mẹsusu jlo na mọ ẹn bo sè hodidọ etọn, podọ nuyiwa yetọn gbọnvona Falesi he e dùnú hẹ lẹ tọn.

Nuhe Jesu dọ jẹnukọn tindo zẹẹmẹ vonọtaun na devi etọn lẹ: “Mì payi otọ́n Falesi lẹ tọn, he yin yẹnuwiwa go.” Jesu ko na avase ehe wayi, ṣigba nuhe e mọ to whenue e to núdù hẹ Falesi lẹ do obá he mẹ avase ehe yin whẹho niyaniya tọn jẹ hia. (Luku 12:1; Malku 8:15) Falesi lẹ sọgan tẹnpọn nado whlá kanyinylan yetọn gbọn yede didohia taidi mẹhe nọ ze yede jo na Jiwheyẹwhe lẹ dali, ṣigba owùnu he dona yin didegbà wẹ yé yin. Jesu basi zẹẹmẹ dọmọ: “Nudepope ma tin he yin whiwhla po sọwhiwhe po he ma na wá yin didehia, podọ he yin aṣli he ma na wá yin yinyọnẹn.”—Luku 12:2.

E taidi dọ susu to mẹhe lẹdo Jesu lẹ mẹ wá sọn Jude bo ma ko sè bọ e plọnmẹ to Galili pọ́n. Enẹwutu, e vọ́ nuagokun he ji e ko dọhodo wayi lẹ dọ. E na tuli mẹhe to todoaina ẹn lẹpo dọmọ: “Mì dibusi yé he nọ hù agbasa podọ to enẹgodo masọ penugo nado wà nudepope ba lẹ blo.” (Luku 12:4) Dile e ko basi do wayi, e zinnudeji dọ hodotọ emitọn lẹ dona deji dọ Jiwheyẹwhe na penukundo yé go. Yé sọ dona kẹalọyi Visunnu gbẹtọ tọn bosọ yọnẹn dọ Jiwheyẹwhe sọgan gọalọna yé.—Matiu 10:19, 20, 26-33; 12:31, 32.

Enẹgodo, dawe de to gbẹtọgun lọ mẹ dọ nuhe to ahunmẹduna ẹn to ogàn enẹ mẹ dọmọ: “Mẹplọntọ, dọna nọvisunnu ṣie nado má ogú lọ hẹ mi.” (Luku 12:13) Osẹ́n lọ ko dọ dọ viplọnji wẹ dona yí mimá awe ogú de tọn, enẹwutu whẹgbè de ma dona tin. (Deutelonomi 21:17) Ṣigba, e taidi dọ dawe ehe jlo na yí hugan nuhe Osẹ́n lọ na ẹn jlọjẹ nado yí. Jesu yí nuyọnẹn zan bo gbẹ́ nado dádo whẹho lọ mẹ. E kanse e dọmọ: “Dawe, mẹnu wẹ de mi taidi whẹdatọ kavi numátọ do mì omẹ awe lẹ ji?”—Luku 12:14.

Enẹgodo, Jesu na ayinamẹ sinsinyẹn ehe mẹlẹpo dọmọ: “Mì hùn nukun mìtọn lẹ bo họ́ mìde sọta nukunkẹn wunmẹ lẹpo, na eyin mẹde tlẹ tindo susugege, nutindo etọn lẹ ma nọ na ẹn ogbẹ̀.” (Luku 12:15) Mahopọnna lehe adọkunnu he mẹde tindo lẹ sù sọ, be e ma na kú to gbèdopo bo jo onú enẹ lẹpo do ya? Jesu zinnudo nuagokun enẹ ji gbọn apajlẹ he ma sọgan yin winwọn de nina dali, ehe sọ dohia dọ nujọnu wẹ eyin nado tindo oyín dagbe de to Jiwheyẹwhe dè:

“Aigba dawe adọkunnọ de tọn de sinsẹ́n susu tọ́n. Enẹwutu, e jẹ linlẹn ji to ede mẹ dọmọ, ‘Etẹwẹ yẹn na wà, todin he yẹn ma tindo fidepope nado bẹ jinukun ṣie lẹ do?’ Enẹgodo, e dọmọ, ‘Nuhe yẹn na wà die: Yẹn na họ́ agbànhọ ṣie lẹ liai bo na gbá dehe klo humọ lẹ, bọ finẹ wẹ yẹn na bẹ likun ṣie lẹpo podọ onú dagbe ṣie lẹpo do, yẹn nasọ dọna alindọn ṣie dọmọ: “Alindọn, hiẹ tindo onú susu he ko yin bibẹpli dai he hiẹ na yizan na owhe susu; hiẹ ni vò, bo nọ dù, bo nọ nù bosọ nọ dugbẹ.”’ Ṣigba, Jiwheyẹwhe dọna ẹn dọ, ‘Hiẹ nulunọ, to ozán ehe mẹ, yè to alindọn towe biọ sọn dè we. To whelọnu lo, mẹnu tọn wẹ nuhe hiẹ bẹpli lẹ na yin?’ Mọ wẹ e nọ yì do na omẹ lọ he bẹ adọkun pli na ede ṣigba bo ma yin adọkunnọ hlan Jiwheyẹwhe.”—Luku 12:16-21.

Devi Jesu tọn lẹ po mẹdevo he to ohó etọn sè lẹ po sọgan jẹ omọ̀ adọkunnu lẹ dindin kavi bibẹpli tọn mẹ. Kavi nutindo gbẹ̀mẹ tọn lẹ sọgan fẹayihasẹna yé sọn Jehovah sinsẹ̀n mẹ. Enẹwutu, Jesu vọ́ ayinamẹ dagbe he e na to nudi owhe dopo daa die to Yẹwhehodidọ Osó ji tọn etọn whenu dọ:

“Mì sọ yin magbọjẹnọ na alindọn mìtọn gando nuhe mì na dù go kavi na agbasa mìtọn gando nuhe mì na do go ba blo. . . . Mì doayi ohọ́n lẹ go. Yé ma nọ do jinukun kavi gbẹ̀n; yé ma nọ tindo zínhọ kavi agbànhọ. Ṣogan, Jiwheyẹwhe nọ na núdùdù yé. Be mìwlẹ ma họakuẹ tlala hú ohẹ̀ lẹ wẹ ya? . . . Mì doayi lehe vounvoun lẹ nọ whẹ́n do go; yé ma nọ wazọ́n kavi gbẹ̀n sekan, ṣigba yẹn dọna mì dọ: Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ. . . . Enẹwutu, mì sọ yin magbọjẹnọ gando nuhe mì sọgan dù po nuhe mì sọgan nù po go blo, podọ mì doalọtena magbọjẹ he ma yin dandan tọn . . . Otọ́ mìtọn olọn tọn yọnẹn dọ mì tindo nuhudo onú ehelẹ tọn. . . . Mì to Ahọluduta etọn dín zọnmii, podọ onú ehelẹ na yin yiyidogọ na mì.”—Luku 12:22-31; Matiu 6:25-33.

Mẹnu lẹ wẹ na to Ahọluduta Jiwheyẹwhe tọn dín? Jesu dohia dọ gbẹtọ sọha kleun de, yèdọ “lẹngbọpa pẹvi” de to gbẹtọvi he yin nugbonọ lẹ mẹ wẹ na wàmọ. To nukọn mẹ, e na wá yin didehia dọ gbẹtọ 144 000 poun wẹ yé na yin. Etẹwẹ tin to sẹdotẹnmẹ na yé? Jesu hẹn yé deji dọmọ: “Otọ́ mìtọn mọdọ e jẹ nado na mì Ahọluduta lọ.” Omẹ ehelẹ ma na na ayidonugo adọkunnu lẹ bibẹpli do aigba ji, ehe ajotọ lẹ sọgan fìn gba. Kakatimọ, ayiha yetọn na to “adọkun he ma nọ vọ̀ gbede [to] olọn mẹ” lẹ ji, fie yé na dugán hẹ Klisti te.—Luku 12:32-34.