Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 67

“Omẹ Devo de Ma Ko Dọho Domọ Pọ́n Gbede”

“Omẹ Devo de Ma Ko Dọho Domọ Pọ́n Gbede”

JOHANU 7:32-52

  • PONỌ LẸ YIN DIDOHLAN NADO WLE JESU

  • NIKODẸMI YIAVÙNLỌNA JESU

Jesu gbẹ́ pò to Jelusalẹm to Hùnwhẹ Gòhọtúntún tọn tẹnmẹ. Homẹ etọn hùn dọ “mẹsusu to gbẹtọgun lọ mẹ tindo yise to ewọ mẹ.” Ṣigba, homẹ sinsẹ̀ngán lẹ tọn ma hùn. Yé do ponọ yetọn lẹ hlan nado wle e. (Johanu 7:31, 32) Etomọṣo, Jesu ma tẹnpọn nado họnbẹ.

Kakatimọ, Jesu zindonukọn nado to nuplọnmẹ to gbangba to Jelusalẹm. E dọmọ: “Yẹn na gbẹ́ nọ mì dè na ojlẹ vude dogọ whẹpo yẹn nado yì ewọ he do mi hlan lọ dè. Mìwlẹ na dín mi, ṣigba mì ma na mọ mi, podọ fihe yẹn na te mìwlẹ ma sọgan wá.” (Johanu 7:33, 34) Ju lẹ ma mọnukunnujẹ nuhe dọ e te mẹ, enẹwutu yé dọ to yedelẹ ṣẹnṣẹn dọmọ: “Fie wẹ dawe ehe to linlẹn nado yì, bọ mí ma na mọ ẹn? Be linlẹn wẹ e te nado yì Ju he gbàpe to Glẹkinu lẹ ṣẹnṣẹn lẹ dè nado plọn Glẹkinu lẹ ya? Etẹ dọ wẹ e te to whenue e dọ dọ, ‘Mìwlẹ na dín mi, ṣigba mì ma na mọ mi, podọ fihe yẹn na te mìwlẹ ma sọgan wá’?” (Johanu 7:35, 36) Ṣigba, Jesu to hodọ gando okú po fọnsọnku etọn yì olọn mẹ po go, podọ kẹntọ etọn lẹ ma sọgan hodo e yì finẹ.

Azán ṣinawetọ hùnwhẹ lọ tọn die. To afọnnu lẹpo to hùnwhẹ lọ whenu, yẹwhenọ de nọ kọ̀n osin he e dà sọn Tándo Siloami tọn mẹ do odò de mẹ bọ e nọ sà jẹ agbà tẹmpli lọ tọn kọ̀n. Vlavo nado flinnu gbẹtọ lẹ gando aṣa enẹ go, Jesu dọ po ogbè lélé po dọmọ: “Eyin nugbla to mẹdepope hù, gbọ e ni wá dè e nado nù. Ewọ he tindo yise to yẹn mẹ, kẹdẹdile Owe-wiwe ko dọ do, ‘Ohò etọn mẹ wẹ asisa osin ogbẹ̀ tọn na nọ sà sọn.’”—Johanu 7:37, 38.

Jesu to alọdlẹndo nuhe na wá jọ to whenue devi etọn lẹ na yin yiyiamisisadode po gbigbọ wiwe po bo tindo todido nado nọgbẹ̀ to olọn mẹ. Enẹ na wá aimẹ to okú Jesu tọn godo, to azán Pẹntikọsti owhe he bọdego tọn gbè. To azán enẹ gbè, devi he yin yiyiamisisadode gbọn gbigbọ wiwe dali lẹ na jẹ nugbo lọ má hẹ gbẹtọ lẹ ji, podọ to ojlẹ enẹ mẹ, asisa osin ogbẹ̀-namẹ tọn lẹ na jẹ sisà ji.

Nuplọnmẹ Jesu tọn lẹ yinuwado mẹdelẹ ji bọ yé dọmọ: “Matin ayihaawe, Yẹwhegán lọ die,” podọ e họnwun dọ yẹwhegán dopagbe he klohugan Mose lọ wẹ yé to alọdlẹndo. Mẹdevo lẹ dọmọ: “Klisti lọ die.” Ṣigba, mẹdevo lẹ jẹ nudọn ji dọmọ: “Na taun tọn, Klisti lọ ma na wá sọn Galili, kavi e ma yin mọ wẹ? Be Owe-wiwe ma ko dọ dọ kúnkan Davidi tọn mẹ wẹ Klisti lọ na wá sọn, podọ Bẹtlẹhẹm he yin gbétatò he mẹ Davidi ko nọ dai lọ mẹ wẹ e na wá sọn ya?”—Johanu 7:40-42.

Enẹwutu, kinklan wá gbẹtọgun lọ ṣẹnṣẹn. Dile etlẹ yindọ mẹdelẹ jlo dọ yè ni wle Jesu, mẹdepope ma penugo nado doalọ e go. To whenue ponọ lọ lẹ ma lẹkọwa sinsẹ̀ngán lọ lẹ dè po Jesu po, yẹwhenọgán lẹ po Falesi lẹ po kanse yé dọmọ: “Naegbọn mì ma hẹn ẹn wá?” Ponọ lọ lẹ gblọn dọmọ: “Omẹ devo de ma ko dọho domọ pọ́n gbede.” Po homẹgble po, sinsẹ̀ngán lẹ yí hogbe mẹṣanko po mẹzunzun po tọn lẹ zan na yé dọmọ: “Be mìlọsu lẹ ko yin hinhẹn buali ga wẹ? Depope to ogán lẹ mẹ kavi to Falesi lẹ mẹ ma ko tindo yise to ewọ mẹ, kavi mẹde ko wàmọ wẹ? Ṣigba, gbẹtọgun ehe, he ma yọ́n Osẹ́n lọ wẹ mẹhodẹ̀do lẹ.”—Johanu 7:45-49.

To whenẹnu, Nikodẹmi, he yin Falesi de bosọ yin dopo to hagbẹ Whẹdatẹn Daho Ju lẹ tọn mẹ yí adọgbigbo do yiavùnlọna Jesu. To nudi owhe awe daa die, Nikodẹmi wá Jesu dè to zánmẹ bo do yise hia to ewọ mẹ. Todin, Nikodẹmi dọmọ: “Osẹ́n mítọn ma nọ dawhẹna mẹde adavo e sè ohó etọn bo yọ́n nuhe e to wiwà lọ whẹ́, kavi e ma yin mọ wẹ?” Nado yiavùnlọna yede, yé gblọn dọmọ: “Kavi Galili wẹ hiẹ lọsu wá sọn ya? Dindona, hiẹ nasọ mọdọ yẹwhegán de ma sọgan wá sọn Galili.”—Johanu 7:51, 52.

Owe-wiwe lẹ ma dọ tlọlọ dọ yẹwhegán de na wá sọn Galili. Etomọṣo, Ohó Jiwheyẹwhe tọn dohia dọ Klisti lọ na wá sọn finẹ; e dọ dọdai dọ “hinhọ́n daho de” na yin mimọ to “Galili akọta lẹ tọn.” (Isaia 9:1, 2; Matiu 4:13-17) Humọ, dile e ko yin didọdai do, Jesu yin jiji to Bẹtlẹhẹm bosọ wá sọn kúnkan Davidi tọn mẹ. Dile etlẹ yindọ Falesi lẹ sọgan ko yọ́n ehe, e taidi dọ yewlẹ wẹ hẹn linlẹn agọ̀ susu gbayipe gando Jesu go.