Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 39

Dindọn Hlan Whẹndo de He Ma Tindo Ojlo

Dindọn Hlan Whẹndo de He Ma Tindo Ojlo

MATIU 11:16-30 LUKU 7:31-35

  • JESU GBLEWHẸDO TÒDAHO DELẸ

  • EWỌ NAMẸ KỌGBỌ BO FAKỌNAMẸ

Jesu tindo sisi na Johanu Baptizitọ taun, amọ́ nukun tẹwẹ suhugan gbẹtọ lẹ tọn nọ yí do pọ́n Johanu? Jesu dọmọ: “Whẹndo ehe . . . taidi yọpọvu lẹ he to aisinsin to ahimẹ bo to awhádo hlan aihunda-gbẹ́ yetọn lẹ, dọmọ: ‘Míwlẹ kúnván na mì, ṣigba mìwlẹ ma dúwe; míwlẹ doavihàn, ṣigba mì ma do awubla hia.’”—Matiu 11:16, 17.

Etẹ na dọ wẹ Jesu te? E hẹn linlẹn lọ họnwun dọmọ: “Johanu wá, bo ma nọ dù bo masọ nọ nù, ṣigba gbẹtọ lẹ dọ dọ, ‘Ewọ tindo aovi de.’ Visunnu gbẹtọ tọn sọ wá bo to dùdù bosọ to nùnù, amọ́ gbẹtọ lẹ dọ dọ, ‘Mì pọ́n! Dawe adọ̀whẹnnọ de he jo ede na ovẹn nùnù, họntọn tòkuẹ-ṣinyantọ lẹ po ylandonọ lẹ po tọn.’” (Matiu 11:18, 19) To linlẹn de mẹ, Johanu zan gbẹzan he bọawu taidi Nazili de bo ma tlẹ nọ nù ovẹn, ṣogan whẹndo ehe dọ dọ e tindo aovi de. (Osọha lẹ 6:2, 3; Luku 1:15) To alọ devo mẹ, Jesu nọgbẹ̀ taidi gbẹtọ paa lẹ. E nọ nọ̀ jlẹkaji to dùdù po nùnù po mẹ, ṣogan gbẹtọ lẹ sawhẹdokọna ẹn dọ e nọ zẹ̀pá. E taidi dọ nude ma tin he yè na wà he na jẹ omẹ lọ lẹ tọn ji.

Jesu yí whẹndo lọ jlẹdo yọpọvu he to ahimẹ lẹ go, mẹhe gbẹ́ nado dúwe to whenue ovi devo lẹ to ován kún kavi nado do awubla hia to whenue mẹdevo lẹ to avihàndo. E dọmọ: “Etomọṣo, nuyọnẹn nọ yin didohia di dodonọ gbọn azọ́n etọn lẹ dali.” (Matiu 11:16, 19) Mọwẹ, “azọ́n” lẹ—enẹ wẹ kunnudenu he Johanu po Jesu po na lẹ—dohia dọ owhẹ̀ he yin sisadokọna yé lẹ ma yin nugbo.

To whenue Jesu ko dohia dọ whẹndo ehe ma tindo ojlo godo, e gblewhẹdo tòdaho Kolazin, Bẹtsaida po Kapẹlnaumi po tọn lẹ dovo. E ko wà azọ́njiawu lẹ to tòdaho ehelẹ mẹ. Jesu dọ dọ eyin emi ko wà azọ́njiawu enẹlẹ to Tile po Sidoni po, he yin tòdaho Fenike tọn lẹ wẹ, tòdaho enẹlẹ na ko lẹnvọjọ. E sọ donù Kapẹlnaumi go, yèdọ tòdaho de he mẹ e nọ na ojlẹ de. Etlẹ yin to finẹ, mẹsusu ma do ojlo hia. Jesu dọ gando tòdaho enẹ go dọmọ: “E na pọnte na otò Sodọmi tọn to Whẹdazangbe hú na hiẹ.”—Matiu 11:24.

Enẹgodo, Jesu pà Otọ́ etọn, mẹhe whlá nugbo họakuẹ Biblu tọn lẹ “do nuyọnẹntọ lẹ po weyọnẹntọ lẹ po” ṣigba bo de yé hia mẹhe taidi ovivu lẹ. (Matiu 11:25) E basi oylọ he whànmẹ de na omẹ mọnkọtọn lẹ dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na mìde. Na zẹgẹ ṣie bọawu bọ agbàn ṣie sọ fua.”—Matiu 11:28-30.

Nawẹ Jesu fakọnamẹ gbọn? Sinsẹ̀ngán lẹ ko doagban pinpẹn na gbẹtọ lẹ po aṣa he nọ hẹnmẹ zun afanumẹ lẹ po, taidi osẹ́n hẹngogo tọn susu he gando Gbọjẹzan go lẹ. Ṣigba, Jesu fakọna yé gbọn nugbo Jiwheyẹwhe tọn pinplọn yé dali, yèdọ nugbo he ma yin hinhẹnflu gbọn aṣa enẹlẹ dali. Ewọ sọ do aliho kọgbọ tọn hia mẹhe gandudomẹji tonudọtọ lẹ tọn ko gbidikọna lẹ po mẹhe agbàn ylando tọn to pinpẹn lẹ po. Mọwẹ, Jesu dehia yé lehe ylando yetọn lẹ sọgan yin jijona yé bọ yé na tin to jijọho mẹ hẹ Jiwheyẹwhe do.

Mẹhe kẹalọyi zẹgẹ Jesu tọn he bọawu lẹpo sọgan klan yede do wiwe na Jiwheyẹwhe bo sẹ̀n Otọ́ olọn mẹ tọn mítọn he yin awuvẹmẹtọ podọ lẹblanunọ. Mọwiwà ma nọ pẹnagbànmẹ paali, na nubiọtomẹsi Jiwheyẹwhe tọn lẹ ma nọ pẹnagbànmẹ wutu.—1 Johanu 5:3.