Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 23

Jesu Wà Azọ́njiawu lẹ to Kapẹlnaumi

Jesu Wà Azọ́njiawu lẹ to Kapẹlnaumi

MATIU 8:14-17 MALKU 1:21-34 LUKU 4:31-41

  • JESU YÀN AOVI DE

  • ASI-NỌ̀ PITA TỌN YIN AZỌ̀NHẸNGBỌNA

Jesu ko basi oylọna devi ẹnẹ—yèdọ Pita, Andle, Jakọbu po Johanu po—nado lẹzun whèhutọ gbẹtọ lẹ tọn. Todin, to Gbọjẹzangbe, yemẹpo yì sinagọgu lẹdo lọ tọn de mẹ to Kapẹlnaumi. Jesu plọnnumẹ to sinagọgu lọ mẹ, podọ whladopo dogọ awuji gbẹtọ lẹ gando aliho mẹpinplọn tọn etọn go. E nọ plọnmẹ taidi mẹhe tindo aṣẹ, e ma yin taidi wekantọ lẹ gba.

To Gbọjẹzan ehe gbè, dawe he tindo aovi de to finẹ. Dawe lọ yí ogbè lélé do dawhá to sinagọgu lọ mẹ dọmọ: “Etẹwẹ míwlẹ tindo nado wà hẹ we, hiẹ Jesu Nazalẹti tọn? Be hiẹ wá nado và mí sudo wẹ? Yẹn yọ́n mẹhe hiẹ yin na taun tọn, hiẹ wẹ Omẹ Wiwe Jiwheyẹwhe tọn.” Jesu gbẹnuna aovi he to anadena dawe lọ bo dọmọ: “Nabọẹ, bo tọ́n sọn ewọ mẹ!”—Malku 1:24, 25.

To whenẹnu, gbigbọ ylankan lọ dlan dawe lọ do kọmẹ bo húnhún in gìgìgì bosọ yí ogbè lélé do dawhá. Ṣigba, aovi lọ tọ́n sọn dawe lọ mẹ “bo ma gbleawuna ẹn.” (Luku 4:35) E paṣa mẹhe lẹdo e pé to sinagọgu lọ mẹ lẹ taun! Yé sọ kanbiọ dọmọ: “Etẹ die? . . . E tlẹ nọ degbedo gbigbọ mawé lẹ, bọ yé nọ setonuna ẹn.” (Malku 1:27) E họnwun dọ nujijọ ayidego tọn ehe yin lilá pé gbọn Galili pete.

Whenue Jesu po devi etọn lẹ po ko tọ́n sọn sinagọgu lọ mẹ, yé yì owhé Simọni kavi Pita tọn gbè. Yé mọ asi-nọ̀ Pita tọn to finẹ bọ e to azọ̀n agbasa-hùnmiyọ́n tọn sinsinyẹn de jẹ. Yé sọ vẹ̀ Jesu nado gọalọna ẹn. Enẹwutu, Jesu sẹyì e dè bo hẹn alọ etọn go bosọ ze e fọ́n. To afọdopolọji, ewọ yin azọ̀nhẹngbọna bo jẹ lizọnyina Jesu po devi he to finẹ hẹ ẹ lẹ po ji, vlavo gbọn núdùdù de didà na yé dali.

To nudi whèjai, gbẹtọ lẹ tọ́n sọn ofi voovo bo wá owhé Pita tọn gbè po awutunọ yetọn lẹ po. E ma dẹn bọ e taidi dọ tòdaho lọ blebu wẹ pli do ohọ̀n lọ ji nkọ. Etẹwutu? Yé to azọ̀nhẹngbọ dín. Na nugbo tọn, “mẹhe tindo awutunọ he to azọ̀n voovo jẹ lẹpo hẹn yé wá e dè. E [sọ] nọ hẹnazọ̀ngbọna yé gbọn alọ etọn lẹ zizedo dopodopo yetọn ji dali.” (Luku 4:40) Mọwẹ, mahopọnna azọ̀n wunmẹ he jẹ yé te, Jesu nọ gọalọna yé kẹdẹdile e ko yin didọdai do. (Isaia 53:4) E tlẹ sọ yàn aovi lẹ jẹgbonu sọn mẹhe tindo aovi lẹ mẹ. Dile gbigbọ ylankan lọ lẹ to tintọ́njẹgbonu, yé nọ dawhá dọ: “Hiẹ wẹ Visunnu Jiwheyẹwhe tọn.” (Luku 4:41) Ṣigba, Jesu nọ gbẹnuna yé bo ma nọ dike yé nisọ dọho ba. Yé yọnẹn dọ Jesu wẹ Klisti lọ, amọ́ ewọ ma jlo dọ yé ni to nuyiwa taidi dọ Jiwheyẹwhe nugbo lọ sẹ̀n wẹ yé te nkọ.