Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 27

Matiu Yin Oylọ-Basina

Matiu Yin Oylọ-Basina

MATIU 9:9-13 MALKU 2:13-17 LUKU 5:27-32

  • JESU BASI OYLỌNA MATIU TÒKUẸ-ṢINYANTỌ LỌ

  • KLISTI KỌNAWUDOPỌ HẸ YLANDO LẸ NADO GỌALỌNA YÉ

To whenue Jesu ko hẹnazọ̀ngbọna awukuzọ̀njẹtọ lọ godo, e nọ lẹdo Kapẹlnaumi tọn mẹ to Ohù Galili tọn tó na ojlẹ de. Whladopo dogọ, gbẹtọgun lẹ wá e dè bọ e jẹ nuplọn yé ji. Dile e to zọnlinzin jei, e mọ Matiu he sọ nọ yin yiylọdọ Levi to aisinsin to tòkuẹ-ṣinyantẹn. Jesu basi oylọ ayidego tọn de na ẹn dọmọ: “Lẹzun hodotọ ṣie.”—Matiu 9:9.

Vlavo Matiu na ko jẹakọ hẹ nuplọnmẹ Jesu tọn lẹ po azọ́n he e ko wà to lẹdo lọ mẹ lẹ po jẹ obá de mẹ, kẹdẹdi Pita, Andle, Jakọbu po Johanu po. Taidi omẹ ehelẹ, Matiu kẹalọyi oylọ lọ to afọdopolọji. To owe Wẹndagbe tọn etọn mẹ, Matiu basi zẹẹmẹ nujijọ ehe tọn dọmọ: “To whenẹnu, ewọ [Matiu lọsu] fọnṣite bo hodo” Jesu. (Matiu 9:9) Gbọnmọ dali, Matiu jo azọngban tòkuẹ-ṣinyantọ tọn etọn do bo lẹzun devi Jesu tọn.

To nukọn mẹ, Matiu basi hùnwhẹ daho de to owhé etọn gbè, vlavo nado do pinpẹn-nutọn-yinyọnẹn etọn hia na oylọ-basinamẹ vonọtaun Jesu tọn ehe. Mẹnu lẹ wẹ yin oylọ-basina, gbọnvona Jesu po devi etọn lẹ po? Gbẹdohẹmẹtọ hoho Matiu tọn lẹ, yèdọ tòkuẹ-ṣinyantọ devo lẹ lọsu wá ga. Yé nọ ṣinyan tòkuẹ na aṣẹpatọ Lomunu lẹ he mẹsusu gbẹwanna. Ehe bẹ takuẹ yíyí to mẹhe wá glinhún lẹ si, to gbejizọnlinzintọ he nọ gbọn alihogbó ji lẹ si podọ to ajọnu he nọ yin bibẹ yì tògodo lẹ ji hẹn. Nukun tẹwẹ Ju lẹ nọ yí do pọ́n tòkuẹ-ṣinyantọ lẹ to paa mẹ? Gbẹtọ lẹ nọ vlẹ yé, na yé nọ saba gbọn nugbomadọ dali hẹnmẹ nado sú akuẹ he hugan takuẹ he yin bibiọ lọ. Gbọnvona yewlẹ, ‘ylandonọ lẹ,’ yèdọ mẹhe yin yinyọnẹn na ylanwiwa yetọn lẹ lọsu wá hùnwhẹ lọ tẹnmẹ.—Luku 7:37-39.

To whenue Falesi dodonọ-jlatọ he wá otẹn lọ mẹ lẹ mọ Jesu to hùnwhẹ basi po omẹ mọnkọ lẹ po, yé kanse devi etọn lẹ dọmọ: “Naegbọn mẹplọntọ mìtọn do nọ dùnú hẹ tòkuẹ-ṣinyantọ lẹ po ylandonọ lẹ po?” (Matiu 9:11) Jesu gblató nuhe dọ yé te bo gblọn dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ. Enẹwutu, mì yì bo plọn nuhe ehe zẹẹmẹdo, dọ: ‘Lẹblanu wẹ yẹn jlo, e ma yin avọ́sinsan gba.’ Na yẹn ma wá nado ylọ dodonọ lẹ gba, adavo ylandonọ lẹ.” (Matiu 9:12, 13; Hosea 6:6) Whenue Falesi lẹ ylọ Jesu dọ “mẹplọntọ,” e ma yin po ahundopo po, etomọṣo yé sọgan plọn nude sọn e dè gando nuhe sọgbe go.

E taidi dọ Matiu ko basi oylọna tòkuẹ-ṣinyantọ lẹ po ylandonọ lẹ po wá owhé etọn gbè na yé nido dotoaina Jesu bo mọ azọ̀nhẹngbọ gbigbọmẹ tọn yí, “na susu mẹhe tin to finẹ lẹ tọn wẹ to hihodo e.” (Malku 2:15) Jesu jlo na gọalọna yé nado tindo haṣinṣan dagbe hẹ Jiwheyẹwhe. To vogbingbọn mẹ na Falesi dodonọ-jlatọ lẹ, Jesu ma de omẹ ehelẹ pò. Awuvẹmẹ po lẹblanu po wẹ whàn ẹn; ewọ sọgan lẹzun doto gbigbọmẹ tọn de na mẹhe to azọ̀n gbigbọmẹ tọn jẹ lẹpo.

Jesu wàlẹblanuna tòkuẹ-ṣinyantọ lẹ po ylandonọ lẹ po, e ma yin nado miọnnukundo ylando yetọn lẹ, ṣigba nado do numọtolanmẹ sisosiso he e dohia mẹhe to azọ̀njẹ to agbasa-liho lẹ nkọtọn hia yé. Di apajlẹ, flindọ to whenue e yí awuvẹmẹ do doalọ pòtọnọ lọ go, e dọmọ: “Yẹn jlo! Yin hinhẹn zun wiwe.” (Matiu 8:3) Be e ma jẹ dọ mí ni nọ do lẹblanu mọnkọ hia bo nọ nọgodona mẹhe to nuhudo mẹ lẹ, titengbe gbọn alọgigọna yé to gbigbọ-liho dali ya?