Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 31

Likun Yiya to Gbọjẹzangbe

Likun Yiya to Gbọjẹzangbe

MATIU 12:1-8 MALKU 2:23-28 LUKU 6:1-5

  • DEVI LẸ WẸ́N LIKUN TO GBỌJẸZANGBE

  • JESU WẸ “OKLUNỌ GBỌJẸZAN TỌN”

Todin, Jesu po devi etọn lẹ po to gbejizọnlinzin pànta agewaji dedo Galili. Amakikọ-whenu wẹ, podọ likun lẹ to getin go to ogle lẹ mẹ. Na huvẹ to devi lẹ hù wutu, yé wẹ́n ota likun tọn vude bo dù. Ṣigba Gbọjẹzangbe wẹ, Falesi lẹ sọ mọ nuhe wà yé te.

Flindọ e ma dẹn din bọ Ju he to Jelusalẹm delẹ jlo na hù Jesu bo sawhẹdokọna ẹn dọ e gbàsẹ́n Gbọjẹzan tọn. Todin, Falesi lẹ hẹn whẹsadokọnamẹ de wá, sinai do nuyiwa devi etọn lẹ tọn ji. “Pọ́n! Devi towe lẹ to nuhe ma sọgbe hẹ osẹ́n wà to Gbọjẹzangbe.”—Matiu 12:2.

Falesi lẹ nọ dọ dọ eyin mẹde wẹ́n likun bo yí alọ do flé e bosọ dù i, be e ko to jibẹwawhé bosọ to likun flé. (Eksọdusi 34:21) Pọndohlan hẹngogo tọn yetọn gando nuhe nọ yin yiylọdọ azọ́n go ko zọ́n bọ Gbọjẹzan lẹzun agbànpẹnmẹnu de, to whenuena e yindọ azán ayajẹ tọn he nọ jlọmẹdote to gbigbọ-liho de wẹ e yin to dowhenu. Jesu jẹagọdo pọndohlan yetọn gbọn apajlẹ delẹ nina dali he dohia dọ Jehovah Jiwheyẹwhe ma jlo gbede dọ osẹ́n Gbọjẹzan tọn Etọn ni yin yiyizan to aliho enẹ mẹ.

Dopo to apajlẹ he Jesu na lẹ mẹ gando Davidi po sunnu etọn lẹ po go. Whenue huvẹ hù yé, yé zẹ̀ali yì gòhọtúntún mẹ bo dù akla didetọn lẹ. To paa mẹ, akla enẹlẹ he ko yin didesẹ sọn Jehovah nukọn bo yin tẹndiọna gbọn akla yọyọ lẹ dali nọ lẹzun yẹwhenọ lẹ kẹdẹ tọn. Etomọṣo to ninọmẹ enẹ mẹ, Davidi po sunnu etọn lẹ po ma yin whẹgbledo, na akla lọ lẹ he yé dù wutu gba.—Levitiku 24:5-9; 1 Samuẹli 21:1-6.

Jesu na apajlẹ devo dọmọ: “Be mì ma ko hia to Osẹ́n lọ mẹ dọ, yẹwhenọ he tin to tẹmpli mẹ lẹ ma  nọ yìn Gbọjẹzan ṣogan bo ma nọ hùwhẹ ya?” Nuhe dọ e te wẹ yindọ etlẹ yin to Gbọjẹzangbe, yẹwhenọ lẹ nọ hù kanlin nado basi avọ́sinsan bosọ nọ wà azọ́n devo lẹ to tẹmpli mẹ. Jesu dọmọ: “Ṣigba yẹn dọna mì dọ mẹde he hugan tẹmpli lọ tin tofi.”—Matiu 12:5, 6; Osọha lẹ 28:9.

Jesu sọ yí Owe-wiwe lẹ zan nado hẹn nuagokun etọn họnwun: “Eyin mì ko mọnukunnujẹ nuhe ehe zẹẹmẹdo mẹ, dọ, ‘Lẹblanu wẹ yẹn jlo, e ma yin avọ́sinsan gba,’ mì ma na ko gblewhẹdo mẹhe ma hùwhẹ lẹ.” E dotana dọmọ: “Na Visunnu gbẹtọ tọn wẹ Oklunọ Gbọjẹzan tọn.” Jesu to alọdlẹndo gandudu owhe fọtọ́n tọn Ahọluduta etọn tọn he na hẹn jijọho wá.—Matiu 12:7, 8; Hosea 6:6.

Sọn ojlẹ dindẹn die wẹ gbẹtọvi lẹ ko to oyà sinsinyẹn ji to Satani glọ, bọ danuwiwa po awhàn po fọ́n bo to susudeji. Lehe nulẹ na gbọnvo do sọ to Gbọjẹzan daho gandudu Klisti tọn glọ, mẹhe na hẹn ojlẹ gbọjẹ tọn he mí to nukundo bosọ tindo nuhudo etọn lọ wá!