Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 58

E Hẹn Akla Vude Zun Susu bo Na Avase Gando Otọ́n Go

E Hẹn Akla Vude Zun Susu bo Na Avase Gando Otọ́n Go

MATIU 15:32–16:12 MALKU 8:1-21

  • JESU NA NÚDÙDÙ SUNNU 4 000

  • E NA AVASE GANDO OTỌ́N FALESI LẸ TỌN GO

Gbẹtọgun daho lẹ wọ̀ wá Jesu dè to lẹdo Dekapole tọn mẹ, to whèzẹtẹn-waji ohù Galili tọn. Yé wá e dè nado sè ohó etọn podọ nado yin azọ̀nhẹngbọna, bo hẹn ohà daho he mẹ núdùdù po onú devo lẹ po yin bibẹdo.

Ṣigba dile ojlẹ to yìyì, Jesu dọna devi etọn lẹ dọmọ: “Onú gbẹtọgun lọ tọn wàlẹblanu na mi, na e ko yì azán atọ̀n todin bọ yé ko tin to dè e bo ma tindo nude nado dù. Eyin yẹn do yé hlan owhé yetọn lẹ gbè adọ̀vọ, agbọ́ na pé yé to aliho ji, podọ delẹ to yé mẹ wá sọn fidindẹn.” Devi etọn lẹ kanse dọmọ: “Fie wẹ mẹde na hẹn akla lẹ sọn to gblolo mẹ file nado gọ́ho na omẹ ehelẹ?”—Malku 8:2-4.

Jesu gblọn dọmọ: “Akla nẹmu wẹ mì tindo?” Devi lẹ dọmọ: “Ṣinawe po whèvi flinflin vude po.” (Matiu 15:34) Enẹgodo, Jesu biọ to gbẹtọ lọ lẹ si nado jagla do kọmẹ. E yí akla po whèvi lọ lẹ po, bo hodẹ̀ hlan Jiwheyẹwhe, bosọ bẹ yé na devi etọn lẹ nado má. E jiawu taun dọ mẹlẹpo dùnú bo gọ́ho. Dupò he yé bẹpli lẹ gọ́ ohà daho ṣinawe, mahopọnna dọ nudi sunnu 4 000, gọna yọnnu lẹ po yọpọvu lẹ po wẹ dùnú!

To whenue Jesu ko do gbẹtọgun lọ lẹ hlan godo, ewọ po devi etọn lẹ po biọ tọjihun de mẹ bo dasá otọ̀ lọ yì Magadani, to whèyihọ-waji ohù Galili tọn. To finẹ, Falesi lẹ po delẹ to hagbẹ sinsẹ̀n klandovo Sadusi lẹ tọn mẹ po tẹnpọn nado whlé Jesu pọ́n, bo biọ to e si nado na yé ohia de sọn olọn mẹ.

Na Jesu doayi mẹwhinwhàn yetọn lẹ go wutu, e gblọnna yé dọmọ: “Eyin owhè jai, mì nọ dọ dọ, ‘Aimẹ na yọ́n, na jiwhé divẹẹ taidi miyọ́n wutu,’ podọ to afọnnu, ‘Avivọ na tin bọ jikun na ja to egbé, na jiwhé divẹẹ taidi miyọ́n ṣigba bo súyu wutu.’ Mìwlẹ yọ́n lehe yè nọ detana jiwhé-nukunmẹ do, ṣigba mì ma sọgan detana ohia ojlẹ lẹ tọn.” (Matiu 16:2, 3) Enẹgodo, Jesu dọna Falesi lẹ po Sadusi lẹ po dọ ohia de ma na yin nina yé adavo ohia Jona tọn.

Jesu po devi etọn lẹ po biọ tọjihun de mẹ bo dedo Bẹtsaida to agewaji-whèzẹtẹn ohù Galili tọn. To whenue yé to yìyì, devi lẹ doayi e go dọ yé wọn nado hẹn akla he na pé yé. Akla dopo gee wẹ yé hẹn. Na Jesu flin ohó he e dọ wayi hẹ Falesi lẹ po Sadusi he nọ nọgodona Hẹlọdi lẹ po wutu, e na yé avase dọmọ: “Mì hùn nukun mìtọn lẹ dote; mì payi otọ́n Falesi lẹ tọn po otọ́n Hẹlọdi tọn po go.” Devi lẹ mọnukunnujẹemẹ to aliho agọ̀ mẹ bo lẹndọ akla he yé ma flin bo hẹn wutu wẹ Jesu do to otọ́n hodọ. Jesu doayi nuṣiwa yetọn go bo dọmọ: “Naegbọn mìwlẹ do to nudọn na mì ma hẹn akla depope wutu?”—Malku 8:15-17.

Ojlẹ kleun de jẹnukọnna enẹ, Jesu na akla gbẹtọ fọtọ́n susu lẹ to azọ́njiawu-liho. Enẹwutu, devi lẹ dona ko yọnẹn dọ e ma to hodọ gando whèdomẹ akla jọnun tọn go. E kanse yé dọ: “Be mì ma flin wẹ, to whenue yẹn wẹ́n akla atọ́n na sunnu 5 000, ohà nẹmu wẹ dupò he mì bẹpli lọ gọ́?” Yé dọna ẹn dọmọ: “Wiawe.” Jesu zindonukọn dọmọ: “To whenue yẹn wẹ́n ṣinawe lọ lẹ na sunnu 4 000, ohà daho nẹmu wẹ dupò he mì bẹpli lọ gọ́?” Yé sọ gblọn dọmọ: “Ṣinawe.”—Malku 8:18-20.

Jesu kanse yé dọmọ: “Naegbọn bọ mì ma mọnukunnujẹemẹ dọ yẹn ma to hodọna mì gando akla go?” E yidogọ dọmọ: “Mì payi otọ́n Falesi lẹ po Sadusi lẹ po tọn go.”—Matiu 16:11.

To godo mẹ, devi lẹ wá mọnukunnujẹ nuhe dọ e te mẹ. Otọ́n nọ yin yiyizan nado hẹn nude jí kavi nado hẹn akla fọ́n. To hodidọ Jesu tọn mẹ tofi, otọ́n nọtena nuhe nọ hẹnmẹ flu. E to avase na devi etọn lẹ nado tin to aṣeji gando “nuplọnmẹ Falesi lẹ po Sadusi lẹ po tọn go,” yèdọ nuplọnmẹ de he nọ hẹnmẹ flu.—Matiu 16:12.