Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 47

Viyọnnu Pẹvi de Gọwá Ogbẹ̀!

Viyọnnu Pẹvi de Gọwá Ogbẹ̀!

MATIU 9:18, 23-26 MALKU 5:22-24, 35-43 LUKU 8:40-42, 49-56

  • JESU FỌ́N VIYỌNNU JAILU TỌN SỌNKU

Jailu mọ bọ Jesu hẹnazọ̀ngbọna nawe he to hùndi lọ. E họnwun dọ Jesu sọgan gọalọna viyọnnu etọn ga, eyin dawe lọ tlẹ to linlẹn dọ ‘viyọnnu emitọn dona ko kú todin.’ (Matiu 9:18) Be yè gbẹ́ sọgan gọalọna viyọnnu lọ ya?

Dile Jesu gbẹ́ pò to hodọ hẹ nawe he e hẹnazọ̀ngbọna lọ, mẹdelẹ wá sọn owhé Jailu tọn gbè bo dọna ẹn dọmọ: “Viyọnnu towe ko kú!” Yé sọ yidogọ dọmọ: “Naegbọn hiẹ gbẹsọ to tuklado Mẹplọntọ?”—Malku 5:35.

Owẹ̀n ylankan nankọ die! Dawe ehe, he gbẹtọ lẹ nọ na sisi taun to lẹdo lọ mẹ, ma sọgan wà nudepope nado gọalọna viyọnnu dopo akàn etọn kaka bọ e kú. Ṣigba, Jesu gblató nuhe yé dọ bo pannukọn Jailu bosọ na ẹn tuli dọmọ: “A dibu blo; saa ko tindo yise poun.”—Malku 5:36.

Enẹgodo, Jesu hodo Jailu yì whégbè. To whenue yé jẹ finẹ, yé mọ bẹwlu sinsinyẹn de. Mẹhe pli do finẹ lẹ to avivi bo to avihàndo bosọ to nuli yede na awubla wutu. Jesu biọ họmẹ bo yí hogbe he paṣamẹ ehelẹ zan dọmọ: “Ovi pẹvi lọ ma kú gba, ṣigba amlọndọ wẹ e te.” (Malku 5:39) To whenue gbẹtọ lọ lẹ sè ehe, yé jẹ Jesu ṣanko ji, na yé yọnẹn dọ viyọnnu lọ ko wutu. Ṣigba, Jesu na yí huhlọn he Jiwheyẹwhe na ẹn lẹ zan nado dohia dọ gbẹtọ lẹ sọgan yin finfọnsọnku kẹdẹdile yé sọgan yin finfọn sọn amlọn he yìkànmẹ de mẹ do.

Todin, Jesu de mẹlẹpo tọ́n adavo Pita, Jakọbu, Johanu po mẹjitọ viyọnnu he ko kú lọ tọn lẹ po. Jesu plan omẹ atọ́n ehelẹ bo yì fie viyọnnu lọ yin titẹ́ do. E hẹn alọ etọn bo dọmọ: “‘Talita kumi,’ he lẹdogbedevomẹ etọn yin: ‘Viyọnnu Pẹvi, yẹn dọna we, “Fọ́n!”’” (Malku 5:41) To afọdopolọji, e fọ́n bo jẹ zọnlinzin ji. Yí nukun homẹ tọn do pọ́n lehe Jailu po asi etọn po na ko jẹaglin do sọ to whenue yé mọ ehe! Nado hẹn ẹn họnwun dogọ dọ viyọnnu lọ to ogbẹ̀ nugbonugbo, Jesu dọ dọ nude ni yin nina ẹn nado dù.

Jesu degbena mẹhe e ko hẹnazọ̀ngbọna wayi delẹ ma nado lá nuhe ewọ ko wà na yé lẹ pé, podọ nudopolọ wẹ e dọna mẹjitọ ehelẹ lọsu. Etomọṣo, mẹjitọ he homẹhun lọ lẹ po mẹdevo lẹ po hẹn linlin lọ gbayipe gbọn “agbegbe lọ pete ji.” (Matiu 9:26) Eyin hiẹ lọsu mọ bọ mẹyiwanna towe de yin finfọnsọnku, be apàpà ma na sọ́ we nado dọ ẹ na mẹdevo lẹ ya? Omẹ awetọ he Jesu fọnsọnku bọ Biblu dọho etọn niyẹn.

Plọnnu Dogọ

OWE LẸ PO ALỌNUWE LẸ PO

Be Oṣiọ lẹ Sọgan Gọwá Nọgbẹ̀ Nugbonugbo Ya?

Be mẹyiwanna de ko kú do we pọ́n ya? Opagbe homẹmiọnnamẹ tọn he to Biblu mẹ sọgan gọalọna we.