Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 30

Haṣinṣan He to Jesu po Otọ́ Etọn po Ṣẹnṣẹn

Haṣinṣan He to Jesu po Otọ́ Etọn po Ṣẹnṣẹn

JOHANU 5:17-47

  • JIWHEYẸWHE WẸ OTỌ́ JESU TỌN

  • OPAGBE FỌNSỌNKU TỌN

Whenue Ju delẹ sawhẹdokọna Jesu dọ e gbàsẹ́n Gbọjẹzan tọn gbọn azọ̀n hinhẹngbọ na dawe de dali, Jesu gblọn dọmọ: “Otọ́ ṣie zindonukọn to azọ́nwiwa mẹ kakajẹ din, yẹnlọsu sọ to nukọnzindo to azọ́nwiwa mẹ.”—Johanu 5:17.

Nuhe wà Jesu te ma jẹagọdo osẹ́n Jiwheyẹwhe tọn he gando Gbọjẹzangbe go. Apajlẹ azọ́n dagbe Jiwheyẹwhe tọn lẹ tọn hodo wẹ e te gbọn azọ́n yẹwhehodidọ tọn po azọ̀nhẹngbọ tọn etọn po dali. Enẹwutu, Jesu to nudagbe wà egbesọegbesọ. Ṣigba, gblọndo he e na whẹsadokọnamẹtọ etọn lẹ sọ hẹn homẹgble yé dogọ, bọ yé to dindin nado hù Jesu. Naegbọn e do yinmọ?

Gbọnvona dọ nukunnumamọjẹnumẹ hẹn yé nado lẹndọ Jesu to osẹ́n Gbọjẹzan tọn gbà gbọn azọ̀n hinhẹngbọ na gbẹtọ lẹ dali, yé sọ gblehomẹ taun to whenue e dọ dọ emi yin Visunnu Jiwheyẹwhe tọn. Yé yí do mọ nùzinzan dọ Jesu ylọ Jiwheyẹwhe dọ Otọ́ etọn, taidi dọ whenue Jesu dọ dọ Jehovah yin Otọ́ etọn, didọ wẹ e te dọ emi sọzẹn hẹ Jiwheyẹwhe wẹ nkọ. Ṣigba, Jesu ma dibu, podọ e dọhona yé yinukọn dogọ gando haṣinṣan vonọtaun he to ewọ po Jiwheyẹwhe po ṣẹnṣẹn go. E dọmọ: “Otọ́ yiwanna Visunnu lọ bo nọ do nuhe ewọ lọsu to wiwà lẹpo hia ẹ.”—Johanu 5:20.

Otọ́ lọ wẹ Gbẹ̀namẹtọ, podọ e ko do ehe hia wayi gbọn huhlọn nina sunnu delẹ nado fọ́n mẹdelẹ sọnku dali. Jesu zindonukọn dọmọ: “Kẹdẹdile Otọ́ nọ fọ́n oṣiọ lẹ bo nọ na yé ogbẹ̀ do, mọ wẹ Visunnu lọsu nọ na ogbẹ̀ mẹhe jlo e lẹ do.” (Johanu 5:21) Hodidọ ayidego tọn he namẹ todido gando sọgodo go nankọ die! Etlẹ yin todin whẹ́, Visunnu lọ to oṣiọ lẹ fọ́n to gbigbọ-liho. Enẹwutu, Jesu dọmọ: “Ewọ he sè ohó ṣie bo yí mẹhe do mi hlan sè na mọ ogbẹ̀ madopodo, podọ ewọ ma na yin whẹdana ṣigba e na tọ́n sọn okú mẹ biọ ogbẹ̀ mẹ.”—Johanu 5:24.

Kandai depope ma dohia dọ Jesu ko fọ́n mẹhe ko kú depope wá ogbẹ̀ to whenẹnu, ṣigba e dọna whẹsadokọnamẹtọ etọn lẹ dọ fọnsọnku agbasa tọn mọnkọtọn na wá aimẹ. “Ojlẹ lọ ja,” wẹ e dọ, “to ehe mẹ mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu.”—Johanu 5:28, 29.

Dile etlẹ yindọ azọngban vonọtaun de wẹ Jesu tindo, e hẹn ẹn họnwun dọ Jiwheyẹwhe glọ wẹ emi te dọmọ: “Yẹn ma sọgan wà onú dopo tata sọn ojlo ṣie mẹ gba. . . . Yẹn ma nọ dín nuhe yin ojlo ṣie titi gba, adavo nuhe yin ojlo ewọ he do mi hlan tọn.” (Johanu 5:30) Etomọṣo, Jesu basi zẹẹmẹ azọngban tangan he ewọ lọsu tindo to lẹndai Jiwheyẹwhe tọn mẹ tọn, ehe e ma ko hùn dọna mẹde to gbangba domọ kakajẹ whenẹnu. Ṣigba, e ma yin nuhe Jesu dọ gando ede go lẹ kẹdẹ wẹ whẹsadokọnamẹtọ etọn lẹ yọnẹn gba. E flinnu yé dọmọ: “Mìwlẹ ko domẹhlan Johanu [Baptizitọ lọ] dè, bọ ewọ ko dekunnu gando nugbo lọ go.”—Johanu 5:33.

Whẹsadokọnamẹtọ Jesu tọn lẹ na ko sè dọ to nudi owhe awe die, Johanu ko dọna sinsẹ̀ngán Ju lẹ dọ Mẹde na wá to godo emitọn—mẹhe yin yiylọdọ “Yẹwhegán lọ” podọ “Klisti lọ.” (Johanu 1:20-25) Nado flinnu whẹsadokọnamẹtọ etọn lẹ dọ yé ko nọ na sisi Johanu dai whẹpo e do wá yin wiwle do gànmẹ todin, Jesu dọmọ: “Mìwlẹ to jijlo nado jaya tlala to hinhọ́n etọn mẹ na ojlẹ gli de.” (Johanu 5:35) Ṣogan, ewọ tlẹ sọ dekunnu hugan Johanu Baptizitọ lọ.

“Azọ́n ehelẹ he yẹn to wiwà [ehe bẹ azọ̀nhẹngbọ he e ṣẹṣẹ basi lọ hẹn], dekunnu dọ Otọ́ wẹ do mi hlan.” Gbọnvona enẹ, Jesu zindonukọn dọmọ: “Otọ́ lọ he do mi hlan lọsu ko dekunnu gando go e.” (Johanu 5:36, 37) Di apajlẹ, Jiwheyẹwhe dekunnu gando Jesu go to baptẹm etọn whenu.—Matiu 3:17.

Na nugbo tọn, mẹhe to whẹsadokọna Jesu lẹ ma tindo whẹjijọ depope nado gbẹ́ ẹ dai. Owe-wiwe he yé sọalọakọ́n dọ emi nọ dindona wẹ dekunnu gando ewọ go. Jesu dotana dọmọ: “Eyin mìwlẹ ko yí Mose sè, mì na ko yí mi sè, na ewọ kanwe gando go e. Ṣigba, eyin mìwlẹ ma yí kandai ewọ tọn lẹ sè, nawẹ mì na yí nuhe yẹn dọ lẹ sè gbọn?”—Johanu 5:46, 47.