Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 33

Dọdai Isaia Tọn Hinhẹndi

Dọdai Isaia Tọn Hinhẹndi

MATIU 12:15-21 MALKU 3:7-12

  • GBẸTỌGUN DE DOAWHÀN WÁ JESU JI

  • E HẸN DỌDAI ISAIA TỌN DI

To whenue Jesu sè dọ Falesi lẹ po mẹhe tin to ogbẹ́ Hẹlọdi tọn mẹ lẹ po to ayiha kàn nado hù emi, ewọ po devi etọn lẹ po tọ́n sọn finẹ yì Ohù Galili tọn tó. Gbẹtọgun daho de doawhàn wá e dè sọn lẹdo voovo mẹ—yèdọ Galili, tòdaho Tile po Sidoni po tọn he to huto lẹ, whèzẹtẹn-waji Tọ̀sisa Jọdani tọn, Jelusalẹm po Idumia he to hùwaji pete po. Jesu hẹnazọ̀ngbọna susu to yé mẹ. Taidi kọdetọn de, susu mẹhe to azọ̀n sinsinyẹn jẹ lẹ tọn wọ̀ wá nukọn. Yé ma tlẹ nọte dọ ni doalọ yé go, yelọsu nọ yí jejejininọ do doalọ e go.—Malku 3:9, 10.

Gbẹtọgun lọ sù sọmọ bọ Jesu dọna devi etọn lẹ nado wleawu tọjihun pẹvi de tọn na ẹn, na ewọ nido sẹyì otọ̀ lọ ji vude na gbẹtọgun lọ nikaa doawhàn wá e ji. Humọ, e sọgan plọnnu yé sọn tọjihun lọ mẹ kavi sẹtẹn yì awà devo ji to ohù lọ tó nado gọalọna mẹsusu dogọ.

Devi Matiu doayi e go dọ nuhe Jesu wà hẹn “nuhe yin didọ gbọn yẹwhegán Isaia gblamẹ” di. (Matiu 12:17) Dọdai tẹwẹ Jesu hẹndi tofi?

“Pọ́n! Devizọnwatọ ṣie, mẹhe yẹn de, mẹyiwanna ṣie, mẹhe yẹn ko kẹalọyi! Yẹn na yí gbigbọ ṣie do e ji, podọ ewọ na hẹn nuhe whẹdida dodo yin họnwun na akọta lẹ. Ewọ ma na dọnnu kavi dawhá, mọjanwẹ mẹdepope ma na sè ogbè etọn to alihogbó lẹ ji. Ewọ ma na gídí ofán he dẹ́ depope, podọ e ma na ṣí miyọ́ngbán-kàn he to azọ̀ tì depope, kaka ewọ nado hẹn whẹdida dodo ṣẹ po kọdetọn dagbe po. Na nugbo tọn, to oyín etọn mẹ wẹ akọta lẹ na tindo todido te.”—Matiu 12:18-21; Isaia 42:1-4.

Na nugbo tọn, Jesu wẹ devizọnwatọ yiwanna he Jiwheyẹwhe kẹalọyi lọ. Jesu hẹn nuhe whẹdida dodo nujọnu tọn yin họnwun, ehe aṣa sinsẹ̀n lalo tọn lẹ to hinhẹn dózin. Na Falesi lẹ to Osẹ́n Jiwheyẹwhe tọn yizan dile e jlo yé do wutu, yé ma tlẹ na gọalọna awutunọ de to Gbọjẹzangbe! Nado hẹn whẹdida dodo Jiwheyẹwhe tọn họnwun bo dohia dọ gbigbọ Jiwheyẹwhe tọn to emi ji, Jesu de agbàn pinpẹn aṣa mawadodo tọn lẹ tọn sọn kọ̀ji na gbẹtọ lẹ. Enẹ wẹ zọ́n bọ sinsẹ̀ngán lẹ jlo na hù i. Lehe e blawu do sọ!

Etẹwẹ e zẹẹmẹdo dọ “ewọ ma na dọnnu kavi dawhá, mọjanwẹ mẹdepope ma na sè ogbè etọn to alihogbó lẹ ji”? Eyin Jesu hẹnazọ̀ngbọna gbẹtọ lẹ, e ma nọ na dotẹnmẹ yewlẹ—kavi aovi lẹ—nado “hẹn ewọ zun yinyọnẹn.” (Malku 3:12) E ma jlo dọ gbẹtọ lẹ ni yọ́n emi gbọn nujijla awhá-gbai alihogbó ji tọn lẹ dali kavi gbọn linlin he yè do osin e ji dile otó de sè bo to didọna devo dali.

Humọ, Jesu lá owẹ̀n homẹmiọnnamẹ tọn etọn na mẹhe taidi ofán he dẹ́ bo yin hihọliai lẹ. Yé taidi miyọ́ngbán-kàn he to azọ̀ tì de, ehe onù etọn ko dibla ṣí pete. Jesu ma nọ gídí ofán he dẹ́ kavi ṣí sekan he to azọ̀ tì de. Kakatimọ, e nọ gbọn azọ́nyinyọnẹn dali yí owanyi po awuvẹmẹ po do hẹn homẹmimiọnnọ lẹ lodo. Na nugbo tọn, Jesu wẹ mẹhe mẹ akọta lẹ na tindo todido te!