Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 32

Etẹwẹ Sọgbe hẹ Osẹ́n to Gbọjẹzangbe?

Etẹwẹ Sọgbe hẹ Osẹ́n to Gbọjẹzangbe?

MATIU 12:9-14 MALKU 3:1-6 LUKU 6:6-11

  • ALỌ DAWE DE TỌN YIN HINHẸN JẸGANGAN TO GBỌJẸZANGBE

To Gbọjẹzangbe devo, Jesu yì sinagọgu de mẹ, vlavo to Galili. E mọ dawe de to finẹ he adusilọ etọn kúsẹ́. (Luku 6:6) Wekantọ lẹ po Falesi lẹ po to Jesu ṣọ́ sinsinyẹn. Etẹwutu? Yé do nuhe to ahun yetọn mẹ hia to whenue yé kanse dọ: “Be e sọgbe hẹ osẹ́n nado hẹnazọ̀ngbọ to Gbọjẹzangbe ya?”—Matiu 12:10.

Sinsẹ̀ngán Ju lẹ yise dọ e sọgbe hẹ osẹ́n nado hẹnazọ̀ngbọnamẹ to Gbọjẹzangbe kiki eyin ogbẹ̀ to owù mẹ. Enẹwutu, di apajlẹ, e ma sọgbe hẹ osẹ́n nado dọ̀n ohú kavi blá hupetẹn he sẹ̀ de to Gbọjẹzangbe, na onú enẹlẹ ma ze ogbẹ̀ do owù mẹ wutu. E họnwun dọ onú dawe he to awufiẹsa mẹ lọ tọn ma to ahunmẹduna wekantọ lẹ po Falesi lẹ po nugbonugbo to whenue yé kanhose Jesu. Aklọ̀n dín wẹ yé te do Jesu go nado sawhẹdokọna ẹn.

Ṣigba, Jesu yọ́n linlẹn agọ̀ yetọn. E mọdọ yé ko wleawuna pọndohlan hẹngogo tọn, he ma sọgbe hẹ Owe-wiwe na nuhe dù osẹ́n he gando azọ́nwiwa to Gbọjẹzangbe go. (Eksọdusi 20:8-10) E ma yin tintan die bọ azọ́n dagbe etọn lẹ yin homọdọdego to aliho agọ̀ mẹ. Todin, Jesu ze dodonu nudindọn ayidego tọn de tọn dai to whenue e dọna dawe he alọ etọn kúsẹ́ lọ dọmọ: “Fọnṣite bo wá ṣẹnṣẹn.”—Malku 3:3.

Jesu lẹhlan wekantọ lẹ po Falesi lẹ po bo dọmọ: “Eyin mì tindo lẹngbọ dopo bọ e jẹ odò mẹ to Gbọjẹzangbe, be mẹde to mì mẹ he ma na tẹdo e go bo de e tọ́n ya?” (Matiu 12:11) Nuhọakuẹ wẹ lẹngbọ yin, enẹwutu yé ma na jo e do odò mẹ kakajẹ wunkẹngbe; e sọgan kú bọ yé na duahọ. Gbọnvona enẹ, Owe-wiwe dọ dọ: “Dodonọ nọ penukundo kanlin whégbè tọn etọn lẹ go.”—Howhinwhẹn lẹ 12:10.

Nado do kanṣiṣa lọ hia, Jesu dọmọ: “Nẹmunẹmu wẹ e yin na gbẹtọ de he họakuẹ hú lẹngbọ! Enẹwutu, e sọgbe nado wà onú dagbe to Gbọjẹzangbe.” (Matiu 12:12) Po ehe po, Jesu ma na gbàsẹ́n Gbọjẹzan tọn eyin e hẹnazọ̀ngbọna dawe lọ. Sinsẹ̀ngán lọ lẹ ma penugo nado jẹagọdo hoyijlẹdohogo he sọgbe bosọ do mẹtọnhopọn hia enẹ. Yé gbọ bo gbọṣi abọẹ.

Jesu pọ́n yé lẹdo pé, na nulẹnpọn agọ̀ yetọn vẹna ẹn bosọ hẹn ẹn blawu. Enẹgodo, e dọna dawe lọ dọ: “Dlẹnalọ towe.” (Matiu 12:13) Dile dawe lọ to alọ etọn he kúsẹ́ lọ dlẹn, e gọ̀ jẹgangan. Dawe lọ jaya tlala, ṣigba nawẹ ehe yinuwado mẹhe to tintẹnpọn nado domọwle Jesu lẹ ji gbọn?

Kakati nado jaya dọ alọ dawe lọ tọn gọ̀ jẹgangan, Falesi lẹ tọ́nyi bo yì blasé do Jesu go to afọdopolọji “hẹ mẹhe tin to ogbẹ́ Hẹlọdi tọn mẹ lẹ, nado hù i.” (Malku 3:6) Ayihaawe ma tin dọ ogbẹ́ tonudidọ tọn ehe bẹ hagbẹ sinsẹ̀n tọn delẹ he nọ yin yiylọdọ Sadusi lẹ hẹn. To paa mẹ, Sadusi lẹ po Falesi lẹ po ma nọ jẹpọ, ṣigba todin yé dogbepọ mlẹnmlẹn nado jẹagọdo Jesu.