Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 56

Etẹ Taun Wẹ Nọ Hẹn Gbẹtọ Flu?

Etẹ Taun Wẹ Nọ Hẹn Gbẹtọ Flu?

MATIU 15:1-20 MALKU 7:1-23 JOHANU 7:1

  • JESU HÙNGONA AṢA GBẸTỌVI TỌN LẸ

Dile Juwayi owhe 32 W.M. tọn to dindọnsẹpọ, Jesu hẹn alọnu etọn ján nado plọnnumẹ to Galili. Enẹgodo, e sọgan ko dedo Jelusalẹm nado dù Juwayi lọ, dile Osẹ́n Jiwheyẹwhe tọn biọ do. Ṣigba, Jesu nọ aṣeji to hùnwhẹ lọ whenu, na Ju lẹ to dindin nado hù i wutu. (Johanu 7:1) Enẹgodo, e lẹkọyi Galili.

E yọnbasi dọ Kapẹlnaumi wẹ Jesu na ko te to whenue Falesi lẹ po wekantọ lẹ po wá e dè sọn Jelusalẹm. Naegbọn yé do zingbejizọnlin ehe? Na yé to aklọ̀n dín nado sawhẹdokọna Jesu dọ e gbà osẹ́n sinsẹ̀n tọn wutu wẹ. Yé kanse e dọmọ: “Naegbọn devi towe lẹ do nọ tùnafọ aṣa omẹ hohowhenu tọn lẹ tọn ji? Di apajlẹ, yé ma nọ klọ́ alọ yetọn lẹ to whenuena yé jlo na dùnú.” (Matiu 15:2) Jiwheyẹwhe ma dọna omẹ etọn lẹ pọ́n gbede nado hodo aṣa enẹ bo nọ ‘klọ́ alọ yetọn lẹ kakajẹ awàgonu.’ (Malku 7:3) Etomọṣo, na Falesi lẹ, sẹ́nhẹngba sinsinyẹn wẹ e yin ma nado hodo aṣa enẹ.

Kakati nado na gblọndo na whẹsadokọnamẹ yetọn tlọlọ, Jesu zinnudo lehe yelọsu nọ desọn ojlo mẹ bo nọ gbà Osẹ́n Jiwheyẹwhe tọn do ji. E kanse yé dọmọ: “Naegbọn mìwlẹ do nọ tùnafọ gbedide Jiwheyẹwhe tọn ji na aṣa mìtọn wutu? Di apajlẹ, Jiwheyẹwhe dọ dọ, ‘Gbògbéna otọ́ towe po onọ̀ towe po,’ podọ, ‘Mẹhe nọ zun otọ́ kavi onọ̀, mì gbọ e ni yin hùhù.’ Ṣigba mìwlẹ dọ dọ, ‘Mẹdepope he dọna otọ́ kavi onọ̀ etọn dọ: “Nudepope he yẹn tindo he hiẹ sọgan mọyi yin nunina de he ko yin kinklandowiwe hlan Jiwheyẹwhe,” e ma yin dandan dọ ewọ ni gbògbéna otọ́ etọn to aliho depope mẹ.’”—Matiu 15:3-6; Eksọdusi 20:12; 21:17.

Falesi lẹ nọ dọ dọ akuẹ, nutindo, kavi nudevo depope he yin kinklandowiwe taidi nunina de hlan Jiwheyẹwhe yin tẹmpli lọ tọn, enẹwutu e ma dona yin yiyizan na lẹndai devo depope. Ṣigba nado dọ hójọhó, nunina enẹ gbẹsọ yin mẹhe jlo na basi i lọ tọn. Di apajlẹ, ovi de sọgan dọ dọ akuẹ kavi nutindo emitọn yin “kọlbani,” enẹ wẹ yindọ nunina lọ yin kinklandowiwe hlan Jiwheyẹwhe kavi hlan tẹmpli lọ, taidi dọ tẹmpli lọ wẹ nunina lọ jẹna hugan. Dile etlẹ yindọ akuẹ kavi nutindo lọ gbẹsọ yin ovi lọ tọn bọ e sọgan zan, e nọ dọ dọ emi ma sọgan yí i zan nado gọalọna mẹjitọ mẹhomẹ emitọn he tin to nuhudo mẹ lẹ. Gbọnmọ dali, e nọ dapana azọngban he e tindo gando mẹjitọ etọn lẹ go.—Malku 7:11.

Po whẹjijọ po, Jesu gblehomẹ na aliho he mẹ yé to kọslona Osẹ́n Jiwheyẹwhe tọn te wutu bo dọmọ: “Mìwlẹ ko hẹn ohó Jiwheyẹwhe tọn zun ovọ́ na aṣa mìtọn wutu. Mì yẹnuwatọ lẹ, Isaia ko gbọn gbesisọ dali dọ dọdai gando mì go to whenuena e dọ dọ: ‘Omẹ ehelẹ nọ yí nùflo yetọn lẹ do gbògbéna mi, ṣigba ahun yetọn dẹn do mi tlala. Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’” Falesi lẹ ma gblọn nudepope gando whẹgbledomẹ sinsinyẹn Jesu tọn ehe go. Enẹwutu, e basi oylọna gbẹtọgun lọ nado dọnsẹpọ ẹ. E dọna yé dọmọ: “Mì dotoai bo mọnukunnujẹ zẹẹmẹ etọn mẹ: E ma yin nuhe biọ onù gbẹtọ tọn mẹ wẹ nọ hẹn ẹn flu gba, ṣigba nuhe tọ́n sọn onù etọn mẹ wẹ nọ hẹn ẹn flu.”—Matiu 15:6-11; Isaia 29:13.

To nukọn mẹ, to whenue yemẹpo tin to owhé de gbè, devi lẹ kanse Jesu dọmọ: “Be hiẹ yọnẹn dọ Falesi lẹ dahli to whenuena yé sè nuhe a dọ ya?” E gblọn dọmọ: “Atin he Otọ́ ṣie olọn mẹ tọn ma do lẹpo wẹ na yin hinhọ̀nsẹ. Mì jo yé do. Alihiamẹtọ nukuntọ́nnọ wẹ yé. Enẹwutu, eyin nukuntọ́nnọ do ali hia nukuntọ́nnọ, yé omẹ awe lẹ na jai do odò mẹ.”—Matiu 15:12-14.

E sọgan ko paṣa Jesu to whenue Pita dọho do ota devi lẹ tọn mẹ bo biọ nudọnamẹ dogọ gando nuhe nọ hẹn gbẹtọ flu go. Jesu gblọn dọmọ: “Be mì ma yọnẹn dọ nudepope he biọ onù mẹ wẹ nọ yì adọ̀mẹ bo nọ yin yinyẹ̀n jẹgbonu do adàdo mẹ ya? Ṣigba, ahun mẹ wẹ nudepope he nọ tọ́njẹgbonu sọn onù mẹ nọ wá sọn, podọ onú enẹlẹ wẹ nọ hẹn gbẹtọ flu. Di apajlẹ, ahun mẹ wẹ linlẹn ylankan, hlọnhuhu, ayọdide, fẹnnuwiwa zanhẹmẹ tọn, ajojijẹ, kunnudide lalo, po nùzinzan lẹ po nọ wá sọn. Onú ehelẹ wẹ nọ hẹn gbẹtọ flu; ṣigba nado yí alọ he ma yin kiklọ́ lẹ do dùnú ma nọ hẹn gbẹtọ flu gba.”—Matiu 15:17-20.

Jesu ma to agọjẹdo wiwejininọ gba, mọjanwẹ e masọ to didohia dọ gbẹtọ ma dona klọ alọ etọn lẹ whẹpo do dànú kavi whẹpo do dùnú. Kakatimọ, yẹnuwiwa sinsẹ̀ngán lẹ tọn wẹ e to whẹgbledo, yèdọ mẹhe nọ tẹnpọn nado gbẹkọ osẹ́n dodo Jiwheyẹwhe tọn lẹ go bo nọ tẹdo aṣa gbẹtọvi tọn lẹ go. Na nugbo tọn, walọ ylankan he nọ wá sọn ahun mẹ lẹ wẹ nọ hẹn gbẹtọ flu.