Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 55

Hogbe Jesu Tọn lẹ Hẹn Mẹsusu Jọsi

Hogbe Jesu Tọn lẹ Hẹn Mẹsusu Jọsi

JOHANU 6:48-71

  • AGBASALAN ETỌN DÙDÙ PO OHÙN ETỌN NÙNÙ PO

  • MẸSUSU DAHLI BO MASỌ HODO E BA

To sinagọgu de mẹ to Kapẹlnaumi, Jesu to gbẹtọ lẹ plọn dọ ewọ wẹ akla nugbo lọ he wá sọn olọn mẹ. Na nugbo tọn, nuhe dọ e te lẹ yidogọna nuhe e ko dọna gbẹtọ he lẹkọwa sọn whèzẹtẹn-waji Ohù Galili tọn lẹ, yèdọ mẹhe dù akla po whèvi he e na yé to finẹ lẹ po.

Jesu zindonukọn to hodọdopọ lọ mẹ dọmọ: “Tọgbo mìtọn lẹ dù manna to danfafa ji ṣogan bo kú.” To vogbingbọn mẹ, e basi zẹẹmẹ dọmọ: “Yẹn wẹ akla ogbẹ̀ tọn lọ he jẹte sọn olọn wá; eyin mẹdepope dù sọn akla ehe mẹ, ewọ na nọgbẹ̀ kakadoi; podọ na taun tọn, akla he yẹn na na lọ wẹ agbasalan ṣie na ogbẹ̀ aihọn tọn.”—Johanu 6:48-51.

To amakikọ-whenu owhe 30 W.M. tọn, Jesu dọna Nikodẹmi dọ Jiwheyẹwhe yiwanna aihọn lọ sọmọ bọ e namẹ Visunnu etọn taidi Mẹwhlẹngántọ de. Todin, Jesu to nùzindo nuhudo lọ ji nado dù sọn agbasalan etọn mẹ gbọn yise tintindo to avọ́sinsan he e na basi lọ mẹ dali. Enẹ wẹ aliho lọ nado tindo ogbẹ̀ madopodo.

Ṣigba, gbẹtọ lẹ jẹagọdo nuhe dọ Jesu te lẹ. Yé kanse dọmọ: “Nawẹ dawe ehe na na mí agbasalan etọn nado dù gbọn?” (Johanu 6:52) Jesu jlo dọ yé ni mọnukunnujẹemẹ dọ emi ma to hodọ to aliho tlọlọ tọn mẹ gba, ṣigba to yẹhiadonu-liho. Ohó he e dọ bọdego lẹ do enẹ hia.

“Eyin mìwlẹ ma dù agbasalan Visunnu gbẹtọ tọn bo nù ohùn etọn, mì ma na tindo ogbẹ̀ to mìde mẹ gba. Ewọ he nọ dù agbasalan ṣie bo nọ nù ohùn ṣie tindo ogbẹ̀ madopodo, . . . na núdùdù nugbo wẹ agbasalan ṣie, podọ núnùnù nugbo wẹ ohùn ṣie. Ewọ he nọ dù agbasalan ṣie bo nọ nù ohùn ṣie nọ gbọṣi kọndopọ mẹ hẹ mi, podọ yẹn to kọndopọ mẹ hẹ ewọ.”—Johanu 6:53-56.

Pọ́n lehe hogbe enẹlẹ na ko hẹn todoaitọ etọn Juvi lẹ jọsi do sọ! Yé sọgan ko lẹndọ Jesu to bibiọ to yé si nado dù gbẹtọ-làn kavi tùnafọ Osẹ́n Jiwheyẹwhe tọn he gbẹ́ ma nado dù ohùn lọ ji. (Gẹnẹsisi 9:4; Levitiku 17:10, 11) Ṣigba, Jesu ma to hodọ gando agbasa etọn jọnun dùdù kavi ohùn etọn jọnun nùnù go gba. E to didohia dọ mẹhe jlo na mọ ogbẹ̀ madopodo lẹpo dona tindo yise to avọ́sinsan emitọn mẹ, enẹ wẹ avọ́sinsan he emi na basi to whenue emi na yí agbasa gbẹtọvi pipé tọn emitọn do sanvọ́ bosọ sọ̀n ohùn ogbẹ̀ tọn emitọn dai. Etomọṣo, susu to devi etọn lẹ lọsu mẹ ma mọnukunnujẹ nuplọnmẹ ehe mẹ. Delẹ to yé mẹ dọ dọ: “Ohó ehe hẹnmẹjọsi; mẹnu wẹ sọgan dotoaina ẹn?”—Johanu 6:60.

Na Jesu doayi e go dọ devi etọn delẹ to nuhlundọ wutu, e kanse yé dọ: “Ehe hẹn mì dahli wẹ? To whelọnu lo, etẹwẹ na jọ eyin mì mọ Visunnu gbẹtọ tọn hẹji jei fie e te dai? . . . Ohó he yẹn dọna mì lẹ gbigbọ po ogbẹ̀ po wẹ yé. Ṣigba, mẹdelẹ to mì mẹ bo ma yise.” Enẹ zọ́n bọ devi susu lẹkọ bo masọ nọ hodo e ba.—Johanu 6:61-64.

To whenẹnu, Jesu kanse apọsteli etọn 12 lẹ dọmọ: “Mìlọsu lẹ ga ma jlo na yì wẹ?” Pita gblọn dọmọ: “Oklunọ, mẹnu dè wẹ mí na yì? Hiẹ wẹ tindo ohó ogbẹ̀ madopodo tọn lẹ; podọ mí ko yise bo ko wá yọnẹn dọ hiẹ wẹ Omẹ Wiwe Jiwheyẹwhe tọn lọ.” (Johanu 6:67-69) Nugbonọ-yinyin nankọ die, mahopọnna dọ to whenẹnu Pita po apọsteli he pò lẹ po ma ko mọnukunnujẹ nuplọnmẹ Jesu tọn ehe mẹ to gigọ́ mẹ!

Gblọndo Pita tọn hẹn homẹhun Jesu, ṣigba e dọmọ: “Mì omẹ wiawe wẹ yẹn de, kavi e ma yin mọ wẹ? Ṣogan, dopo to mì mẹ yin mẹhẹngbletọ.” (Johanu 6:70) Juda Iskaliọti hodọ wẹ Jesu te. E yọnbasi dọ to ojlẹ enẹ mẹ, Jesu doayi e go dọ Juda ko jẹ nuyiwa ji sọgbe hẹ ojlo ylankan etọn lẹ.

Etomọṣo, homẹ Jesu tọn hùn dọ Pita po apọsteli he pò lẹ po ma yin hinhẹn gbọjọ nado hodo e podọ nado tindo mahẹ to azọ́n gbẹwhlẹngán tọn he e to wiwà lọ mẹ.