Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 63

Jesu Na Ayinamẹ Gando Ahlidida po Ylando po Go

Jesu Na Ayinamẹ Gando Ahlidida po Ylando po Go

MATIU 18:6-20 MALKU 9:38-50 LUKU 9:49, 50

  • AYINAMẸ GANDO AHLIDIDA GO

  • EYIN MẸMẸSUNNU DE WAYLANDO

Jesu ṣẹṣẹ do aliho he mẹ hodotọ etọn lẹ dona nọ yinuwa te hia. Yé dona nọ pọ́n yede hlan taidi ovi pẹvi lẹ he nọ ze yede whè, bọ ogántẹn ma nọ duahunmẹna yé. Devi lẹ dona ‘yí yọpọvu enẹ nkọtọn lẹ to oyín etọn mẹ bo gbọnmọ dali yí Jesu lọsu ga.’—Matiu 18:5.

Na apọsteli lẹ ko dọnnu wayi gando mẹhe klohugan go wutu, hogbe Jesu tọn enẹlẹ sọgan ko taidi wọhẹ de na yé. Todin, apọsteli Johanu dọ̀n ayidonugo wá whẹho devo he ṣẹṣẹ fọndote de ji dọmọ: “Mí mọ mẹde bọ e to aovi lẹ yàn jẹgbonu to oyín towe mẹ podọ mí tẹnpọn nado glọnalina ẹn, na ewọ ma yin dopo to mí mẹ wutu.”—Luku 9:49.

Be Johanu lẹndọ apọsteli lẹ kẹdẹ wẹ tindo aṣẹ nado gbọazọ̀nna mẹdevo lẹ kavi nado yàn aovi lẹ jẹgbonu wẹ ya? Eyin mọ wẹ, naegbọn bọ dawe Ju ehe nọ yàn gbigbọ ylankan lẹ jẹgbonu po kọdetọn dagbe po? To linlẹn Johanu tọn mẹ, dawe lọ ma dona nọ wà azọ́njiawu lẹ, na e ma nọ hodo Jesu po apọsteli lẹ po wutu.

E paṣa Johanu to whenue Jesu dọmọ: “Mì tẹnpọn nado glọnalina ẹn blo, na mẹdepope ma tin he na wà azọ́n huhlọnnọ de to oyín ṣie mẹ, bo na sọgan dọ onú ylankan de do go e po awubibọ po, na ewọ he ma jẹagọdo mí tin po mí po. Na mẹdepope he na mì osin kọfo dopo nado nù, na mì yin Klisti tọn wutu, nugbo wẹ yẹn dọna mì, ewọ ma na hẹn ale etọn bu to aliho depope mẹ gba.”—Malku 9:39-41.

Na nugbo tọn, to ojlẹ enẹ mẹ, e ma biọ dọ dawe lọ ni hodo Klisti nado sọgan nọ adà etọn mẹ. To whenuena e yindọ agun Klistiani tọn ma ko yin didoai to ojlẹ lọ mẹ, dawe lọ ma dona yin pinpọnhlan taidi agọjẹdomẹtọ de kavi mẹhe to sinsẹ̀n lalo de zedaga, na e ma to gbejizọnlinzin hẹ Jesu wutu gba. E họnwun dọ dawe lọ yise to Jesu mẹ, podọ sọgbe hẹ nuhe Jesu dọ, dawe enẹ ma na hẹn ale etọn bu.

To alọ devo mẹ, e na ylan taun eyin hodidọ po nuyiwa apọsteli lẹ tọn po hẹn dawe lọ dahli. Jesu dọmọ: “Mẹdepope he hẹn dopo to omẹ pẹvi he tindo yise to yẹn mẹ ehelẹ mẹ dahli, e na pọnte na ẹn hú dọ yè ni sìn gilisé he kẹtẹkẹtẹ lẹ nọ lilẹ́ nkọtọn de do okọ̀ na ẹn bo dọ̀n ẹn dlan ohù mẹ.” (Malku 9:42) Enẹgodo, Jesu dọ dọ hodotọ emitọn lẹ dona sán nudepope he na hẹn yé dahli sẹ̀ sọn ogo, eyin nulọ tlẹ họakuẹ na yé sọ alọ, afọ, kavi nukun. E pọnte nado biọ Ahọluduta Jiwheyẹwhe tọn mẹ matin onú họakuẹ enẹlẹ hugan nado tẹdo yé go bo wá yì Gẹhẹnna (Agbàdo Hinnọmi tọn) mẹ. Apọsteli lẹ na ko nọ mọ agbàdo enẹ he sẹpọ Jelusalẹm, fihe ogbó lẹ nọ yin mimẹ̀ te, enẹwutu yé sọgan mọnukunnujẹemẹ dọ vasudo mlẹnmlẹn wẹ e nọtena.

Jesu sọ na avase dọmọ: “Mì hẹn ẹn diun ma nado gbẹkọ dopo to omẹ pẹvi ehelẹ mẹ go, na yẹn dọna mì dọ whepoponu wẹ angẹli yetọn lẹ to olọn mẹ nọ tin to Otọ́ ṣie he tin to olọn mẹ nukọn.” Nawẹ “omẹ pẹvi enẹlẹ” họakuẹ na Otọ́ etọn sọ? Jesu donù dawe de go he tindo lẹngbọ 100 ṣigba bo hẹn dopo bu. Dawe lọ jo lẹngbọ 99 he pò lẹ do nado yì dín dopo he bu lọ, podọ to whenuena e mọ ẹn, e jaya do e ji hugan do 99 he ma bu lẹ ji. Jesu yidogọ dọ: “E ma yin ojlo Otọ́ ṣie he tin to olọn mẹ tọn dọ dopo tata to omẹ pẹvi ehelẹ mẹ ni dọ̀n gba.”—Matiu 18:10, 14.

Vlavo, na Jesu flin nudindọn apọsteli etọn lẹ tọn gando mẹhe klohugan lọ go wutu, e dotuhomẹna yé dọmọ: “Mì tindo ojẹ̀ to mìdelẹ mẹ, bo nọ jijọho hẹ ode awetọ mìtọn.” (Malku 9:50) Ojẹ̀ wẹ nọ hẹn núdùdù lẹ dotọ́n dogọ. Ojẹ̀ yẹhiadonu tọn nọ hẹn nuhe mẹde dọ lẹ bọawu nado kẹalọyi, bo gbọnmọ dali gọalọ na jijọho nido gbọṣi aimẹ, yèdọ nuhe nudindọn ma nọ wà.—Kọlọsinu lẹ 4:6.

To whedelẹnu, nuhahun sinsinyẹn delẹ sọgan fọndote, podọ Jesu dọ lehe yé sọgan nọ yin dididẹ do. Jesu dọmọ: “Eyin mẹmẹsunnu towe waylando de, yì bo do nuṣiwa etọn hia ẹ to hiẹ po ewọ po kẹdẹ ṣẹnṣẹn. Eyin e sè towe, be hiẹ ko duale mẹmẹsunnu towe tọn.” Etẹwẹ lo eyin e ma sè towe? Jesu na ayinamẹ dọmọ: “Plan omẹ dopo kavi awe dogọ dewe, na nuhe yin didọ lẹpo nido sọgan yin hinhẹn lodo to dodonu kunnudide kunnudetọ awe kavi atọ̀n tọn ji.” Eyin enẹ ma didẹ nuhahun lọ, yé dona “dọ ẹ na agun,” enẹ wẹ mẹho agun tọn azọngbannọ he sọgan basi nudide lẹ. Ṣigba, eyin ylanwatọ lọ sọ gbẹ́ nado sè yetọn lo? “Gbọ e ni tin hlan we kẹdẹdi omẹ akọta lẹ tọn de podọ di tòkuẹ-ṣinyantọ de,” yèdọ mẹhe Ju lẹ ma nọ dogbẹ́ hẹ.—Matiu 18:15-17.

Mẹho agun tọn lẹ dona nọ tẹdo Ohó Jiwheyẹwhe tọn go. Eyin yé mọdọ mẹhe waylando de tindo nuhudo mẹplọnlọ tọn, whẹdida yetọn ‘na ko yin biblá to olọn mẹ.’ Ṣigba, eyin yé wá tadona kọ̀n dọ mẹlọ yin homẹvọnọ, be whẹdida yetọn ko yin “túntún to olọn mẹ.” Anademẹ ehelẹ na wá gọalọ taun to whenue agun Klistiani tọn na yin didoai. Jesu dọ gando whẹdida sinsinyẹn mọnkọtọn lẹ go dọmọ: “Fie omẹ awe kavi atọ̀n pli dopọ te to oyín ṣie mẹ, yẹn tin to ṣẹnṣẹn yetọn to finẹ.”—Matiu 18:18-20.