Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 49

E Dọyẹwheho to Galili bo Plọnazọ́n Apọsteli Lẹ

E Dọyẹwheho to Galili bo Plọnazọ́n Apọsteli Lẹ

MATIU 9:35–10:15 MALKU 6:6-11 LUKU 9:1-5

  • JESU ZINGBEJIZỌNLIN DEVO TO GALILI

  • E DO APỌSTELI LẸ HLAN NADO DỌYẸWHEHO

E ko yì owhe awe nkọ he Jesu to yẹwhehodọ po zohunhun po. Be ojlẹ sọ todin nado dekanpona zohunhun etọn wẹ ya? Kakatimọ, Jesu gbloada na azọ́n yẹwhehodidọ tọn etọn bo zingbejizọnlin “gbọn tòdaho po gbétatò [Galili tọn] lẹpo po mẹ, bo to mẹplọn to sinagọgu yetọn lẹ mẹ bosọ to yẹwheho wẹndagbe Ahọluduta lọ tọn dọ bo to azọ̀n wunmẹ lẹpo po madogán wunmẹ lẹpo po hẹngbọ.” (Matiu 9:35) Nuhe e mọ lẹ hẹn ẹn kudeji dọ e dona gbloada na azọ́n yẹwhehodidọ tọn lọ. Ṣigba, nawẹ e na wà ehe dotana gbọn?

Dile Jesu to yìyì, e mọdọ gbẹtọ lẹ tindo nuhudo azọ̀nhẹngbọ po homẹmimiọn po tọn to gbigbọ-liho. Yé taidi lẹngbọ lẹ he ma tindo lẹngbọhọtọ de bo yin hinhẹn jẹ agbá bosọ yin kọgbẹ́ e go. Onú yetọn wàlẹblanuna ẹn bọ e dọna devi etọn lẹ dọmọ: “Mọwẹ, ojijẹ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.”—Matiu 9:37, 38.

Jesu yọ́n nuhe na gọalọ. E ylọ apọsteli 12 lẹ pli bo má yé awe awe bọ yé basi pipli yẹwhehodọtọ tọn ṣidopo. Enẹgodo, e na yé anademẹ he họnwun lẹ dọmọ: “Mì yì aliho akọta lẹ tọn ji blo, podọ mì biọ tòdaho Samalianu lẹ tọn depope mẹ blo; ṣigba kakatimọ, mì nọ yì lẹngbọ owhé Islaeli tọn he bu lẹ dè. Dile mì to yìyì, mì nọ dọyẹwheho, dọmọ: ‘Ahọluduta olọn tọn ko dọnsẹpọ.’”—Matiu 10:5-7.

Ahọluduta he go Jesu dọho gando to odẹ̀ apajlẹ tọn mẹ lọ wẹ yé na dọyẹwheho etọn. ‘Ahọluduta lọ ko dọnsẹpọ’ to linlẹn lọ mẹ dọ Ahọlu he Jiwheyẹwhe de lọ, enẹ wẹ Jesu Klisti to finẹ. Ṣigba, etẹwẹ na dohia nugbonugbo dọ devi etọn lẹ yin afọzedaitọ Ahọluduta ehe tọn lẹ? Jesu na yé huhlọn nado hẹnazọ̀ngbọna mẹhe to azọ̀njẹ lẹ podọ etlẹ yin nado fọ́n oṣiọ lẹ, ehe lẹpo vọnu. To whelọnu lo, nawẹ apọsteli lẹ na penukundo nuhudo yedetiti tọn lẹ, taidi núdùdù egbesọegbesọ tọn yetọn go gbọn?

Jesu dọna devi etọn lẹ dọ yé ni ma wleawu onú agbasa tọn de tọn na gbejizọnlin yẹwhehodidọ tọn ehe blo. Yé ma dona hẹn sika, fataka kavi gànvẹẹ do akuẹ-hẹnnu yetọn lẹ mẹ. Yé ma tlẹ tindo nuhudo aglò núdùdù tọn de tọn kavi awù odò tọn po afọpa devo po na gbejizọnlin lọ. Etẹwutu? Jesu na yé jide dọmọ: “Azọ́nwatọ jẹna núdùdù etọn.” (Matiu 10:10) Mẹhe devi lẹ na dukosọ hẹ bọ yé na kẹalọyi owẹ̀n yetọn lẹ na gọalọ nado penukundo nuhudo dandan tọn yetọn lẹ go. Jesu dọmọ: “Fidepope he mì biọ owhé de gbè te, mì nọ finẹ kaka mì nado tọ́n sọn tòdaho lọ mẹ.”—Malku 6:10.

Jesu sọ na anademẹ lẹ gando lehe yé na hẹn owẹ̀n Ahọluduta lọ tọn jẹ whétọ lẹ dè do go dọmọ: “Eyin mì biọ owhé de gbè, mì dọnudo whédo lọ. Eyin owhé lọ jẹ, na jijọho he mì jlo na ẹn ni wá e ji; ṣigba eyin e ma jẹ, na jijọho mìtọn ni gọ̀ do mì dè. Eyin mẹdepope ma yí mì kavi dotoaina ohó mìtọn to fide, to whenue mì to tintọ́n sọn owhé enẹ gbè kavi tòdaho enẹ mẹ, mì húnhún kọ́gudu sẹ̀ sọn afọ mìtọn lẹ go.”—Matiu 10:12-14.

Etlẹ yọnbasi dọ tòdaho kavi gbétatò de blebu ni gbẹ́ owẹ̀n yetọn. Etẹwẹ na yin kọdetọn lọ na ofi mọnkọtọn? Jesu dohia dọ e na dekọtọn do whẹdida whẹgbledomẹ tọn sinsinyẹn mẹ. E basi zẹẹmẹ dọmọ: “Nugbo wẹ yẹn dọna mì, e na pọnte na otò Sodọmi po Gomọla po tọn to Whẹdazangbe hú na tòdaho enẹ.”—Matiu 10:15.