Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 134

Yọdò lọ Jẹvọ́ Na Jesu to Ogbẹ̀ Wutu!

Yọdò lọ Jẹvọ́ Na Jesu to Ogbẹ̀ Wutu!

MATIU 28:3-15 MALKU 16:5-8 LUKU 24:4-12 JOHANU 20:2-18

  • JESU YIN FINFỌNSỌNKU

  • NUJIJỌ HE WÁ AIMẸ TO YỌDÒ JESU TỌN KỌ̀N LẸ

  • E SỌAWUHIA YỌNNU VOOVO LẸ

Lehe yọnnu enẹlẹ na ko jọsi do sọ nado mọdọ yọdò lọ ko jẹvọ́! Malia Magdaleni họ̀nwezun lẹkọyi “Simọni Pita po devi lọ he Jesu yiwanna po” dè, yèdọ apọsteli Johanu. (Johanu 20:2) Ṣigba, yọnnu he pò to yọdò lọ kọ̀n lẹ mọ angẹli de. Podọ, angẹli devo he “do tewu wewe” tin to yọwhé lọ mẹ.—Malku 16:5.

Dopo to angẹli lọ lẹ mẹ dọna yé dọmọ: “Mì dibu blo, na yẹn yọnẹn dọ Jesu he yin whiwhè do núgo lọ dín wẹ mì te. E ma tofi, na e ko yin finfọn, dile e ko dọ do. Mì wá, mì pọ́n fie e yin titẹ́ do dai. Podọ mì yawu yì bo dọna devi etọn lẹ dọ ewọ ko yin finfọn sọn oṣiọ lẹ mẹ, podọ, mì pọ́n! e ko jẹnukọnna mì jei Galili.” (Matiu 28:5-7) Enẹwutu, yọnnu lọ lẹ “gọ́ na obu po nupaṣamẹ po” bo họ̀nwezun nado yì na linlin devi lẹ.—Malku 16:8.

Todin, Malia ko mọ Pita po Johanu po. Na wezun he e họ̀n wutu, agbọ́ to whiwhè do e, dile e na linlin dọmọ: “Yé ko ze Oklunọ sẹ̀ sọn yọdò lọ mẹ, podọ mí ma yọ́n fihe yé tẹ́ ẹ do.” (Johanu 20:2) Pita po Johanu po bẹwezun. Johanu họ̀nwezun po awuyiya susu po bo jẹ yọdò lọ kọ̀n jẹnukọn. E yìnnukunpọn yọdò lọ mẹ bo mọ avọ̀ he mẹ yè blá Jesu do lẹ hlan, ṣigba e gbọṣi gbonu.

To whenue Pita wá, e biọ yọwhé lọ mẹ tlọlọ. E mọ alavọ lọ lẹ po avọ̀ he yè yí do blata na Jesu lẹ po. Todin Johanu biọ yọwhé lọ mẹ, bo yí nuhe Malia dọ lẹ sè. Mahopọnna nuhe Jesu ko dọ wayi lẹ, depope to yé mẹ ma mọnukunnujẹemẹ dọ e ko yin finfọnsọnku. (Matiu 16:21) Yé dedo whégbè po flumẹjijẹ po. Ṣigba, Malia he ko lẹkọwa yọdò lọ kọ̀n, gbọṣi finẹ.

To ojlẹ enẹ mẹ, yọnnu he pò lẹ to aliji nado yì dọna devi lẹ dọ Jesu ko yin finfọnsọnku. To whenue yé to wezun ji nado yì wàmọ, Jesu pé yé bo dọmọ: “Mì kudo lewhenu!” Yé sọ jẹklo do afọ etọn lẹ kọ̀n bo ‘litaina ẹn’. To whenẹnu, Jesu dọmọ: “Mì dibu blo! Mì yì bo dọna mẹmẹsunnu ṣie lẹ, na yé ni yì Galili; podọ finẹ wẹ yé na mọ mi te.”—Matiu 28:9, 10.

Jẹnukọnna enẹ, to whenue aigba sisọsisọ lọ jọ bọ angẹli lọ lẹ sọawuhia, awhànfuntọ he to yọdò lọ kọ̀n lẹ “sisọ́ bo taidi oṣiọ.” To whenue yé mọ yede mẹ godo, yé biọ tòdaho lọ mẹ bo “dọ nuhe ko jọ lẹpo na yẹwhenọgán lẹ.” Enẹgodo, yẹwhenọgán lọ lẹ dewé hẹ sunnu mẹho Ju lẹ tọn. Nudide sọ yin bibasi nado na alọgodo-kuẹ awhànfuntọ lọ lẹ na yé nido whlá whẹho lọ bo dọmọ: “Devi etọn lẹ wá to zánmẹ bo fìn in to whenue míwlẹ to amlọndọ.”—Matiu 28:4, 11, 13.

Awhànfuntọ Lomu tọn lẹ sọgan yin hùhù eyin yé damlọn to azọ́ndenamẹ yetọn kọ̀n, enẹwutu yẹwhenọgán lọ lẹ dopà dọmọ: “Eyin ayimatẹn-gán lọ wá sè ehe [lalo he yé na do dọ yewlẹ damlọn], mí na basi zẹẹmẹ whẹho lọ tọn na ẹn bo na de mì sọn tukla mẹ.” (Matiu 28:14) Awhànfuntọ lọ lẹ yí alọgodo-kuẹ lọ bo wà nuhe yẹwhenọgán lẹ dọ. Gbọnmọ dali, lalo lọ dọ yè fìn oṣiọ Jesu tọn gbayipe to Ju lẹ ṣẹnṣẹn.

Malia Magdaleni gbẹ́ pò to awubla mẹ to yọdò lọ kọ̀n. Dile e dẹ́ hlan nukọn nado pọ́n e mẹ, e mọ angẹli awe to aisinsin to avọ̀ wewe mẹ. Dopo sinai to taligbé fihe oṣiọ Jesu tọn ko yin titẹ́ do dai tọn bọ awetọ sinai to afọligbé. Yé kanse dọmọ: “Yọnnu, naegbọn hiẹ do to avivi?” Malia gblọn dọmọ: “Yé ko ze Oklunọ ṣie sẹ̀ bọ yẹn ma yọ́n fihe yé tẹ́ ẹ do.” Dile Malia lẹkọ, e sọ mọ mẹdevo. Omẹ lọ vọ́ kanbiọ angẹli lọ lẹ tọn kanse e bo yidogọ dọmọ: “Mẹnu dín wẹ a te?” Na Malia lẹndọ jipa-họ́tọ lọ wẹ wutu, e dọmọ: “Mẹdaho, eyin hiẹ ko ze e sẹ̀, dọ fihe hiẹ tẹ́ ẹ do na mi, na yẹn nido ze e.”—Johanu 20:13-15.

Na nugbo tọn, Jesu he ko yin finfọnsọnku lọ wẹ Malia to hodọna, ṣigba to ojlẹ enẹ mẹ, e ma doayi e go dọ Jesu wẹ. Ṣigba, to whenue e dọ “Malia!,” e wá yọnẹn dọ Jesu wẹ, na e doayi lehe e nọ dọhona ẹn do go wutu. Malia yí ayajẹ do gblọn dọmọ: “Laboni!” (he zẹẹmẹdo “Mẹplọntọ!”) Ṣogan, na e to budi dọ Jesu na yì olọn mẹ wutu, e tẹdo e go gbanun-gbanun. Enẹwutu, Jesu dotuhomẹna ẹn dọmọ: “Gbọ titẹdo go e. Na yẹn ma ko hẹji yì Otọ́ dè. Ṣigba, yì mẹmẹsunnu ṣie lẹ dè bo dọna yé dọ, ‘Yẹn hẹji jei Otọ́ ṣie po Otọ́ mìtọn po dè podọ jei Jiwheyẹwhe ṣie po Jiwheyẹwhe mìtọn po dè.’”—Johanu 20:16, 17.

Malia họ̀nwezun yì fihe apọsteli lẹ po devi devo lẹ po pli do. E dọna yé dọmọ: “Yẹn ko mọ Oklunọ!” bo yí linlin etọn dogọna nuhe yé ko sè sọn yọnnu diẹ lẹ dè. (Johanu 20:18) Etomọṣo, linlin lọ lẹ “sọawuhia taidi nulunu hlan yé.”—Luku 24:11.