Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 132

Matin Ayihaawe, Visunnu Jiwheyẹwhe Tọn Wẹ Dawe Ehe”

Matin Ayihaawe, Visunnu Jiwheyẹwhe Tọn Wẹ Dawe Ehe”

MATIU 27:45-56 MALKU 15:33-41 LUKU 23:44-49 JOHANU 19:25-30

  • JESU KÚ DO PÒTIN JI

  • NUJIJỌ VONỌTAUN DELẸ JỌ TO OKÚ JESU TỌN WHENU

Todin, “gànhiho ṣidopotọ” kavi ogàn wiawe whèmẹ tọn ko hò. To ajiji mẹ, zinvlu “ṣinyọ́n aigba lọ lẹpo ji kakajẹ gànhiho ṣinẹnẹtọ mẹ,” enẹ wẹ ogàn atọ̀n mẹ to whèmẹ. (Malku 15:33) E ma yin nujijọ osun-wle-whè tọn de wẹ hẹn zinvlu ehe wá gba. Nujijọ enẹlẹ nọ wá aimẹ to osun yọyọ whenu, ṣigba ojlẹ Juwayi tọn wẹ ojlẹ ehe yin, yèdọ ojlẹ he mẹ osun nọ tọ́n to gigọ́ mẹ te. Zinvlu ehe sọ dẹn-to-aimẹ hugan nukunwhiwhe kleun he gblamẹ nujijọ osun-wle-whè tọn nọ wá aimẹ te lẹ. Enẹwutu, Jiwheyẹwhe wẹ hẹn zinvlu ehe wá aimẹ!

Yí nukun homẹ tọn do pọ́n nuyiwadomẹji he enẹ na ko tindo do mẹhe to Jesu ṣanko lẹ ji. To ojlẹ zinvlu tọn ehe mẹ, yọnnu ẹnẹ dọnsẹpọ yatin lọ. Yewlẹ wẹ onọ̀ Jesu tọn, Salome, Malia Magdaleni, po Malia onọ̀ Jakọbu Pẹvi lọ tọn po.

Apọsteli Johanu tin to apá na onọ̀ Jesu tọn he to awubla mẹ “to yatin etọn kọ̀n.” Malia to visunnu he ewọ ji bo pọ́n e go whẹ́n lọ pọ́n dile e to núgo bosọ to awufiẹsa mọ to finẹ. Na Malia, e taidi dọ yè sọ́ “ohí gaa de” alindọn etọn nkọ. (Johanu 19:25; Luku 2:35) Ṣigba, mahopọnna awufiẹsa sinsinyẹn he mẹ Jesu te, e hò dagbemẹninọ Malia tọn pọ́n. E dovivẹnu nado mimí ota hlan Johanu bo dọhlan onọ̀ etọn dọmọ: “Yọnnu, pọ́n! Visunnu towe!” Enẹgodo, dile e mimí ota hlan Malia, e dọna Johanu dọmọ: “Pọ́n! Onọ̀ towe!”—Johanu 19:26, 27.

Jesu to bibiọ to apọsteli he e yiwanna taun lọ si nado penukundo onọ̀ etọn he na ko yin asuṣiọsi todin lọ go. Jesu yọnẹn dọ nọvisunnu daa etọn lẹ, enẹ wẹ visunnu Malia tọn he pò lẹ, ma ko tindo yise to ewọ mẹ. Enẹwutu, e to awuwledai na onọ̀ etọn nido yin nukunpedego to agbasa-liho podọ to gbigbọ-liho. Apajlẹ dagbe nankọ die!

Sẹpọ ojlẹ he mẹ zinvlu lọ wá vivọnu te, Jesu dọmọ: “Nugbla to hùhù mi.” Gbọnmọ dali, e hẹn dọdai Owe-wiwe tọn de di. (Johanu 19:28; Psalm 22:15) To aliho de mẹ, Jesu tindo numọtolanmẹ lọ dọ Otọ́ emitọn ko de hihọ́-basinamẹ etọn sẹ̀ sọn emi ji, na tenọgligo-hinhẹn Visunnu etọn tọn nido sọgan yin whiwhlepọn jẹ obà godo tọn mẹ. Klisti sọ dawhá vlavo to Alamaiki-gbè Galilinu lẹ tọn mẹ dọmọ: “Eli, Eli, lama sabaktani?” ehe zẹẹmẹdo, “Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?” Delẹ to mẹhe to ote sẹpọ finẹ lẹ mẹ ma mọnukunnujẹ nuhe dọ e te mẹ bo dọmọ: “Pọ́n! E to Elija ylọ.” Dopo to yé mẹ sọ họ̀nwezun bo ze hùmẹ-tekan he yè ylọn do ovẹn he vẹsin mẹ de do ofánpò de nù bosọ na Jesu nado nù. Ṣigba, mẹdevo lẹ dọmọ: “Mì jo e do! Mì gbọ mí ni pọ́n eyin Elija na wá de e jẹte.”—Malku 15:34-36.

To whenẹnu, Jesu dawhá dọmọ: “E ko yin wiwadotana!” (Johanu 19:30) Mọwẹ, e ko wà nuhe Otọ́ etọn do e hlan aigba ji nado wà lẹpo dotana. To godo mẹ, Jesu dọmọ: “Otọ́, alọ towe mẹ wẹ yẹn jo gbigbọ ṣie do.” (Luku 23:46) Gbọnmọ dali, Jesu ze huhlọn ogbẹ̀ etọn tọn do alọmẹ na Jehovah, bo deji dọ Jiwheyẹwhe na wá gọ̀ ẹ jo na ẹn. Klisti dejido Jiwheyẹwhe go mlẹnmlẹn kakajẹ whenue e dẹ́ ota etọn bo kú.

To whenẹnu, aigba sisọsisọ daho de wá aimẹ, bo zẹ̀ osé lẹ. E sinyẹn sọmọ bọ yọdò he to gbonu Jelusalẹm tọn lẹ hùn bọ oṣiọ lẹ sọ tọ́njẹgbonu sọn yé mẹ. Aligbọntọ he mọ oṣiọ he to gbonu lọ lẹ biọ “tòdaho wiwe lọ mẹ” bo dọ nuhe yé ṣẹṣẹ yinukundomọ lẹ.—Matiu 12:11; 27:51-53.

To whenue Jesu kú, họmẹgbòvọ̀ gaa pinpẹn he gbò Fiwiwe lọ dovo na Fiwiwe Gbaugbau lọ to tẹmpli mẹ tlẹ́n do awe sọn aga wá odò. Nujijọ he sẹhundaga ehe yin dohia homẹgble Jiwheyẹwhe tọn de sọta mẹhe hù Visunnu etọn lẹ bo zẹẹmẹdo dọ aliho he yì Fiwiwe Gbaugbau lọ mẹ, enẹ wẹ olọn lọsu mẹ, ko hùndonuvo todin.—Heblu lẹ 9:2, 3; 10:19, 20.

E họnwun dọ, obu daho de jẹ omẹ lọ lẹ ji. Mẹkanwekowhàngán he yin azọ́ndena nado hù i lọ lá dọmọ: “Matin ayihaawe, Visunnu Jiwheyẹwhe tọn wẹ dawe ehe.” (Malku 15:39) E sọgan ko tin to finẹ to whenue Pilati to whẹdana Jesu bọ whẹho he gando Visunnu Jiwheyẹwhe tọn yinyin etọn go lọ do yin hodọdeji. Todin, ewọ kudeji dọ dodonọ de wẹ Jesu, podọ dọ Visunnu Jiwheyẹwhe tọn wẹ e yin nugbonugbo.

Mẹdevo lẹ he nujijọ vonọtaun ehelẹ dobuna, dedo owhé yetọn lẹ gbè, “bo to akọ́nnu yetọn hò” na awubla sinsinyẹn po winyan po wutu. (Luku 23:48) Yọnnu susu he yin devi Jesu tọn bo zingbejizọnlin hẹ ẹ to ojlẹ de mẹ wayi lẹ lọsu tin to mẹhe to nupọn sọn olá lẹ mẹ. Nujijọ ayidego tọn ehelẹ yinuwado yelọsu ji taun.

Plọnnu Dogọ

Malia Duto Awufiẹsa lọ Ji

Apajlẹ Malia, he yin onọ̀ Jesu tọn, sọgan gọalọna we eyin a to pipehẹ awufiẹsa sinsinyẹn.