Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 129

Pilati Lá Dọmọ: “Mì Pọ́n! Dawe Lọ!

Pilati Lá Dọmọ: “Mì Pọ́n! Dawe Lọ!

MATIU 27:15-17, 20-30 MALKU 15:6-19 LUKU 23:18-25 JOHANU 18:39–19:5

  • PILATI TẸNPỌN NADO TÚN JESU DOTE

  • JU LẸ BIỌ BALABAS

  • YÈ ṢÀN JESU KÒ BO SAYANA ẸN

Pilati dọna gbẹtọgun he to okú Jesu tọn dín lọ dọmọ: “Yẹn . . . ma mọ dodonu de na owhẹ̀ he mì to sisadokọna dawe ehe. Na nugbo tọn, mọjanwẹ Hẹlọdi lọsu ma mọ owhẹ̀ de dokọna ẹn do niyẹn.” (Luku 23:14, 15) Todin, Pilati kàn ayiha devo nado tẹnpọn nado tún Jesu dote, bo dọna gbẹtọ lọ lẹ dọmọ: “Mì tindo aṣa de dọ yẹn ni nọ tún omẹ de dote na mì to hùnwhẹ Juwayi tọn whenu. Enẹwutu, be mìwlẹ jlo dọ yẹn ni tún ahọlu Ju lẹ tọn lọ dote na mì ya?”—Johanu 18:39.

Pilati yọnẹn dọ gàntọ de tin he nọ yin Balabas, mẹhe yin yinyọnẹn taidi jaguda, gufọntọ, podọ hlọnhutọ de. Enẹwutu, Pilati kanse dọmọ: “Mẹnu wẹ mì jlo dọ yẹn ni tundote na mì, Balabas kavi Jesu, mẹhe yè nọ ylọdọ Klisti?” Na yẹwhenọgán lẹ to omẹ lọ lẹ sisẹ́ wutu, yé biọ dọ Balabas ni yin tuntundote, kakati nido yin Jesu. Pilati sọ vọ́ kanse dọmọ: “Mẹnu to yé omẹ awe lẹ mẹ wẹ mì jlo dọ yẹn ni tundote na mì?” Gbẹtọgun lọ dawhá dọmọ: “Balabas”!—Matiu 27:17, 21.

Pilati jẹflumẹ bo kanse dọmọ: “To whelọnu lo, etẹwẹ yẹn na wà na Jesu, mẹhe yè nọ ylọdọ Klisti?” Omẹ lọ lẹ sọ dawhá dọmọ: “Gbọ ewọ ni yin hùhù do pòtin ji!” (Matiu 27:22) Winyan ma hù yé nado biọ okú dawe homẹvọnọ de tọn. Pilati vẹ̀ yé dọmọ: “Oylan tẹwẹ dawe ehe ka wà taun? Yẹn ma mọ nudepope he jẹna okú to ewọ mẹ; enẹwutu yẹn na sayana ẹn bo tún in dote.”—Luku 23:22.

Mahopọnna vivẹnudido debọdo-dego Pilati tọn, gbẹtọgun he to adán ji lọ dawhá gángán to pọmẹ dọmọ: “Gbọ ewọ ni yin hùhù do pòtin ji!” (Matiu 27:23) Sinsẹ̀ngán lẹ ko yinuwado gbẹtọgun lọ ji sọmọ bọ ohùn janwẹ na hẹn pekọ wá na yé! Podọ e ma yin ohùn sẹ́nhẹngbatọ de tọn, kavi hlọnhutọ de tọn gba. Ohùn dawe homẹvọnọ he yin kuavọdona to azán atọ́n die wayi taidi Ahọlu de to Jelusalẹm lọ tọn wẹ. Eyin devi Jesu tọn lẹ tin to finẹ, yé gbọṣi abọẹ bo whlá yede.

Pilati mọdọ nuhe dọ emi te ma jla nudepope do. Zingidi lọ fọ́n bo to jijideji, enẹwutu e yí osin pẹẹde bo klọ́ alọ etọn lẹ to nukun gbẹtọgun lọ tọn mẹ bo dọna yé dọmọ: “Yẹn wé sọn ohùn dawe ehe tọn mẹ. Mìwlẹ wẹ enẹ dù.” Mahopọnna enẹ, pọndohlan yetọn ma diọ. Kakatimọ, yé dọmọ: “Ohùn etọn ni wá míwlẹ po ovi mítọn lẹ po ji.”—Matiu 27:24, 25.

Ojlo ayimatẹn-gán lọ tọn nado hẹn pekọ wá na yé sinyẹn hugan ojlo etọn nado wà nuhe ewọ yọnẹn dọ e sọgbe. Enẹwutu, Pilati tún Balabas dote na gbẹtọgun lọ sọgbe hẹ obiọ yetọn. E biọ dọ avọ̀ ni yin didesọn Jesu go bọ e yin hihò.

To mẹhiho do okà ji ehe godo, awhànfuntọ lọ lẹ plan Jesu yì họ̀nmẹ ayimatẹn-gán lọ tọn. Awhànfuntọ lọ lẹ sọ pli dopọ bo sayana ẹn dogọ. Yé lọ̀n jẹgbakun owùn tọn de bo ṣinyọ́n do ota na ẹn. Awhànfuntọ lọ lẹ sọ ze ofánpò de do adusilọ etọn mẹ bo ṣinyọ́n awù daho vẹẹ ṣẹ́ṣẹ́ de na ẹn, taidi dehe ahọlu lẹ nọ ṣinyọ́n nkọ. Yé sọ ṣàn ẹn kò dọmọ: “Kudo lewhenu, hiẹ Ahọlu Ju lẹ tọn!” (Matiu 27:28, 29) Humọ, yé túntán do Jesu go bosọ nọ hotómẹ na ẹn. Yé yí ofánpò lọ sọn e si bo nọ yí do lì ota na ẹn, bosọ to owùn he to “jẹgbakun” winyandomẹ tọn etọn go lẹ zín do tamẹ na ẹn dogọ.

Sisi mẹdetiti tọn po huhlọn ayidego tọn he Jesu yí do pehẹ ehe lẹpo yinuwado Pilati ji sọmọ bọ ewọ ze afọdide devo nado de ota etọn sọn whẹho lọ mẹ, bo dọmọ: “Mì pọ́n! Yẹn plan ẹn jẹgbonu wá na mì, na mì nido yọnẹn dọ yẹn ma mọ oylan de to okọ̀ na ẹn.” Be Pilati lẹndọ Jesu hinhẹnwa kọho todin, dile bápa po ohùn po to e go, na whàn gbẹtọgun lọ nado jogbe wẹ ya? Dile Jesu ṣite to gbẹtọgun kanylantọ lọ nukọn, Pilati lá dọmọ: “Mì pọ́n! Dawe lọ!”—Johanu 19:4, 5.

Mahopọnna dọ Jesu yin hihò bo yin awuhẹngblena, e ma hẹn sisi mẹdetiti tọn po adọgbigbo etọn po bu sọmọ bọ Pilati lọsu na tlẹ ko doayi e go, na hogbe etọn lẹ taidi nuhe do sisi po lẹblanu po hia.