Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 128

Pilati po Hẹlọdi po Mọdọ Jesu Yin Homẹvọnọ

Pilati po Hẹlọdi po Mọdọ Jesu Yin Homẹvọnọ

MATIU 27:12-14, 18, 19 MALKU 15:2-5 LUKU 23:4-16 JOHANU 18:36-38

  • PILATI PO HẸLỌDI PO GBEJE OWHẸ̀ HE YIN SISADOKỌNA JESU LẸ PỌ́N

Jesu ma tẹnpọn nado whlá do Pilati dọ ewọ yin ahọlu de nugbonugbo. Etomọṣo, Ahọluduta etọn ma yin owùnu de na Lomu. Jesu dọmọ: “Ahọluduta ṣie ma yin apadewhe aihọn ehe tọn. Eyin Ahọluduta ṣie ko yin apadewhe aihọn ehe tọn wẹ, devizọnwatọ ṣie lẹ na ko hoavùn bọ yẹn ma na ko yin zizejo na Ju lẹ. Ṣigba, nalete, Ahọluduta ṣie ma yin sọn aihọn ehe mẹ.” (Johanu 18:36) Mọwẹ, Jesu tindo Ahọluduta de, ṣigba e ma yin aihọn ehe tọn.

Pilati ma jo whẹho lọ do domọ. E kanse dọmọ: “Eyọn, todin, be ahọlu de wẹ hiẹ yin ya?” Jesu dike na Pilati ni yọnẹn dọ tadona dagbe lọ kọ̀n wẹ ewọ ko wá, bo gblọn dọmọ: “Hiẹ lọsu wẹ to didọ dọ yẹn yin ahọlu de. Na ehe wutu wẹ yẹn do yin jiji, podọ na ehe wutu wẹ yẹn ko wá aihọn mẹ, na yẹn nido dekunnu gando nugbo lọ go. Mẹdepope he to adà nugbo lọ tọn mẹ nọ dotoaina ogbè ṣie.”—Johanu 18:37.

To ojlẹ de mẹ wayi, Jesu ko dọna Tọmasi dọmọ: “Yẹn wẹ aliho lọ, nugbo lọ po ogbẹ̀ po.” Todin, e to didọna Pilati lọsu dọ lẹndai he wutu emi do yin didohlan aigba ji wẹ nado dekunnu gando “nugbo lọ” go, titengbe nugbo he gando Ahọluduta etọn go. Jesu magbe nado yin nugbonọ na nugbo enẹ eyin e na tlẹ biọ dọ ewọ ni hẹn ogbẹ̀ etọn bu. Pilati kanse dọmọ: “Etẹwẹ yin nugbo?” ṣigba e ma nọtepọn zẹẹmẹ devo. E mọdọ nuhe emi sè lẹ ko pé nado dawhẹna dawe ehe.—Johanu 14:6; 18:38.

Pilati lẹkọyi gbẹtọgun he to ote to gbonu họ̀nmẹ lọ tọn dè. E taidi dọ Jesu to apá na ẹn to whenue e dọna yẹwhenọgán lẹ po mẹhe topọ hẹ yé lẹ po dọmọ: “Yẹn ma mọ sẹ́nhẹngba de to dawe ehe mẹ.” Nudide enẹ hẹn homẹgble gbẹtọgun lọ bọ yé tẹkudeji dọmọ: “E nọ hẹn gbẹtọ lẹ fọnadán gbọn nupinplọnmẹ lẹdo Jude lẹpo pé dali, yèdọ bẹsọn Galili kaka wáfi.”—Luku 23:4, 5.

Zohunhun agọ̀ he ma sọgbe hẹ lẹnpọn dagbe Ju lẹ tọn dona ko paṣa Pilati taun. Dile yẹwhenọgán lẹ po sunnu mẹho lẹ po to awhádo mapote, Pilati kanse Jesu dọmọ: “Be hiẹ ma sè onú susu he yé to kunnu etọn de sọta we lẹ wẹ?” (Matiu 27:13) Jesu ma gblọn nudepope. Abọẹninọ etọn to whẹsadokọnamẹ ylankan lọ lẹ nukọn paṣa Pilati.

Ju lẹ dohia dọ “Galili” gbọ́n wẹ Jesu ko bẹsọn. Dile Pilati to dodinna enẹ, e sè dọ Galilinu de wẹ Jesu yin na taun tọn. Ehe na Pilati linlẹn devo gando lehe ewọ sọgan deta sọn owhẹ̀ Jesu tọn didọ mẹ do go. Hẹlọdi Antipa (visunnu Hẹlọdi Daho lọ tọn) wẹ yin ogán to Galili, podọ ewọ tin to Jelusalẹm to ojlẹ Juwayi tọn ehe mẹ. Enẹwutu, Pilati do Jesu hlan Hẹlọdi dè. Hẹlọdi Antipa wẹ gbòtana Johanu Baptizi lọ. To nukọn mẹ, to whenue e sè dọ Jesu to azọ́njiawu lẹ wà, Hẹlọdi to nuhà dọ Jesu na ko yin Johanu he yin finfọn sọn oṣiọ lẹ mẹ.—Luku 9:7-9.

Todin, homẹhun Hẹlọdi na e ko to nukundo nado mọ Jesu. E ma yindọ e jlo na gọalọna Jesu kavi dovivẹnu depope nado dindona eyin owhẹ̀ he yin sisadokọna ẹn lọ lẹ yin nugbo wutu wẹ gba. Tlintlindo dín wẹ Hẹlọdi te poun, bo “tindo todido nado mọ ohia etọn delẹ.” (Luku 23:8) Ṣigba, Jesu ma hẹn pekọ wá na tlintlindo dindin Hẹlọdi tọn. Na nugbo tọn, to whenue Hẹlọdi kanhose Jesu, e ma gblọn nudepope na ẹn. Na e vẹna Hẹlọdi wutu, ewọ po awhànfuntọ he nọ basi hihọ́na ẹn lẹ po “ṣàn [Jesu] kò.” (Luku 23:11) Yé do awù he to sisẹ́ de na ẹn bo yí i do davlẹ. Enẹgodo, Hẹlọdi gọ̀ Jesu dohlan Pilati dè. Hẹlọdi po Pilati po ko yin kẹntọ dai, ṣigba todin yé lẹzun họntọn vivẹ́ lẹ.

To whenue Jesu lẹkọwa, Pilati ylọ yẹwhenọgán lẹ, ogán Ju lẹ tọn, po omẹ lọ lẹ po pli bo dọmọ: “Yẹn dindona ẹn to mì nukọn ṣigba bo ma mọ dodonu de na owhẹ̀ he mì to sisadokọna dawe ehe. Na nugbo tọn, mọjanwẹ Hẹlọdi lọsu ma mọ owhẹ̀ de dokọna ẹn do niyẹn, na e gọ̀ ẹ dohlan mí, podọ mì pọ́n! e ma ko wà nudepope he jẹna okú. Enẹwutu, yẹn na sayana ẹn bo tún in dote.”—Luku 23:14-16.

Pilati to jijlo vẹkuvẹku nado tún Jesu dote, na e doayi e go dọ nuvẹun wutu wẹ yẹwhenọgán lẹ do ze e jo. Dile Pilati to tintẹnpọn nado tún Jesu dote, whẹwhinwhẹ́n devo whàn ẹn nado wàmọ. To whenue e tin to whẹdaján etọn ji, asi etọn dowẹn hlan ẹn dọmọ: “A doalọ dawe dodonọ enẹ go blo, na yẹn jiya susu to odlọ mẹ [e họnwun dọ sọn Jiwheyẹwhe dè] to egbé na ewọ tọn wutu.”—Matiu 27:19.

Pilati yọnẹn dọ emi dona tún dawe homẹvọnọ ehe dote, amọ́ nawẹ e na wàmọ gbọn?