Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 108

Jesu Họ̀ngán sọn Omọ̀ Yetọn lẹ Mẹ

Jesu Họ̀ngán sọn Omọ̀ Yetọn lẹ Mẹ

MATIU 22:15-40 MALKU 12:13-34 LUKU 20:20-40

  • ONÚ SESALI TỌN LẸ NA SESALI

  • BE GBẸTỌ LẸ NA WLEALỌ TO FỌNSỌNKU WHENU YA?

  • GBEDIDE HE KLO HUGAN LẸ

Adi to dido kẹntọ sinsẹ̀n tọn Jesu tọn lẹ. E ṣẹṣẹ na apajlẹ lẹ nado hùngona kanyinylan yetọn. Todin, Falesi lẹ blasé nado domọwle e. Yé to ayiha kàn nado hẹn ẹn na ewọ nido dọ nude he na zọ́n bọ e sọgan yin zizejo na ayimatẹn-gán Lomu tọn, podọ yé nakuẹ delẹ to devi yetọn lẹ mẹ nado sọgan domọwle e.—Luku 6:7.

Omẹ ehelẹ kanse e dọmọ: “Mẹplọntọ, mí yọnẹn dọ hiẹ nọ dọho bo nọ plọnmẹ ganji bo masọ nọ homẹnukuntapọn, ṣigba hiẹ nọ plọnmẹ aliho Jiwheyẹwhe tọn to nugbo mẹ: Be e jẹ dọ mí ni sú tòkuẹ hlan Sesali ya kavi lala?” (Luku 20:21, 22) Yé ma penugo nado doyẹklọ Jesu gbọn mẹpipa oklọ tọn yetọn dali, na e yọnẹn dọ yẹnuwiwa po ayiha gigẹdẹ po wẹ to godona wutu. Eyin ewọ dọ, ‘Lala, e ma sọgbe nado sú tòkuẹ ehe,’ yé sọgan sawhẹ gufinfọn sọta gandudu Lomu tọn dokọna ẹn. Ṣigba, eyin e dọ, ‘Mọwẹ, mì sú tòkuẹ ehe,’ omẹ ehelẹ he gandudu Lomu tọn ko to kọgbidina, sọgan mọnukunnujẹemẹ to aliho agọ̀ mẹ bo na diọnukunsọ ẹ. Enẹwutu, gblọndo tẹwẹ e na?

Jesu gblọn dọmọ: “Naegbọn mìwlẹ do to whiwhle mi pọ́n, mì yẹnuwatọ lẹ? Mì do abọgan-kuẹ he nọ yin yíyí do sú takuẹ lọ hia mi.” Yé hẹn denali de wá bọ e kanse dọmọ: “Yẹdide po nukinkan mẹnu tọn po die?” Yé gblọn dọmọ: “Sesali tọn.” Whenẹnu wẹ Jesu na anademẹ titengbe ehe dọmọ: “To whelọnu lo, mì yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.”—Matiu 22:18-21.

Nuhe Jesu dọ lẹ hẹn awuji sunnu lọ lẹ. Yé dedo, na gblọndo nuyọnẹn tọn etọn bọnùdo na yé wutu. Amọ́, ozán ma ko kú, podọ omọ̀ devo lẹ gbẹ́ pò nukọn ja na ẹn. To whenue Falesi lẹ ko gboawupo nado domọwle Jesu, ogán pipli sinsẹ̀n tọn devo lẹ dọnsẹpọ ẹ.

Sadusi lẹ, he nọ dọ dọ fọnsọnku ma tin, fọ́n whẹho fọnsọnku po yọnnu sínsọ́n tọn po dote. Yé kanse dọmọ: “Mẹplọntọ, Mose dọ dọ: ‘Eyin sunnu de kú bo ma tindo ovi, nọvisunnu etọn dona sọ́n asi etọn bo jivi do nọvisunnu etọn he ko kú lọ tẹnmẹ.’ Todin, nọvisunnu ṣinawe delẹ ko nọ mí dè. Tintan wlealọ bo lẹzun matintọ, podọ na e ma jivi wutu, nọvisunnu etọn sọ́n asi etọn. Nudopolọ sọ jọ do omẹ awetọ po atọ̀ntọ po go kakajẹ yé omẹ ṣinawe lẹpo ji. To yemẹpo godo, yọnnu lọ kú. To whelọnu lo, asi mẹnu tọn wẹ e na yin to yé omẹ ṣinawe lẹ mẹ to fọnsọnku whenu? Na yemẹpo wẹ ko dà ẹ pọ́n di asi.”—Matiu 22:24-28.

Jesu yihodọ sọn kandai Mose tọn lẹ, ehe Sadusi lẹ kẹalọyi mẹ, bo gblọn dọmọ: “Be e ma yin ehe wutu wẹ mì do to nuṣiwa, na mì ma yọ́n Owe-wiwe lẹ kavi huhlọn Jiwheyẹwhe tọn? Na whenue yé na fọ́n sọn oṣiọ lẹ mẹ, sunnu lẹ ma na wlealọ mọjanwẹ yọnnu lẹ ma na yin nina to alọwle mẹ do niyẹn, amọ́ yé na tin taidi angẹli lẹ to olọn mẹ. Ṣigba, gando oṣiọ lẹ go, dọ yé na yin finfọn, be mì ma ko hia to owe Mose tọn mẹ, to kandai he gando wùnkan he to miyọ́n ji go lọ mẹ dọ, Jiwheyẹwhe dọna ẹn dọ: ‘Yẹn wẹ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn’? E ma yin Jiwheyẹwhe oṣiọ lẹ tọn, ṣigba mẹhe to ogbẹ̀ lẹ tọn. Nuṣiwa wẹ mì te taun.” (Malku 12:24-27; Eksọdusi 3:1-6) Gblọndo enẹ hẹn awuji gbẹtọgun lọ lẹ.

Jesu ko bọnùdo na Falesi lẹ po Sadusi lẹ po, bọ todin, omẹ delẹ sọn agọjẹdomẹtọ sinsẹ̀n tọn ehelẹ mẹ kọngbedopọ bo wá nado vọ́ whlé e pọ́n. Wekantọ de kanse e dọmọ: “Mẹplọntọ, gbedide tẹwẹ klohugan to Osẹ́n lọ mẹ?”—Matiu 22:36.

Jesu gblọn dọmọ: “Tintan lọ wẹ, ‘Sè hiẹ Islaeli E, Jehovah Jiwheyẹwhe mítọn, Jehovah dopo wẹ, podọ hiẹ dona yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.’ Awetọ lọ die, ‘Hiẹ dona yiwanna kọmẹnu towe di dewe.’ Gbedide depope ma klohu ehelẹ.”—Malku 12:29-31.

Whenue wekantọ lọ sè gblọndo lọ, e dọmọ: “Mẹplọntọ, hiẹ dọ hójọhó he sọgbe hẹ nugbo, ‘Dopo wẹ Ewọ, devo de masọ tin gbọnvona Ewọ,’ podọ yíyí ahun mẹtọn lẹpo, nukunnumọjẹnumẹ mẹtọn lẹpo, podọ huhlọn mẹtọn lẹpo do yiwanna ẹn, podọ nado yiwanna kọmẹnu mẹtọn taidi mẹdetiti, ehelẹ yin nujọnu taun hú avọ́nunina mimẹ̀ po avọ́sinsan lẹpo po.” Na Jesu mọdọ e na gblọndo po zinzin po wutu, e dọna ẹn dọmọ: “Hiẹ ma dẹn do Ahọluduta Jiwheyẹwhe tọn.”—Malku 12:32-34.

E ko yì azán atọ̀n (Nisan 9tọ, 10tọ po 11tọ po) he Jesu to mẹplọn to tẹmpli mẹ. Mẹdelẹ, taidi wekantọ ehe, yí homẹhunhun do dotoaina ẹn. Amọ́, sinsẹ̀ngán lẹ ma wàmọ, podọ yé ma tindo “adọgbigbo nado kàn kanbiọ de sè e ba.”

Plọnnu Dogọ

Kanbiọ lẹ sọn Wehiatọ lẹ Dè—août 2014

To whenue Jesu dọ dọ mẹhe na yin finfọnsọnku lẹ “ma na wlealọ kavi yin nina to alọwle mẹ,” be fọnsọnku aigba ji tọn hodọ wẹ e te ya?

Todido Tẹwẹ Tin Na Mẹhe Kú Lẹ?

Etẹwẹ nọ jọ do mí go to whenue mí kú? Be mí na wá mọ mẹyiwanna mítọn he kú lẹ gbèdopo ya?