Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 115

Juwayi Godo Tọn He Jesu Na Basi to Dindọnsẹpọ

Juwayi Godo Tọn He Jesu Na Basi to Dindọnsẹpọ

MATIU 26:1-5, 14-19 MALKU 14:1, 2, 10-16 LUKU 22:1-13

  • SINSẸ̀NGÁN LẸ SUAHỌ JUDA ISKALIỌTI NADO DE JESU HIA

  • APỌSTELI AWE WLEAWUNA JUWAYI LỌ

Jesu dotana nupinplọn apọsteli ẹnẹ lọ lẹ to Osó Olivie tọn ji bo na gblọndo kanbiọ yetọn gando tintin tofi etọn to sọgodo po vivọnu titonu lọ tọn po go.

Azán Nisan 11tọ tọn lọ ján taun. Vlavo to whenue Jesu po apọsteli lẹ po lẹkọ jei Bẹtani nado yì dọ́ finẹ wẹ e dọna yé dọmọ: “Mìwlẹ yọnẹn dọ bẹsọn din, Juwayi pò azán awe, podọ Visunnu gbẹtọ tọn na yin zizejo nado yin hùhù do pòtin ji.”—Matiu 26:2.

E taidi dọ apọsteli etọn lẹ kẹdẹ wẹ Jesu yí azán he bọdego lọ, enẹ wẹ mercredi zan hẹ. To mardi, e ko gblewhẹdo sinsẹ̀ngán lẹ bo hùngona yé to gbangba. Yé to dindin nado hù i. Enẹwutu, e ma do ede hia to gbangba to Nisan 12tọ gbè, na nudepope nikaa glọnalina ẹn nado basi hùnwhẹ Juwayi tọn hẹ apọsteli etọn lẹ to họyiyi owhè tọn he na bọdego, enẹ wẹ to bẹjẹeji Nisan 14tọ tọn.

Ṣigba, alọnu yẹwhenọgán lẹ po sunnu mẹho lẹ po tọn ma vò jẹnukọnna Juwayi lọ. Yé pli dopọ to awánu yẹwhenọ daho Kaifa tọn mẹ. Etẹwutu? Yé to adidu na Jesu ko to gòhùnna yé wutu. Todin, yé blasé dopọ “nado gbọn ayiha gigẹdẹ dali wle Jesu bo hù i.” Nawẹ yé na wàmọ gbọn podọ to whetẹnu? Yé dọmọ: “E ma dona yin to hùnwhẹ lọ whenu, na zingidi nikaa fọ́n to gbẹtọ lẹ ṣẹnṣẹn.” (Matiu 26:4, 5) Yé to budi, na mẹsusu yiwanna Jesu wutu.

To ojlẹ enẹ mẹ, jonọ de wá sinsẹ̀ngán lọ lẹ dè. E paṣa yé taun nado mọdọ Juda Iskaliọti he yin dopo to apọsteli Jesu lọsu tọn lẹ mẹ wẹ. Satani ko yí linlẹn lọ nado de Klunọ etọn hia do ahun etọn mẹ! Juda kanse yé dọmọ: “Etẹwẹ mì na na mi na yẹn nido de e hia na mì?” (Matiu 26:15) Ehe hùnhomẹ na yé bọ yé “kọngbedopọ nado na ẹn fataka-kuẹ.” (Luku 22:5) Fataka-kuẹ nẹmu? Po homẹhunhun po, yé kọngbedopọ nado na ẹn fataka-kuẹ 30. E jẹna ayidego dọ ṣekẹli 30 wẹ yè nọ yí do họ̀ afanumẹ de. (Eksọdusi 21:32) Gbọnmọ dali, sinsẹ̀ngán lẹ dohia dọ yé gbẹwanna Jesu, dọ e ma họakuẹ sọmọ. Todin, Juda “jẹ dotẹnmẹ hundote dagbe de dín ji nado de e hia na yé to fie gbẹtọgun de ma te.”—Luku 22:6.

Nisan 13tọ bẹjẹeji to họyiyi owhè tọn to mercredi, podọ ozán ṣidopotọ he yin godo tọn he Jesu yizan to Bẹtani niyẹn. To wunkẹngbe, onú godo tọn he pò na Juwayi lọ lẹ dona yin awuwlena. Yé dona dín lẹngbọvu de, na e nido yin hùhù bọ kanlin lọ pete na yin hìhì to whenue Nisan 14tọ na bẹjẹeji. Fie wẹ yé na dù núdùdù lọ te, podọ mẹnu wẹ na wleawuna ẹn? Jesu ma na nudọnamẹ enẹlẹ. Gbọnmọ dali, Juda ma sọgan dọ yé na yẹwhenọgán lẹ.

Vlavo to bẹjẹeji jeudi whèmẹ tọn tlolo wẹ Jesu do Pita po Johanu po hlan sọn Bẹtani dọmọ: “Mì yì bo wleawuna Juwayi lọ, na mí nido sọgan dù.” Yé gblọn dọmọ: “Fie wẹ hiẹ jlo dọ mí ni wleawu etọn do?” Jesu basi zẹẹmẹ dọmọ: “To whenue mì biọ tòdaho lọ mẹ, dawe de he hẹn tọ̀zẹ́n osin tọn de na pé mì. Mì hodo e yì owhé he gbè e na biọ. Mì nisọ dọna whétọ owhé lọ tọn dọ, ‘Mẹplọntọ lọ dọmọ: “Fie wẹ abò jonọyiyi tọn lọ he mẹ yẹn sọgan dù Juwayi hẹ devi ṣie lẹ te?”’ Dawe enẹ nasọ do abò aga tọn daho de he ko yin jijlado hia mì. Mì wleawu etọn do finẹ.”—Luku 22:8-12.

Ayihaawe ma tin dọ devi Jesu tọn de wẹ whétọ lọ yin. E sọgan ko to nukundo obiọ Jesu tọn nado zan owhé etọn na hùnwhẹ ehe. To whenue apọsteli awe lọ lẹ jẹ Jelusalẹm, yé mọ nulẹpo dile Jesu ko dọna yé do. Enẹwutu, yé hẹn ẹn diun dọ lẹngbọvu lọ ko yin awuwlena bọ tito devo he núdùdù Juwayi tọn lọ na biọ lẹ ko yin bibasi bo na pé omẹ 13—enẹ wẹ Jesu po apọsteli etọn 12 lẹ po.