Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 124

Klisti Yin Didehia bo Yin Wiwle

Klisti Yin Didehia bo Yin Wiwle

MATIU 26:47-56 MALKU 14:43-52 LUKU 22:47-53 JOHANU 18:2-12

  • JUDA DE JESU HIA TO JIPA LỌ MẸ

  • PITA PÀ OTÓ NA DAWE DE

  • JESU YIN WIWLE

Ogàn wiawe zánmẹ tọn ko hò wayi. Yẹwhenọ lẹ ko kọngbedopọ nado sú fataka-kuẹ 30 Juda na e nido de Jesu hia. Enẹwutu, Juda deanana gbẹtọgun daho de he bẹ yẹwhenọgán lẹ po Falesi lẹ po hẹn, bọ yé to Jesu dín. Pipli awhànfuntọ Lomu tọn he sọawhànnu lẹ tọn de po awhàngán de po sọ hodo yé.

E họnwun dọ, to whenue Jesu yàn ẹn sọn núdùdù Juwayi tọn lọ tẹnmẹ, Juda dedo yẹwhenọgán lẹ dè to afọdopolọji. (Johanu 13:27) Yé bẹ ponọ yetọn titi lẹ pli gọna pipli awhànfuntọ lẹ tọn de. To tintan whenu, Juda na ko deanana yé yì abò he mẹ Jesu po apọsteli etọn lẹ po ko basi hùnwhẹ Juwayi tọn lọ te mẹ. Ṣigba todin, gbẹtọgun lọ ko dasá Agbàdo Kidlọni tọn bo dedo jipa lọ mẹ. Gbọnvona adánwanu lẹ, yé sọ hẹn zòwhán lẹ, po miyọ́ngbán lẹ po, bo magbe nado dín Jesu mọ.

Dile Juda to anadena gbẹtọgun lọ gbọn osó Olivie tọn ji, e deji dọ emi yọ́n fihe yé na mọ Jesu te. To osẹ he wayi mẹ, Jesu po apọsteli lẹ po nọ saba nọte to jipa Gẹtsemani tọn mẹ, to whenue yé zingbejizọnlin jei kavi lẹkọ sọn Jelusalẹm po Bẹtani po. Ṣigba, ozán ko kú todin podọ atin olivie tọn he to jipa lọ mẹ lẹ sọgan hẹn ẹn vẹawu nado mọ Jesu. Enẹwutu, nawẹ awhànfuntọ he sọgan nọma ko mọ Jesu pọ́n lẹ na penugo nado yọ́n ewọ gbọn? Nado gọalọna yé, Juda na yé ohia de. E dọmọ: “Mẹdepope he yẹn donùnùgo na, ewọ lọ wẹ; mì wle e bo plan ẹn sọyi, mì dike e họnyi blo.”—Malku 14:44.

To whenue Juda plan gbẹtọgun lọ biọ jipa lọ mẹ, e mọ Jesu po apọsteli etọn lẹ po, bo yì e dè tlọlọ. Juda dọmọ: “Kudo lewhenu, Labi!” bo donùnùgo na Jesu po zohunhun po. Jesu sọ gblọn dọmọ: “Dawe, lẹndai tẹ wutu wẹ a do tin tofi?” (Matiu 26:49, 50) Jesu na gblọndo na kanbiọ ede tọn, bo dọmọ: “Juda, nùdonùgo wẹ hiẹ yí do de Visunnu gbẹtọ tọn hia ya?” (Luku 22:48) Ṣigba, ede nú wẹ e wà!

Todin, Jesu sẹyì hinhọ́n zòwhán po miyọ́ngbán lọ lẹ po tọn nù bo kanse dọmọ: “Mẹnu dín wẹ mì te?” Gbẹtọgun lọ sọ gblọn dọmọ: “Jesu Nazalẹti tọn.” Jesu yí adọgbigbo do dọmọ: “Yẹn wẹ.” (Johanu 18:4, 5) Na dawe lọ lẹ ma yọ́n nuhe na jọ wutu, yé họ́jai.

Kakati nado yí dotẹnmẹ hundote enẹ zan bo họnyi to zánmẹ, Jesu sọ vọ́ kanse dọ mẹnu wẹ yé to dindin. To whenue yé sọ vọ́ dọmọ: “Jesu Nazalẹti tọn,” e yí ogbè fifá do dọmọ: “Yẹn dọna mì dọ yẹn wẹ. Enẹwutu, eyin yẹn wẹ mì to dindin, mì gbọ ehelẹ ni yì.” Etlẹ yin to ninọmẹ sinsinyẹn enẹ mẹ, Jesu flin nuhe e dọ wayi dọ emi ma na hẹn depope to devi lẹ mẹ bu. (Johanu 6:39; 17:12) Jesu ko basi hihọ́na apọsteli nugbonọ etọn lẹ podọ depope to yé mẹ ma ko bu “adavo visunnu vasudo tọn lọ”—enẹ wẹ Juda. (Johanu 18:7-9) Enẹwutu, e biọ dọ apọsteli nugbonọ emitọn lẹ ni yin jijodo nado yì.

Dile awhànfuntọ lọ lẹ deafọ ja Jesu dè, apọsteli lẹ wá mọnukunnujẹ nuhe to jijọ lọ mẹ. Yé kanse dọmọ: “Oklunọ, mí ni hú ohí mẹ wẹ ya?” (Luku 22:49) Whẹpo Jesu na do gblọn, Pita sún dopo to ohí awe he to apọsteli lọ lẹ si mẹ. E dómọna Malkọs he yin afanumẹ yẹwhenọ daho lọ tọn de, bo pà otó adusiwhé tọn etọn sẹ̀.

Jesu doalọ otó Malkọs tọn go, bo hẹn ẹn jẹgangan. Enẹgodo, e plọnmẹ onú titengbe de dile e degbena Pita dọmọ: “Gọ̀ ohí towe do otẹn etọn mẹ, na mẹhe ze ohí do mẹdevo ji lẹpo wẹ na dọ̀n gbọn ohí dali.” Jesu ko wleawufo nado yin wiwle, na e basi zẹẹmẹ dọmọ: “Nawẹ Owe-wiwe lẹ he dọ dọ e dona jọ domọ na mọ hẹndi do?” (Matiu 26:52, 54) E sọ yidogọ dọ: “Kọfo he Otọ́ lọ ko na mi, be yẹn ma na nù in wẹ ya?” (Johanu 18:11) Jesu yigbe nado wà ojlo Jiwheyẹwhe tọn, etlẹ yin kakajẹ okú.

Jesu kanse gbẹtọgun lọ dọmọ: “Be yẹn wẹ mìwlẹ tọ́n wá wiwle gbé bo hẹn ohí lẹ po aglọpò lẹ po taidi mẹhe ja jaguda de dè ya? Egbesọegbesọ wẹ yẹn nọ saba sinai bo nọ to mẹplọn to tẹmpli mẹ, ṣogan mìwlẹ ma wle mi. Ṣigba, ehe lẹpo jọ na nuhe yẹwhegán lẹ kàn dai lẹ nido mọ hẹndi.”—Matiu 26:55, 56.

Ogbẹ́ awhànfuntọ lẹ tọn lọ, awhàngán lọ, po ponọ Ju lẹ tọn po wle Jesu bo blá ẹ. To whenue apọsteli lẹ mọ ehe, yé họnyi. Ṣigba, “dẹpẹ” de—vlavo devi Malku—gbọṣi gbẹtọgun lọ mẹ nado sọgan hodo Jesu. (Malku 14:51) Yé doayi dẹpẹ ehe go, bọ gbẹtọgun lọ tẹnpọn nado wle e, enẹwutu e jo awugbó etọn do bo họnyi.