Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 105

Jesu Yí Ovòtin de Zan Nado Plọnnumẹ Gando Yise Go

Jesu Yí Ovòtin de Zan Nado Plọnnumẹ Gando Yise Go

MATIU 21:19-27 MALKU 11:19-33 LUKU 20:1-8

  • OVÒTIN HE FIỌ LỌ—NUPLỌNMẸ DE GANDO YISE GO

  • AṢẸPIPA JESU TỌN YIN AVÙNNUKUNDIỌSỌ

To whenue Jesu tọ́n sọn Jelusalẹm to lundi whèmẹ, e lẹkọyi Bẹtani he to dòdòmẹ Osó Olivie tọn to whèzẹtẹn-waji. E taidi dọ owhé họntọn etọn Lazalọsi, Malia po Malta po tọn gbè wẹ e nọ dọ́.

Todin, ai ko họ́n to Nisan 11tọ gbè. Jesu po devi etọn lẹ po gọjẹ aliji jei Jelusalẹm, fie e na yì tẹmpli mẹ whla godo tọn te. Podọ azán godo tọn lizọnyizọn gbangba tọn etọn tọn die whẹpo e nado basi hùnwhẹ Juwayi tọn, ze Oflin okú etọn tọn dai, bo na yì owhẹ̀ nukọn to enẹgodo bosọ yin hùhù.

To whenue yé lẹkọ sọn Bẹtani bo gbọn Osó Olivie tọn ji jei Jelusalẹm, Pita doayi atin he Jesu hodẹ̀do to azán he jẹnukọn gbè to afọnnu lọ go. E dawhá dọmọ: “Labi, pọ́n! ovòtin he hiẹ hodẹ̀do lọ ko fiọ.”—Malku 11:21.

Ṣigba, naegbọn Jesu degbedo atin lọ nado fiọ? E de nuhewutu wẹ hia to gblọndo etọn mẹ dọmọ: “Nugbo wẹ yẹn dọna mì, eyin mì tindo yise bo ma tindo ayihaawe, e ma yin nuhe yẹn wà na ovòtin lọ kẹdẹ wẹ mì na wà gba, ṣigba eyin mì tlẹ dọna osó ehe dọ, ‘Sẹtẹn sọn fi bo yì ohù mẹ,’ e na jọ domọ. Podọ nudepope he mì biọ to odẹ̀ mẹ, eyin mì tindo yise, mì na mọyi.” (Matiu 21:21, 22) Gbọnmọ dali, ewọ to nuhe e ko dọ wayi gando yise go vọ́ dọ wẹ, enẹ wẹ yindọ yise sọgan sẹtẹnna osó de.—Matiu 17:20.

Enẹwutu, to whenue Jesu degbedo atin lọ nado fiọ, onú titengbe de plọnmẹ wẹ e te gando nuhudo lọ nado tindo yise to Jiwheyẹwhe mẹ go. E dọmọ: “Onú lẹpo he mì hodẹ̀ bo biọ, mì ni yise dọ mì ko mọyi wẹ nkọ, mì nasọ mọ yé yí.” (Malku 11:24) Nuplọnmẹ titengbe nankọ die na hodotọ Jesu tọn lẹpo! Ehe wá do gànmẹ taun, titengbe na apọsteli he na pehẹ whlepọn sinsinyẹn lẹ to madẹnmẹ. Ovòtin he fiọ lọ po nuplọnmẹ gando yise go lọ po sọ do nudevo hia ga.

Taidi ovòtin ehe, akọta Islaeli tọn tindo awusọhia oklọ tọn. Omẹ akọta ehe tọn lẹ tin to haṣinṣan alẹnu tọn de mẹ hẹ Jiwheyẹwhe, podọ yé na ko nọ dohia to nukunta dọ emi nọ yìn Osẹ́n etọn. Ṣigba, akọta lọ blebu ma tindo yise bo masọ nọ de sinsẹ́n dagbe lẹ tọ́n. Yé tlẹ gbẹ́ Visunnu Jiwheyẹwhe titi tọn dai! Enẹwutu, to whenue Jesu degbedo ovòtin he ma tindo sinsẹ́n lọ nado fiọ, e do nuhe na yin kọdetọn lọ na akọta he ma tindo sinsẹ́n bo masọ tindo yise ehe hia.

E ma dẹn bọ Jesu po devi etọn lẹ po biọ Jelusalẹm. Dile e ko yin aṣa Jesu tọn do, e yì tẹmpli mẹ bo jẹ mẹplọn ji. Vlavo na yẹwhenọgán lẹ po sunnu mẹho omẹ lọ lẹ tọn lẹ po flin nuhe Jesu wà na akuẹdiọtọ lẹ to osọ he wayi wutu, yé diọavunnukunsọ ẹ dọmọ: “Aṣẹ tẹwẹ hiẹ yí do to onú ehelẹ wà? Kavi mẹnu wẹ na we aṣẹ ehe nado wà onú ehelẹ?”—Malku 11:28.

Jesu gblọn dọmọ: “Yẹn na kàn onú dopo biọ mì. Mì gblọnna mi, yẹnlọsu na dọ aṣẹ he yẹn yí do to onú ehelẹ wà na mì. Baptẹm Johanu tọn, sọn olọn wẹ kavi sọn gbẹtọ lẹ dè? Mì na mi gblọndo.” Agọjẹdomẹtọ etọn lẹ wẹ yin avùnnukundiọsọ todin. Yẹwhenọ lẹ po mẹho lọ lẹ po dewé hẹ ode awetọ nado yọ́n nuhe yé na gblọn bo dọmọ: “Eyin mí dọ, ‘Sọn olọn,’ ewọ na dọ, ‘To whelọnu lo, naegbọn mì ma do yí i sè?’ Ṣigba, be míwlẹ hà nado dọ, ‘Sọn gbẹtọ lẹ dè’?” Yé gblọn to aliho ehe mẹ na yé to budisi gbẹtọgun lọ wutu, “na yemẹpo wẹ ko nọ pọ́n Johanu hlan di yẹwhegán de nugbonugbo.”—Malku 11:29-32.

Mẹhe to agọjẹdo Jesu lẹ ma mọ gblọndo he sọgbe de. Enẹwutu, yé gblọn dọmọ: “Mí ma yọnẹn.” Whenẹnu wẹ Jesu dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì.”—Malku 11:33.