Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 139

Jesu Na Hẹn Paladisi Wá bo Na Dotana Azọ́ndenamẹ Etọn

Jesu Na Hẹn Paladisi Wá bo Na Dotana Azọ́ndenamẹ Etọn

1 KỌLINTINU LẸ 15:24-28

  • KỌDETỌN HE LẸNGBỌ LẸ PO GBỌGBỌẸ LẸ PO NA TINDO

  • MẸSUSU NA DUVIVI PALADISI TỌN TO AIGBA JI

  • JESU DO EDE HIA NADO YIN ALIHO LỌ, NUGBO LỌ PO OGBẸ̀ PO

Ojlẹ vude to baptẹm Jesu tọn godo, e pehẹ kẹntọ de he magbe nado glọnalina ẹn whẹpo ewọ ni tlẹ do bẹ lizọnyizọn etọn jẹeji. Na nugbo tọn, Lẹgba tẹnpọn whlasusu nado whlé Jesu pọ́n. To nukọn mẹ, Jesu dọ gando mẹylankan enẹ go dọmọ: “Ogán aihọn tọn lọ ja. Podọ ewọ ma tindo huhlọn do yẹn ji.”—Johanu 14:30.

To numimọ mẹ, apọsteli Johanu mọ nuhe to tepọn ‘dlagọni daho lọ, yèdọ odàn hoho lọ, he nọ yin yiylọdọ Lẹgba podọ Satani.’ Kẹntọ kanylantọ gbẹtọvi lẹ tọn enẹ na yin yinyan sọn olọn mẹ bo na wá “po homẹgble daho po, na e yọnẹn dọ whenu gli de wẹ emi tindo wutu.” (Osọhia 12:9, 12) Klistiani lẹ tindo whẹwhinwhẹ́n dagbe nado kudeji dọ yé to gbẹnọ to “whenu gli” enẹ mẹ bọ to madẹnmẹ, “dlagọni lọ, yèdọ odàn hoho lọ,” na yin dindlan do odò mapote mẹ bo ma na penugo nado wà nude na owhe 1 000, dile Jesu na to gandu to Ahọluduta Jiwheyẹwhe tọn mẹ.—Osọhia 20:1, 2.

To ojlẹ enẹ mẹ, etẹwẹ na to jijọ to aigba he yin fininọ mítọn ji? Mẹnu lẹ wẹ na nọ e ji, podọ to ninọmẹ tẹlẹ mẹ? Jesu lọsu na gblọndo kanbiọ enẹlẹ tọn. To apajlẹ he e na gando lẹngbọ lẹ po gbọgbọẹ lẹ po go mẹ, e do sọgodo he to tepọn dodonọ he taidi lẹngbọ lẹ hia, yèdọ mẹhe nọ kọngbedopọ hẹ mẹmẹsunnu Jesu tọn bosọ nọ wà dagbe na yé lẹ. E sọ hẹn nuhe to tepọn mẹhe ma nọ wàmọ lẹ, yèdọ mẹhe taidi gbọgbọẹ lẹ họnwun. Jesu dọmọ: “Omẹ ehelẹ [gbọgbọẹ lẹ] nasọ yin sinsánsẹ kakadoi, ṣigba dodonọ lẹ [lẹngbọ lẹ] na nọgbẹ̀ kakadoi.”—Matiu 25:46.

Enẹ gọalọna mí nado mọnukunnujẹ nuhe Jesu dọna sẹ́nhẹngbatọ lọ he nọ pòtin ji to apá na ẹn mẹ. E ma yin ahọsumẹ lọ nado tin to Ahọluduta olọn tọn mẹ he Jesu dopà etọn  na apọsteli nugbonọ etọn lẹ wẹ ewọ zedonukọnna dawe ehe gba. Kakatimọ, Jesu dopà na ylanwatọ he lẹnvọjọ ehe dọmọ: “Nugbo wẹ yẹn dọna we to egbé, Hiẹ na tin hẹ mi to Paladisi mẹ.” (Luku 23:43) Gbọnmọ dali, dawe ehe mọ todido yí nado nọgbẹ̀ to Paladisi mẹ—yèdọ jipa whanpẹnọ de. E họnwun dọ, mẹhe do yede hia to egbehe nado yin lẹngbọ bo na “nọgbẹ̀ kakadoi” lẹ lọsu na tin to Paladisi enẹ mẹ.

Enẹ sọgbe hẹ zẹẹmẹ he apọsteli Johanu basi gando ninọmẹ he na tin to aigba ji to whenẹnu lẹ go. E dọmọ: “Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po. Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:3, 4.

Whẹpo sẹ́nhẹngbatọ enẹ nado duvivi ogbẹ̀ tọn to Paladisi mẹ, e dona yin finfọn sọn oṣiọ lẹ mẹ. Podọ e ma yin ewọ kẹdẹ wẹ na yin finfọnsọnku. Jesu hẹn ehe họnwun to whenue e dọmọ: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu, mẹhe wà dagbe lẹ na fọnsọnku ogbẹ̀ tọn, mẹhe wà onú ylankan lẹ na fọnsọnku whẹdida tọn.”—Johanu 5:28, 29.

Ṣigba, etẹwẹ dogbọn apọsteli nugbonọ lẹ po omẹ kleun devo he na tin hẹ Jesu to olọn mẹ lẹ po dali? Biblu dọmọ: “Yé na yin yẹwhenọ Jiwheyẹwhe tọn lẹ podọ Klisti tọn lẹ, yé nasọ duahọlu hẹ ẹ na owhe 1 000.” (Osọhia 20:6) Mẹhe na yin gandutọgbẹ́ Klisti tọn ehelẹ na yin sunnu po yọnnu po he ko nọ aigba ji lẹ. Enẹwutu, e họnwun dọ yé na yí awuvẹmẹ po mẹtọnhopọn po do dugán do mẹhe na nọ aigba ji lẹ ji.—Osọhia 5:10.

Jesu na yí avọ́sinsan ofligọ tọn etọn zan do gbẹtọvi he na tin to aigba ji lẹ tamẹ bo na de yé sọn dẹ̀hodo ylando tọn he yé dugu etọn glọ. Ewọ po gandutọgbẹ́ etọn lẹ po na hẹn gbẹtọvi nugbonọ lẹ jẹ pipé kọ̀n. Na taun tọn, whenẹnu wẹ gbẹtọvi lẹ na duvivi ogbẹ̀ tọn sọgbe hẹ lẹndai Jiwheyẹwhe tọn to dowhenu, to whenue e dọna Adam po Evi po nado sudeji bo gọ́ aigba ji. Etlẹ yin okú he yin kọdetọn ylando Adam tọn ma nasọ tin ba!

Gbọnmọ dali, Jesu na ko dotana nuhe Jehovah biọ to e si nado wà lẹpo. To vivọnu Gandudu Owhe Fọtọ́n tọn Jesu tọn, ewọ na ze Ahọluduta lọ po whẹndo gbẹtọvi tọn he ko yin hinhẹn jẹ pipé kọ̀n lọ po do alọmẹ na Otọ́ etọn. Apọsteli Paulu wlan gando nuyiwa whiwhẹ tọn Jesu tọn he jiawu ehe go dọmọ: “To whenue onú lẹpo na ko yin hinhẹn zun mẹmẹglọ na ẹn godo, to whenẹnu Visunnu lọ lọsu ga na hẹn ede zun mẹmẹglọ na Omẹ lọ he hẹn onú lẹpo zun mẹmẹglọ na ẹn, na Jiwheyẹwhe nido yin onú lẹpo na mẹlẹpo.”—1 Kọlintinu lẹ 15:28.

E họnwun dọ Jesu to adà ayidego tọn de yiwà to lẹndai gigonọ Jiwheyẹwhe tọn lẹ hinhẹndi mẹ. Podọ, dile lẹndai ehelẹ na to hẹndi mọ kakadoi, ewọ na yinuwa mlẹnmlẹn sọgbe hẹ zẹẹmẹ he e basi gando ede go dọmọ: “Yẹn wẹ aliho lọ, nugbo lọ po ogbẹ̀ po.”—Johanu 14:6.

Plọnnu Dogọ

Etẹwẹ Yin Linlẹn Jiwheyẹwhe Tọn Gando Aigba Go?

Biblu dọ nuhewutu Jiwheyẹwhe dá aigba, whenue yajiji na doalọte, podọ nuhe sọgodo bẹhẹn na aigba po mẹhe nọ nọ̀ e ji lẹ po.