Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 107

Ahọlu de Basi Oylọna Gbẹtọ lẹ Wá Hùnwhẹ Alọwle Tọn

Ahọlu de Basi Oylọna Gbẹtọ lẹ Wá Hùnwhẹ Alọwle Tọn

MATIU 22:1-14

  • APAJLẸ HÙNWHẸ ALỌWLE TỌN LỌ TỌN

Dile lizọnyizọn Jesu tọn to vivọnu wá, e gbẹ́ to apajlẹ lẹ yizan nado hùngona wekantọ lẹ po yẹwhenọgán lẹ po. Enẹwutu, yé jlo na hù i. (Luku 20:19) Amọ́, Jesu ma ko hùngona yé pò. E sọ na apajlẹ devo:

“Ahọluduta olọn tọn sọgan yin yiyijlẹdo ahọlu de go he basi hùnwhẹ alọwle tọn de na visunnu etọn. E sọ do afanumẹ etọn lẹ hlan nado yì ylọ mẹhe yin oylọ-basina lẹ wá hùnwhẹ alọwle tọn lọ, ṣigba yé ma jlo nado wá.” (Matiu 22:2, 3) Nado bẹ apajlẹ etọn jẹeji, Jesu donù “Ahọluduta olọn tọn” go. Enẹwutu, e họnwun dọ Jehovah Jiwheyẹwhe wẹ “ahọlu” lọ. Etẹwẹ dogbọn visunnu ahọlu lọ tọn po mẹhe yin oylọ-basina wá hùnwhẹ alọwle tọn lọ lẹ po dali? Whladopo dogọ, yé sọgan mọ po awubibọ po dọ Visunnu Jehovah tọn wẹ visunnu ahọlu lọ tọn, yèdọ mẹhe to apajlẹ lọ na yé, podọ mẹhe yin oylọ-basina lẹ wẹ mẹhe na nọpọ́ hẹ Visunnu lọ to Ahọluduta olọn tọn mẹ lẹ.

Mẹnu lẹ wẹ yin omẹ tintan he yin oylọ-basina? Eyọn, mẹnu lẹ wẹ Jesu po apọsteli lẹ po ko to yẹwheho Ahọluduta lọ tọn dọna? Ju lẹ wẹ. (Matiu 10:6, 7; 15:24) Akọta ehe kẹalọyi alẹnu Osẹ́n tọn lọ to owhe 1513 J.W.M. bo gbọnmọ dali yin akọta tintan he to hukan ji nado wleawuna “ahọluduta yẹwhenọ lẹ tọn de.” (Eksọdusi 19:5-8) Ṣigba, whetẹnu wẹ yé na yin oylọ-basina wá “hùnwhẹ alọwle tọn lọ” taun? E họnwun dọ oylọ-basinamẹ enẹ bẹjẹeji to owhe 29 W.M., to whenue Jesu bẹ yẹwhehodidọ gando Ahọluduta olọn tọn go jẹeji.

Amọ́, nawẹ suhugan Islaelivi lẹ tọn yinuwa gando oylọ-basinamẹ lọ go gbọn? Dile Jesu dọ do, “yé ma jlo nado wá.” Suhugan sinsẹ̀ngán po omẹ lọ lẹ po tọn ma kẹalọyi i taidi Mẹsia lọ podọ taidi Ahọlu dide Jiwheyẹwhe tọn.

Ṣigba, Jesu dohia dọ dotẹnmẹ devo na hundote na Ju lẹ to whenue e dọmọ: “Whladopo dogọ, [ahọlu lọ] do afanumẹ devo lẹ hlan, bo dọmọ, ‘Mì dọna mẹhe yin oylọ-basina lẹ dọmọ: “Mì pọ́n! Yẹn ko wleawuna núdùdù ṣie, oyìnsú po kanlin dojó ṣie lẹ po ko yin hùhù, bọ onú lẹpo ko sọgbe. Mì wá hùnwhẹ alọwle tọn lọ.”’ Mahopọnna enẹ, yé ma kiya, yé sọ tọ́nyi, ode yì ogle etọn titi mẹ, devo yì ajọ́ etọn gbé; ṣigba mẹhe pò lẹ wle afanumẹ etọn lẹ, bo yinuwa hẹ yé po kanyinylan po bosọ hù yé.” (Matiu 22:4-6) Enẹ sọgbe hẹ nuhe na wá jọ to whenue agun Klistiani tọn na yin didoai. To ojlẹ enẹ mẹ, dotẹnmẹ lọ gbẹ́ hundote na Ju lẹ nado biọ Ahọluduta lọ mẹ, ṣogan suhugan yetọn gbẹ́ oylọ-basinamẹ ehe dai bo tlẹ yinuwa hẹ ‘afanumẹ ahọlu lọ tọn lẹ’ po kanyinylan po.—Owalọ lẹ 4:13-18; 7:54, 58.

Etẹwẹ na yin kọdetọn lọ na akọta lọ? Jesu dọmọ: “Ahọlu lọ sọ gblehomẹ, bo do awhànpa etọn lẹ hlan bosọ hù hlọnhutọ enẹlẹ sudo bo fiọ tòdaho yetọn.” (Matiu 22:7) Enẹ jọ do Ju lẹ go to owhe 70 W.M. to whenue Lomunu lẹ và “tòdaho yetọn,” enẹ wẹ Jelusalẹm sudo.

Be oylọ-basinamẹ ahọlu lọ tọn he yé gbẹ́ dai dohia dọ mẹdevo depope ma na yin oylọ-basina ba wẹ ya? Apajlẹ Jesu tọn dohia dọ e ma yinmọ. E zindonukọn dọmọ: “Enẹgodo, [ahọlu lọ] dọna afanumẹ etọn lẹ dọ, ‘Hùnwhẹ alọwle tọn lọ ko yin awuwlena fó, ṣigba mẹhe yin oylọ-basina lẹ ma jẹ gba. Enẹwutu, mì yì aliho he tọ́n sọn tòdaho lọ mẹ lẹ ji, bo basi oylọna mẹdepope he mì mọ nado wá hùnwhẹ alọwle tọn lọ.’ To whenẹnu, afanumẹ enẹlẹ tọ́nyi aliho lọ lẹ ji bo ylọ mẹhe yé mọ lẹpo pli, yèdọ mẹylankan po mẹdagbe lẹ po; bọ mẹhe to núdù lẹ gọ́ ohọ̀ hùnwhẹ alọwle tọn lọ mẹ.”—Matiu 22:8-10.

E jẹna ayidego dọ to nukọn mẹ, apọsteli Pita jẹ alọgọna Kosi lẹ ji—yèdọ mẹhe ma yin Juvi jiji kavi yin mẹdiọzun Ju lẹ—nado lẹzun Klistiani nugbo lẹ. To owhe 36 W.M., Kọneliọsi he yin mẹkanwekowhàngán Lomunu de po whẹndo etọn po mọ gbigbọ Jiwheyẹwhe tọn yí bo gbọnmọ dali tin to hukan ji nado mọ otẹn de to Ahọluduta olọn tọn he Jesu dọho etọn lọ mẹ.—Owalọ lẹ 10:1, 34-48.

Jesu dohia dọ e ma yin mẹhe wá hùnwhẹ lọ tẹnmẹ lẹpo wẹ na do yede hia taidi mẹhe jẹ nado yin alọkẹyi gbọn “ahọlu lọ” dali. E dọmọ: “To whenuena ahọlu lọ wá nado pọ́n jonọ lẹ, nukun etọn jẹ dawe de ji he ma do awù alọwle tọn. Enẹwutu, e dọna ẹn dọ, ‘Dawe, nawẹ hiẹ wagbọn do biọ fi matin awù alọwle tọn?’ Ewọ masọ sọgan kẹnù. To whenẹnu, ahọlu lọ dọna devizọnwatọ etọn lẹ dọ, ‘Mì blá ẹ, alọ po afọ po bo dlan ẹn do zinvlu mẹ to gbonu. Finẹ wẹ e na viavi bo dù adúkúnkún te.’ Na mẹsusu wẹ yin oylọ-basina, ṣigba vude wẹ yin dide.”—Matiu 22:11-14.

Sinsẹ̀ngán he to todoaina Jesu lẹ sọgan nọma mọnukunnujẹ zẹẹmẹ nuhe e to didọ lẹpo tọn mẹ to gigọ́ mẹ. Etomọṣo, homẹgble yé bọ yé sọ magbe dogọ nado de mẹhe to winyando yé sọmọ lọ sẹ̀ sọn aimẹ.