Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 109

E Dedona Agọjẹdomẹtọ Etọn Lẹ

E Dedona Agọjẹdomẹtọ Etọn Lẹ

MATIU 22:41–23:24 MALKU 12:35-40 LUKU 20:41-47

  • VISUNNU MẸNU TỌN WẸ KLISTI YIN?

  • JESU DEDONA AGỌJẸDOMẸTỌ YẸNUWATỌ LẸ

Kẹntọ sinsẹ̀n tọn lẹ gboawupo nado mọhodọdo Jesu go kavi domọwle e bo ze e jo na Lomunu lẹ. (Luku 20:20) Todin, dile Jesu gbẹ́ pò to tẹmpli mẹ to Nisan 11tọ, ewọ lọsu lilẹ́ pannukọn yé bo do mẹhe e yin na taun tọn hia. E ze afọdide tintan lọ bo kanse yé dọmọ: “Etẹwẹ mìwlẹ lẹn gando Klisti lọ go? Visunnu mẹnu tọn wẹ ewọ?” (Matiu 22:42) Yé gblọn dọ, mẹlẹpo wẹ yọnẹn dọ Klisti lọ, kavi Mẹsia, na wá sọn kúnkan Davidi tọn mẹ.—Matiu 9:27; 12:23; Johanu 7:42.

Jesu kanse dọmọ: “To whelọnu lo, naegbọn Davidi to gbọdo glọ do ylọ ẹ dọ Oklunọ, bo dọ dọ, ‘Jehovah dọna Oklunọ ṣie dọ: “Sinai to adusilọ ṣie mẹ kaka yẹn nado yí kẹntọ towe lẹ do afọ towe lẹ glọ”’? To whenẹnu, eyin Davidi ylọ ẹ dọ Oklunọ, nawẹ ewọ yin visunnu etọn gbọn lo?”—Matiu 22:43-45.

Falesi lẹ ma sọgan kẹnù, na gbẹtọvi de sọn kúnkan Davidi tọn mẹ wẹ yé to nukundo nado de yé sọn gandudu Lomu tọn glọ. Ṣigba, Jesu yihodọ sọn hogbe Davidi tọn he yin kinkandai to Psalm 110:1, 2 mẹ lẹ mẹ nado dohia dọ Mẹsia lọ ma yin gandutọ gbẹtọvi de poun. Oklunọ Davidi tọn wẹ ewọ yin, podọ to whenue e na ko sin adusilọ Jiwheyẹwhe tọn mẹ godo, e na wá dugán. Gblọndo Jesu tọn bọnùdo na agọjẹdomẹtọ etọn lẹ.

Devi lẹ po mẹsusu devo lẹ po to todoai. Todin, Jesu dọhona yé bo na yé avase gando wekantọ lẹ po Falesi lẹ po go. Omẹ enẹlẹ ko “ze yede sinai do aisintẹn Mose tọn mẹ” nado plọnmẹ Osẹ́n Jiwheyẹwhe tọn. Jesu dọna todoaitọ etọn lẹ dọmọ: “Mì nọ wà bosọ nọ payi nuhe yé dọna mì lẹpo go, ṣigba mì yinuwa kẹdẹdi walọ yetọn lẹ blo, na yé nọ dọ ṣigba yé ma nọ wà nuhe yé nọ dọ.”—Matiu 23:2, 3.

Enẹgodo, Jesu yí apajlẹ lẹ do dó yẹnuwiwa yetọn hia, dọmọ: “Yé nọ hẹn ayúpò yetọn he mẹ adà Owe-wiwe tọn lẹ nọ yin bibẹdo, ehe yé nọ sìn taidi hihọ́-basinamẹnu lẹ gblodeji.” Ju delẹ nọ sìn ayúpò pẹvipẹvi he mẹ adà Osẹ́n lọ tọn kleunkleun lẹ nọ yin bibẹdo ehelẹ do nukọn kavi do awà go. Falesi lẹ nọ hẹn ayúpò yetọn lẹ gblodeji nado dohia dọ yé nọ yí zohunhun do yìn Osẹ́n lọ. Yé sọ “nọ hẹn okẹ̀yẹ̀ awù yetọn tọn lẹ dite dogọ.” Islaelivi lẹ dona nọ basi okẹ̀yẹ̀ do awù yetọn lẹ go, amọ́ Falesi lẹ nọ hẹn ẹn diun dọ okẹ̀yẹ̀ yewlẹ tọn dite taun. (Osọha lẹ 15:38-40) Yé nọ basi ehe lẹpo “na gbẹtọ lẹ nido mọ yé.”—Matiu 23:5.

Ojlo lọ nado diyin tlẹ sọgan yinuwado devi Jesu tọn lẹ lọsu ji, enẹwutu e na yé ayinamẹ dọmọ: “Mì dike yè ylọ mì dọ Labi blo, na omẹ dopo wẹ yin Mẹplọntọ mìtọn, bọ mìmẹpo yin mẹmẹsunnu lẹ. Humọ, mì ylọ mẹde dọ otọ́ mìtọn to aigba ji blo, na omẹ dopo wẹ yin Otọ́ mìtọn, yèdọ Ewọ he to olọn lọ. Mọdopolọ, mì dike yè ylọ mì dọ nukọntọ blo, na Nukọntọ dopo wẹ mì tindo, yèdọ Klisti lọ.” Eyin mọ wẹ, nawẹ devi lẹ na nọ pọ́n yedelẹ hlan bo nọ yinuwa hẹ yedelẹ gbọn? Jesu dọna yé dọmọ: “Mẹhe klohugan to mì mẹ dona yin lizọnyitọ mìtọn. Mẹdepope he ze ede daga wẹ yè na whiwhẹ, podọ mẹdepope he whiwhẹ ede wẹ yè na zedaga.”—Matiu 23:8-12.

Enẹgodo, Jesu dọ whlasusu dọ dindọn wẹ hlan wekantọ po Falesi yẹnuwatọ lẹ po dọmọ: “Dindọn hlan mì, wekantọ lẹ po Falesi lẹ po, mì yẹnuwatọ lẹ! na mì nọ sú ohọ̀n Ahọluduta olọn tọn to gbẹtọ lẹ nukọn; na mìlọsu lẹ ma biọ e mẹ, mọdopolọ mì masọ na dotẹnmẹ mẹhe to na biọ e mẹ lẹ nado biọ e mẹ.”—Matiu 23:13.

Jesu gblewhẹdo Falesi lẹ na sisi he yé ma tindo na gbigbọnu lẹ wutu, dile hopàdọ yetọn lẹ dohia do. Di apajlẹ, yé nọ dọ dọ: “Eyin mẹde yí tẹmpli lọ do whlé, e ma yin nude; ṣigba eyin mẹde yí sika tẹmpli lọ tọn do whlé, e to dandannu glọ.” Gbọnmọ dali, yé nọ dohia dọ emi tọ́nnukun to walọyizan-liho, na yé nọ mọdọ sika tẹmpli lọ tọn yin nujọnu hugan ale gbigbọmẹ tọn he nọtẹn sinsẹ̀n-bibasi Jehovah tọn lọ sọgan hẹnwa. Podọ yé “ko yí nukunpẹvi do pọ́n nuhe yin nujọnu hugan to Osẹ́n lọ mẹ lẹ, yèdọ whẹdida dodo, lẹblanu po nugbonọ-yinyin po.”—Matiu 23:16, 23; Luku 11:42.

Jesu ylọ Falesi ehelẹ dọ “alihiamẹtọ nukuntọ́nnọ lẹ, he nọ hú jẹhli sẹ̀ bo ka nọ ze kanklosọ́ mì!” (Matiu 23:24) Yé nọ hú jẹhli sẹ̀ sọn ovẹn yetọn mẹ, na e yin kanlin mawé to aṣa-liho wutu. Etomọṣo, lehe yé nọ yí nukunpẹvi do pọ́n nuhe yin nujọnu hugan to Osẹ́n lọ mẹ lẹ do yin nudopolọ po kanklosọ́ de zize mì po, yèdọ kanlin de he klohu jẹhli tlala bo yin mawé to aṣa-liho ga.—Levitiku 11:4, 21-24.