Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 127

Whẹdatẹn Daho lọ Dawhẹna Jesu, bo Plan Ẹn Yì Pilati Dè

Whẹdatẹn Daho lọ Dawhẹna Jesu, bo Plan Ẹn Yì Pilati Dè

MATIU 27:1-11 MALKU 15:1 LUKU 22:66–23:3 JOHANU 18:28-35

  • TO WHẸDATẸN DAHO LỌ NUKỌN TO AFỌNNU

  • JUDA ISKALIỌTI TẸNPỌN NADO DOKANKỌ

  • JESU YIN DIDOHLAN PILATI DÈ NADO YIN WHẸGBLEDO

Ai ko dibla họ́n to whenue Pita mọ́n Jesu whla atọ̀ntọ. Hagbẹ whẹdatẹn daho lọ tọn lẹ ko dotana whẹdida agọ̀ yetọn bo ko gbàdo. To wunkẹngbe to vendredi afọnnu, yé vọ́ bẹ yede pli dopọ, vlavo nado suwhẹna whẹdida zánmẹ tọn he ma sọgbe hẹ osẹ́n lọ. Jesu yin hinhẹnwa nukọn yetọn.

Whladopo dogọ, whẹdatẹn lọ kanse dọmọ: “Dọna mí, eyin hiẹ wẹ Klisti lọ.” Jesu gblọn dọmọ: “Eyin yẹn tlẹ dọna mì, mì ma kúkú na yí i sè. Humọ, eyin yẹn kannubiọ mì, mì ma kúkú na gblọn.” Etomọṣo, Jesu yí adọgbigbo do dohia yé dọ ewọ go wẹ dọdai yin didọ gando to Daniẹli 7:13 mẹ. E dọmọ: “Sọn din sọyi, Visunnu gbẹtọ tọn na to aisinsin to adusilọ huhlọnnọ Jiwheyẹwhe tọn mẹ.”—Luku 22:67-69; Matiu 26:63.

Yé gbẹ́ tẹkudeji dọmọ: “To whelọnu lo, be Visunnu Jiwheyẹwhe tọn wẹ hiẹ?” Jesu gblọn dọmọ: “Mìlọsu wẹ to didọ dọ yẹn yinmọ.” Ehe taidi kunnudenu he pé nado hù Jesu taidi nùzantọ de. Yé kanse ode awetọ dọmọ: “Naegbọn mí gbẹ́ to kunnudetọ dín dogọ?” (Luku 22:70, 71; Malku 14:64) Enẹwutu, yé blá Jesu bo plan ẹn yì Ayimatẹn-gán Lomu tọn Pọntiu Pilati dè.

Juda Iskaliọti sọgan ko mọ Jesu to whenue yè plan ẹn jei Pilati dè. To whenue Juda mọdọ yè ko dawhẹ okú tọn na Jesu, e tindo numọtolanmẹ whẹhuhu tọn bo hẹn todido bu. Ṣigba, kakati nado lẹhlan Jiwheyẹwhe dè bo lẹnvọjọ nugbonugbo, e lẹkọyi nado gọ̀ fataka-kuẹ 30 lọ lẹ jo. Juda dọna yẹwhenọgán lọ lẹ dọmọ: “Yẹn waylando to whenue yẹn de ohùn homẹvọnọ tọn hia.” Ṣigba yé gblọnna ẹn po kanyinylan po dọmọ: “Etẹwẹ dù mí to enẹ mẹ? Hiẹ wẹ enẹ dù!”—Matiu 27:4.

Juda bẹ fataka-kuẹ 30 lọ lẹ dlan do tẹmpli mẹ bosọ yidogọna nuṣiwa etọn gbọn tintẹnpọn nado hù ede dali. Dile Juda to tintẹnpọn nado dokankọ, vlavo alà he go e sìn okàn do lọ wẹ́n. E sọ flẹ jẹ osé he to odò lẹ ji, bọ agbasa etọn là bo dọnú gángán.—Owalọ lẹ 1:17, 18.

Afọnnu fuu wẹ Jesu yin pinplan yì họ̀nmẹ Pọntiu Pilati tọn. Ṣigba Ju he plan ẹn yì lẹ gbẹ́ nado biọ finẹ. Yé lẹndọ kanṣiṣa mọnkọtọn hẹ Kosi lẹ na hẹn yé flu. Enẹ na glọnalina yé ma nado dù núdùdù to Nisan 15tọ, yèdọ azán tintan Hùnwhẹ Akla Madotọ́n tọn lọ gbè, ehe nọ yin pinpọnhlan taidi apadewhe ojlẹ hùnwhẹ Juwayi tọn.

Pilati tọ́njẹgbonu bo kanse yé dọmọ: “Whẹsadokọnamẹ tẹwẹ mì hẹnwa sọta dawe ehe?” Yé gblọn dọmọ: “Eyin dawe ehe ma yin ylanwatọ de, mí ma na ko ze e do alọmẹ na we.” Pilati na ko mọdọ yé to tintẹnpọn nado do ṣọ̀ṣọ̀ na emi wẹ, enẹwutu e dọmọ: “Mìlọsu ni plan ẹn bo dawhẹna ẹn sọgbe hẹ osẹ́n mìtọn.” Ju lẹ de linlẹn hlọnhuhu tọn yetọn hia, bo gblọn dọmọ: “E ma sọgbe hẹ osẹ́n dọ mí ni hù mẹdepope.”—Johanu 18:29-31.

Na taun tọn, eyin yé hù Jesu to hùnwhẹ Juwayi tọn lọ whenu, ehe na fọ́n hunyanhunyan dote to gbẹtọ lẹ ṣẹnṣẹn. Ṣigba, eyin yé sọgan hẹn Lomunu lẹ nado hù Jesu na whẹwhinwhẹ́n tonudidọ tọn lẹ wutu, yèdọ nuhe Lomunu lẹ tindo jlọjẹ nado wà, ehe na de Ju enẹlẹ sọn owhẹ̀ mẹ to gbẹtọ lẹ nukọn.

Sinsẹ̀ngán lọ lẹ ma dọna Pilati dọ yé ko gblewhẹdo Jesu dọ ewọ zánnu. Todin, whẹsadokọnamẹ devo lẹ wẹ yé detọ́n: “Mí mọ dawe ehe [1] bọ e to gufinfọn hẹnwa akọta mítọn mẹ, [2] bo to gbigbẹ́ dọ yè ma dona na tòkuẹ hlan Sesali, [3] bosọ to didọ dọ ewọ wẹ Klisti ahọlu lọ.”—Luku 23:2.

Taidi afọzedaitọ Lomu tọn de, owhẹ̀ Pilati tọn whẹ́n nado yin ahunmẹduna gando whẹsadokọnamẹ lọ he dohia dọ Jesu do ede hia di ahọlu go. Enẹwutu, Pilati gọ̀ biọ họ̀nmẹ, bo ylọ Jesu wá ede dè, bo kanse e dọmọ: “Be hiẹ wẹ ahọlu Ju lẹ tọn ya?” To hogbe devo mẹ, ‘Be hiẹ ko gbà osẹ́n ahọluigba lọ tọn gbọn dewe didohia di ahọlu de he jẹagọdo Sesali dali wẹ ya?’ Vlavo nado yọ́n obá he mẹ Pilati ko sèhó gando ewọ go jẹ, Jesu dọmọ: “Be ojlo towe titi mẹ wẹ hiẹ dọ ehe sọn, kavi mẹdevo lẹ wẹ dọhona we gando go e?”—Johanu 18:33, 34.

Nado dohia dọ ewọ ma yọ́n nude gando Jesu go ṣigba bo jlo na yọ́n whẹho he gando e go lọ lẹ, Pilati gblọn dọmọ: “Yẹn ma yin Ju de, kavi e ma yin mọ wẹ?” E yidogọ dọmọ: “Akọta towe titi po yẹwhenọgán lẹ po wẹ ze we jo na mi. Etẹwẹ hiẹ wà?”—Johanu 18:35.

Jesu ma tẹnpọn nado ṣinyọnnudo whẹho titengbe lọ—yèdọ ahọlu-yinyin. Matin ayihaawe, aliho he mẹ e na gblọndo te paṣa Ayimatẹn-gán Pilati taun.