Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 110

Azán Godo Tọn He Jesu Yizan to Tẹmpli Mẹ

Azán Godo Tọn He Jesu Yizan to Tẹmpli Mẹ

MATIU 23:25–24:2 MALKU 12:41–13:2 LUKU 21:1-6

  • JESU SỌ GBLEWHẸDO SINSẸ̀NGÁN LẸ

  • TẸMPLI LỌ NA YIN VIVASUDO

  • ASUṢIỌSI WAMỌNỌ DE NA ABỌGAN-KUẸ FLINFLIN AWE

To whenue Jesu yì tẹmpli mẹ gbọngodo, e zindonukọn nado de yẹnuwiwa wekantọ lẹ po Falesi lẹ po tọn gbà, bo ylọ yé dọ yẹnuwatọ lẹ to mẹlẹpo nukọn. E yí apajlẹ de zan dọmọ: “Mì nọ klọ́ gbonu kọfo po agbánvla po tọn wé, ṣigba to homẹ, yé gọ́ na nukunkẹn po wazẹjlẹgo po. Hiẹ Falesi nukuntọ́nnọ, klọ́ homẹ kọfo po agbánvla po tọn wé whẹ́, na gbonu etọn nido lẹzun wiwe ga.” (Matiu 23:25, 26) Falesi lẹ yin hẹngogonọ na nuhe dù klọ́we to aṣa-liho po awusọhia gbonu tọn po, ṣigba yé nọ dovọ́na gbẹtọ homẹ tọn bo nọ gboawupo nado klọ́ ahun yẹhiadonu tọn yetọn wé.

Yẹnuwiwa yetọn sọ nọ sọawuhia to ojlo yetọn nado do bosọ doaṣọ́na yọdò na yẹwhegán lẹ mẹ. Ṣogan dile Jesu dọ do, “ovi mẹhe hù yẹwhegán lẹ tọn lẹ wẹ [yé] yin.” (Matiu 23:31) Vivẹnu he yé do nado hù Jesu do ehe hia.—Johanu 5:18; 7:1, 25.

Enẹgodo, Jesu dọ nuhe to tepọn sinsẹ̀ngán ehelẹ eyin yé ma lẹnvọjọ dọmọ: “Mì odàn po ovi amàpoe tọn lẹ po emi, nawẹ mì na họ̀ngán sọn whẹdida Gẹhẹnna tọn mẹ gbọn?” (Matiu 23:33) Gẹhẹnna zẹẹmẹdo “Agbàdo Hinọmi tọn.” Agbàdo enẹ mẹ wẹ ogbó lẹ nọ yin fifiọ te, ehe yin nuyijlẹdonugo de nado do vasudo tẹgbẹ tọn he to tepọn wekantọ po Falesi kanylantọ lọ lẹ po hia.

Devi Jesu tọn lẹ na ze afọ etọn dai taidi “yẹwhegán lẹ, nuyọnẹntọ lẹ po nuplọnmẹtọ gbangba tọn lẹ po.” Nawẹ yé na yin nuyiwa hẹ gbọn? Jesu dọna sinsẹ̀ngán lẹ dọmọ: “Mì na hù delẹ to [devi ṣie lẹ] mẹ bo whè delẹ do pòtin go, podọ mì na hò delẹ to yé mẹ to sinagọgu mìtọn lẹ mẹ bo dohomẹkẹn delẹ sọn tòdaho de mẹ jẹ tòdaho de mẹ, na ohùn dodonọ lẹ tọn he ko yin sinsọndai to aigba ji lẹpo nido wá mì ji, yèdọ sọn ohùn Abẹli dodonọ lọ tọn ji kakajẹ ohùn Zekalia . . . tọn ji, mẹhe mìwlẹ hù.” E na avase dọmọ: “Nugbo wẹ yẹn dọna mì, onú ehe lẹpo na jọ do whẹndo ehe go.” (Matiu 23:34-36) Nuhe jọ to owhe 70 W.M. niyẹn to whenue awhànfuntọ Lomu tọn lẹ và Jelusalẹm sudo bọ Ju fọtọ́n susu dọ̀n.

Nugbajẹmẹji ehe mimọ dohlan nukọn hẹn awubla Jesu bọ e dọmọ: “Jelusalẹm, Jelusalẹm E, hiẹ he nọ hù yẹwhegán lẹ bo nọ dlan zannu do mẹhe yin didohlan we lẹ—whla nẹmu wẹ yẹn ko jlo nado bẹ ovi towe lẹ pli dile koklosi de nọ bẹ ovi etọn lẹ pli do awà etọn lẹ glọ do! Ṣigba, mìwlẹ ma jlo domọ. Mì pọ́n! Owhé mìtọn na yin jijodai na mì.” (Matiu 23:37, 38) Mẹhe to ohó ehe sè lẹ dona ko kanhose yede gando “owhé” he hodọ e te go. Be e yọnbasi dọ tẹmpli whanpẹnọ he tin to finẹ to Jelusalẹm, he e taidi dọ Jiwheyẹwhe to hihọ́-basina lọ wẹ ewọ to alọdlẹndo ya?

Enẹgodo, Jesu yidogọ dọmọ: “Yẹn dọna mì dọ, bẹsọn din, mìwlẹ ma nasọ mọ mi ba kaka mì nado dọ, ‘Donanọ wẹ mẹhe ja to oyín Jehovah tọn mẹ!’” (Matiu 23:39) E yihodọ sọn dọdai he tin to Psalm 118:26 mẹ he dọmọ: “Donanọ wẹ mẹlọ he ja to oyín Jehovah tọn mẹ; míwlẹ nọ pagigona we sọn owhé Jehovah tọn gbè.” E họnwun dọ whenue tẹmpli he yé to mimọ ehe na yin vivasudo, mẹdepope masọ ja e mẹ to oyín Jiwheyẹwhe tọn mẹ ba.

Todin, Jesu sẹyì awà tẹmpli lọ tọn de ji fie adọkun potin he tindo awusọhia opẹ̀n tọn lẹ tin te. Gbẹtọ lẹ sọgan ze nunina lẹ do e mẹ gbọn nùvo pẹvi he to aga lọ lẹ nù. Nuhe Jesu mọ bọ Ju voovo lẹ to wiwà niyẹn, adọkunnọ lẹ “to abọgan-kuẹ susu dlan do yé mẹ” taidi nunina. Enẹgodo, Jesu doayi asuṣiọsi wamọnọ de go, mẹhe dlan “abọgan-kuẹ flinflin awe, he ma họakuẹ sọmọ” do e mẹ. (Malku 12:41, 42) Matin ayihaawe, Jesu yọ́n lehe homẹ Jiwheyẹwhe tọn na ko hùn do nunina nawe lọ tọn go do.

Jesu ylọ devi etọn lẹ bo dọmọ: “Nugbo wẹ yẹn dọna mì dọ asuṣiọsi wamọnọ ehe dlan do e mẹ hú mẹhe to akuẹ dlan do adọkun potin lọ lẹ mẹ lẹpo.” Etẹwutu? E basi zẹẹmẹ dọmọ: “Yemẹpo wẹ dlan do e mẹ sọn lánkan yetọn lẹ mẹ, ṣigba ewọ, sọn matindo etọn mẹ, dlan nuhe e tindo lẹpo, yèdọ nutindo gbẹ̀mẹ tọn etọn lẹpo do e mẹ.” (Malku 12:43, 44) Lehe pọndohlan po nuyiwa etọn po gbọnvona sinsẹ̀ngán lẹ tọn do sọ!

Dile azán 11tọ Nisan tọn to jujuyi, Jesu tọ́n sọn tẹmpli mẹ whla godo tọn. Dopo to devi etọn lẹ mẹ dawhá dọmọ: “Mẹplọntọ, pọ́n! zannu nankọ lẹ die podọ ohọ̀ nankọ lẹ die!” (Malku 13:1) Na nugbo tọn, delẹ to zannu adó tẹmpli lọ tọn lẹ mẹ klo taun, ehe zọ́n bọ e taidi nuhe lodo bo na dẹn-to-aimẹ. Enẹwutu, e na ko paṣa gbẹtọ lẹ taun to whenue Jesu dọmọ: “Ohọ̀ daho ehelẹ pọ́n wẹ a te ya? Zannu de ma na yin jijodo zannu de ji to aliho depope mẹ tofi he ma na yin hihọliai.”—Malku 13:2.

To whenue Jesu dọ onú ehelẹ godo, ewọ po apọsteli etọn lẹ po dasá Agbàdo Kidlọni tọn bo hẹ Osó Olivie tọn. To ojlẹ de mẹ, apọsteli ẹnẹ wẹ tin to e dè—yèdọ Pita, Andle, Jakọbu po Johanu po. Sọn nọtẹn ehe, yé sọgan mọ tẹmpli whanpẹnọ lọ hlan.