Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 113

Apajlẹ Talẹnti lẹ Tọn Plọn Mí Dọ Mí Dona Nọ Dovivẹnu

Apajlẹ Talẹnti lẹ Tọn Plọn Mí Dọ Mí Dona Nọ Dovivẹnu

MATIU 25:14-30

  • JESU NA APAJLẸ TALẸNTI LẸ TỌN

Dile Jesu po apọsteli ẹnẹ lọ lẹ po gbẹ́ pò to Osó Olivie tọn ji, e na yé apajlẹ devo. To whenue e tin to Jẹliko to azán delẹ die, e na apajlẹ mina lẹ tọn nado dohia dọ wiwá Ahọluduta lọ tọn gbẹ́ pò to nukọn taun. Apajlẹ mina lẹ tọn lọ tindo kanṣiṣa susu hẹ apajlẹ he e na todin lọ. Apajlẹ ehe yin apadewhe gblọndo kanbiọ he gando tintin tofi etọn po vivọnu titonu lọ tọn po go tọn. Apajlẹ lọ zinnudeji dọ devi etọn lẹ dona nọ dovivẹnu nado wà azọ́n he e zedo alọmẹ na yé lọ.

Jesu bẹjẹeji dọmọ: “E tin taidi dawe de, he jlo na tọ́nwhẹ̀n yì tògodo bo ylọ afanumẹ etọn lẹ pli bosọ ze nutindo etọn lẹ do alọmẹ na yé.” (Matiu 25:14) Na Jesu ko yí ede jlẹdo dawe de he tọ́nwhẹ̀n yì tògodo “nado mọ aṣẹpipa ahọlu-yinyin tọn yí” go wayi wutu, apọsteli lẹ sọgan mọ po awubibọ po dọ Jesu wẹ “dawe” he hodọ e te todin lọ.—Luku 19:12.

Whẹpo dawe he yin nùdego to apajlẹ lọ mẹ do tọ́nwhẹ̀n yì tògodo, e bẹ nutindo họakuẹ etọn lẹ do alọmẹ na afanumẹ etọn lẹ. To lizọnyizọn he Jesu wà na owhe atọ̀n daa lọ whenu, e na ayidonugo yẹwheho wẹndagbe Ahọluduta Jiwheyẹwhe tọn didọ bo plọnazọ́n devi etọn lẹ nado wà azọ́n ehe. Todin, ewọ jei bo deji dọ yé na zindonukọn to azọ́n he e plọn yé lọ wiwà mẹ.—Matiu 10:7; Luku 10:1, 8, 9; yijlẹdo Johanu 4:38; 14:12 go.

To apajlẹ lọ mẹ, nawẹ dawe lọ má nutindo etọn lẹ gbọn? Jesu dọmọ: “E yí talẹnti atọ́n na omẹ tintan, bo yí awe na omẹ awetọ, bosọ yí dopo na omẹ atọ̀ntọ, yèdọ omẹ dopodopo sọgbe hẹ nugopipe etọn, bosọ yì tògodo.” (Matiu 25:15) Etẹwẹ afanumẹ enẹlẹ na yí nuhe e zedo alọmẹ na yé lẹ do wà? Be yé na dovivẹnu bo yí yé zan na ale klunọ yetọn tọn ya? Jesu dọna apọsteli lọ lẹ dọmọ:

“Mẹhe mọ talẹnti atọ́n yí lọ tọ́nyi to afọdopolọji bo yí yé do wàjọ bosọ duale talẹnti atọ́n tọn dogọ. Mọdopolọ, mẹhe mọ awe yí lọ lọsu duale awe tọn dogọ. Ṣigba, afanumẹ he mọ dopo gee yí lọ tọ́nyi bo kùndò bosọ whlá akuẹ klunọ etọn tọn do e mẹ.” (Matiu 25:16-18) Etẹwẹ na jọ to whenue klunọ lọ na lẹkọ?

Jesu zindonukọn dọmọ: “To ojlẹ dindẹn de godo, klunọ afanumẹ lọ lẹ tọn wá bo biọ to yé si nado basi lẹnjo na ẹn.” (Matiu 25:19) Omẹ awe tintan lẹ wà nuhe go yé pé lẹpo, yèdọ “omẹ dopodopo sọgbe hẹ nugopipe etọn.” Afanumẹ lọ lẹ dopodopo dovivẹnu bo wazọ́n sinsinyẹn bosọ mọ ale po nuhe yin zizedo alọmẹ na yé lẹ po. Mẹhe mọ talẹnti atọ́n yí lọ duale atọ́n devo lẹ tọn bọ mẹhe mọ talẹnti awe yí lọ duale awe devo tọn. (To ojlẹ enẹ mẹ, azọ́nwatọ de dona wazọ́n sinsinyẹn na owhe 19 nkọ nado mọ akuẹ he sọzẹn hẹ talẹnti dopo.) Mẹpipa dopolọ wẹ klunọ lọ na dopodopo yetọn dọmọ: “A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do onú susu ji. Biọ ayajẹ klunọ towe tọn mẹ.”—Matiu 25:21.

Ṣigba, nuyiwa afanumẹ he mọ talẹnti dopo yí lọ tọn gbọnvo. E dọmọ: “Klunọ, yẹn yọnẹn dọ gbẹtọ sinsinyẹn de wẹ hiẹ, he nọ gbẹ̀n to fie hiẹ ma do dó, bosọ nọ bẹpli to fie hiẹ ma fú te. Enẹ wẹ zọ́n bọ yẹn dibu bo tọ́nyi bosọ whlá talẹnti towe do okọ́ glọ. Onú towe die.” (Matiu 25:24, 25) E ma tlẹ ze akuẹ lọ do akuẹsẹdotẹn nado mọ e whè gbau ale de na klunọ etọn. Na nugbo tọn, e ma wà nudepope nado hẹn ale wá na klunọ etọn.

Abajọ klunọ lọ ylọ ẹ dọ “afanumẹ ylankan podọ adidọnọ.” Nuhe e tindo lọ yin yíyí sọn e si bo yin zize na afanumẹ he jlo na dovivẹnu lọ. Klunọ lọ ze nujinọtedo etọn dai dọmọ: “Mẹdepope he tindo, yè na na ẹn dogọ bọ e na tindo susugege. Ṣigba, na mẹhe ma tindo, yèdọ nuhe e tindo lọsu na yin yíyí sọn e si.”—Matiu 25:26, 29.

Nususu ji wẹ devi Jesu tọn lẹ dona lẹnnupọndo, etlẹ yin do apajlẹ ehe lọsu ji. Yé sọgan mọdọ nuhe Jesu to zizedo alọmẹ na yé—enẹ wẹ lẹblanulọkẹyi họakuẹ he yé tindo nado basi devi lẹ—yin nuhọakuẹ taun. Podọ e to nukundo dọ yé ni dovivẹnu nado penukundo lẹblanulọkẹyi ehe go. Jesu ma lẹndọ yemẹpo wẹ dona wà nudopolọ to azọ́n yẹwhehodidọ tọn he e zedo alọmẹ na yé lọ mẹ. Dile apajlẹ lọ dohia do, mẹdopodopo dona wà nuhe go e pé lẹpo “sọgbe hẹ nugopipe etọn.” Ehe ma dohia to aliho depope mẹ dọ homẹ Jesu tọn na hùn eyin mẹde yin “adidọnọ” bo gboawupo nado wà nuhe go e pé lẹpo nado hẹn nutindo Klunọ lọ tọn lẹ jideji.

Ṣigba, lehe homẹ apọsteli lọ lẹ tọn dona ko hùn do sọ to whenue yé yin jide na dọmọ: “Mẹdepope he tindo, yè na na ẹn dogọ bọ e na tindo susugege”!

Plọnnu Dogọ

Plọnnu sọn Apajlẹ Talẹnti lẹ Tọn Mẹ

Hosọ ehe vọ́ nukunnumọjẹnumẹ mítọn jlado gando apajlẹ talẹnti lẹ tọn go.